Síijen Ciudad Obregón tu xamanil México, teen u cincoil tiʼ le nueve paalal anchaj tiʼ in taataʼoboʼ. Toʼoneʼ paach kaaj kajaʼanoʼon kaʼachi, in papáeʼ ku kanáantik junpʼéel granja yéetel jach maʼalob k-bisikba tuláakloʼon. Chéen baʼaleʼ le ka tu tsʼáajten cinco añoseʼ taal junpʼéel huracáne’ ka tu láaj kʼaskúuntaj le tuʼux kajaʼanoʼonoʼ, le oʼolaleʼ anchaj k-bin kajtal táanxel tuʼux.

 Tumen káaj u náajal maʼalobeʼ in papáeʼ joʼopʼ u sen káaltal, le oʼolaleʼ pʼáat maʼ kiʼimak k-óol jeʼex kaʼacheʼ. Teen yéetel in sukuʼunoʼobeʼ káaj k-oklik u chaamal in papá utiaʼal k-tsʼuʼutsʼik. Seis años yaanten ka yáax káalchajen.

 In maamaeʼ bin kajtal yéetel uláakʼ máakeʼ ka tu bisoʼon tu yéetel, chéen baʼaleʼ letiʼeʼ maʼatech u tsʼáaik kaʼach taakʼin tiʼ. Le oʼolal anchaj u káajal k-meyaj tumen maʼ tu yantaltoʼon yéetel le bukaʼaj ku náajaltik kaʼach in maamaoʼ. Káaj in limpiartik xanaboʼob, in konik waaj, periódicoʼob yéetel chicle. Tsʼoʼoleʼ káaj xan in kaxtik janal teʼ tuʼux ku pulik basura le máaxoʼob ayikʼaloʼoboʼ.

 Le yaanten diez añosoʼ juntúul máakeʼ tu yaʼalajten wa jeʼel in bin meyaj teʼ tuʼux ku puʼulul basura teʼ kaajoʼ. Como tin kʼamaj le meyajoʼ tin pʼataj in xook, jach junpʼíit u boʼotken, tsʼoʼoleʼ ku tsʼáaikten le janal ku kaxtik teʼ basuraoʼ. Tin beetaj tak in wotoch yéetel le x-lalaʼ baʼaloʼob tin kaxtaj teʼ basurerooʼ. Le máaxoʼob yéetel kin biskinbaoʼ ku beetkoʼob baʼaloʼob kʼaastak, ku poochʼiloʼob, ku drogarkubaʼob yéetel ku káaltaloʼob. Kʼajaʼanteneʼ sáamsamal kin wokʼol yéetel jach suʼlaken tumen jach óotsilen kaʼachi. Tres años kajlajen teʼeloʼ, ka tsʼoʼokeʼ binen táanxel tuʼux. Teʼ tuʼux binenoʼ káaj in meyaj teʼ tuʼux ku paʼakʼal looloʼob, piitsʼ, caña yéetel papas.

 Ka máan cuatro añoseʼ suunajen Ciudad Obregón. Teʼeloʼ binen kajtal yéetel juntúul in tía x-meen, chéen baʼaleʼ káaj in wayakʼtik kʼaakʼas baʼaloʼob, hasta tin tuklaj in kíimskinba. Junpʼéel kʼiineʼ orarnajen tiʼ Dioseʼ ka tin waʼalajtiʼ: «In Yuum wa jach tu jaajil yanecheʼ taak in kʼaj óoltikech yéetel in meyajtikech. Wa yaan junpʼéel religión ku kaʼansik u jaajileʼ áanten utiaʼal in kaxtik yéetel in meyajtikech».

 Desde tin paalil uts tin tʼaan in kaanbal tiʼ Dios. Tin chichnileʼ binen tiʼ jejeláas iglesiaʼob, chéen baʼaleʼ tin wileʼ mix tuʼux ku kaʼansaʼal u jaajil yoʼolal le Bibliaoʼ mix yoʼolal Dios. Le máakoʼoboʼ chéen ku tʼaanoʼob tiʼ taakʼin yéetel kʼaas u kuxtaloʼob.

 Le yáanten 19 añosoʼ juntúul tiʼ in cuñadoʼobeʼ tu tsikbaltajten baʼax kaʼansaʼabtiʼ tumen u testigoʼob Jéeoba tu yoʼolal le imagenoʼoboʼ. Letiʼeʼ tu yeʼesajten Éxodo 20:4, 5 tuʼux ku yaʼalik maʼ unaj u adorartaʼaloʼobiʼ. Le versículo cincooʼ ku yaʼalik: «Maʼ unaj a chintal tu táanoʼobiʼ mix a chaʼik ka oksaʼak ta pool ka a adorartoʼobiʼ, tumen teneʼ Jéeoba a Diosen, in kʼáat ka adorartaʼaken chéen teen». In cuñado túuneʼ tu kʼáatajten: «Wa tiʼ Dios ku meyaj le imagenoʼob utiaʼal u beetik milagroʼob yéetel utiaʼal ka adorartaʼakeʼ, ¿baʼaxten túun tu yaʼalaj maʼ unaj k-chintal tu táanoʼobiʼ?». Le baʼax tu yaʼalaj in cuñadooʼ jach tu beetaj in tuukul. Desde teʼ kʼiin jeʼeloʼ jach jatsʼuts tin wilil in tsikbal tu yéetel tiʼ le baʼax ku yaʼalik le Bibliaoʼ, cada kéen tsikbalnakoʼon kaʼacheʼ hasta maʼ tin wilik u máan le kʼiinoʼ.

 Maʼ úuch tiʼ leloʼ tin láakʼintaj in cuñado teʼ tuʼux ku muchʼkuba u testigoʼob Jéeobaoʼ. Jach jaʼakʼ in wóol le ka tin wuʼuyaj tak le táankelmoʼob ku núukikoʼob maʼalob le baʼaxoʼob ku kʼáataʼaloʼ, tsʼoʼoleʼ chíikaʼan jach maʼalob u kaʼansaʼaloʼob. Kex chowak u tsoʼotsel in pool yéetel jelaʼan bix in vestirmilibaeʼ maʼalob bix tu tratartilenoʼob. Junpʼéel familiaeʼ hasta tu invitartenoʼob cenar le kaʼa tsʼoʼok le muchʼtáambaloʼ.

 Le ka káaj in xook yéetel le testigoʼoboʼ tin kaneʼ Jéeobaeʼ jach u yaabiltmoʼon kex óotsiloʼon, kex maʼ xooknajaʼanoʼoniʼ wa kex táanxel tuʼux k-taal (Hechos 10:34, 35). Desde le kʼiin jeʼeloʼ tin wuʼuyaj maas maʼalob bix yanilen tumen anchaj u biilal in kuxtal.

 Maas maʼalobchaj bix in kuxtal tumen xuʼul in tsʼuʼutsʼ chamal, in káaltal, in poochʼil yéetel in wayakʼtik baʼaloʼob kʼaastak. Xuʼul xan u lúubul in wóol yoʼolal le baʼaloʼob kʼaastak úuchten tin chichniloʼ.

 Bejlaʼeʼ tsʼokaʼan in beel yéetel kiʼimak in wóol tumen in wataneʼ jach u yaabiltmaj Jéeoba yéetel ku yilik u yáantken. Kin meyaj bey superintendente tiʼ circuitoeʼ yéetel kin xíimbaltik le sukuʼunoʼob utiaʼal in líiʼsik u yóoloʼob yéetel in kaʼanskoʼoboʼ. Dioseʼ tu tsʼáaj u biilal in kuxtal tumen jach maʼalob bix tu kaʼansilen yéetel le Bibliaoʼ.