Irmaeʼ kajaʼan Alemania yéetel óoliʼ 90 años tiʼ. Letiʼeʼ kaʼatéen tsʼoʼok u accidentar yéetel yaʼab u téenel tsʼoʼok u operartaʼal, le oʼolaleʼ maʼ tu páajtal u jóokʼol u tsikbalt u tʼaan Dios jeʼex kaʼacheʼ. Bejlaʼeʼ Irmaeʼ ku tsʼíibtik cartaʼob tiʼ u láakʼtsiloʼob yéetel tiʼ uláakʼ máaxoʼob u kʼaj óoloʼob utiaʼal u yaʼaliktiʼob baʼaxoʼob ku creertik. Yaʼab máaxoʼobeʼ jatsʼuts u yilkoʼob le baʼaxoʼob ku tsʼíibtikoʼ le oʼolal ku kʼáataʼaltiʼ baʼax kʼiin ken u túuxt uláakʼ. Tsʼoʼoleʼ ku túuxtaʼal mejen cartaʼob tiʼ utiaʼal u tsʼaʼabal u graciasil tiʼ yéetel utiaʼal u yaʼalaʼaltiʼ ka kaʼa tsʼíibnak. Irmaeʼ ku yaʼalik: «Lelaʼ ku yáantken utiaʼal u kiʼimaktal in wóol yéetel utiaʼal maʼ u xuʼulul in kaʼansik le máakoʼoboʼ».

 Irma xaneʼ ku tsʼíibtik cartaʼob utiaʼal le máaxoʼob yanoʼob teʼ asilooʼ. Letiʼeʼ ku yaʼalik: «Juntúul koʼolel tsʼoʼok u yantal u edabeʼ tu tʼanen ka tu yaʼalajteneʼ in cartaeʼ tu líiʼsaj u yóol ka kíim u yíicham. Tu yaʼaleʼ le cartaaʼ u líiʼsmaj tu Biblia yéetel yaʼab u téenel ku xokik. Uláakʼ juntúul koʼolel maʼ úuch kíimik u yíichameʼ tu yaʼale maas áantaʼab tumen le baʼax tin tsʼíibtoʼ ke tumen le baʼax tu yaʼalaj le sacerdoteoʼ. Yaʼab preguntaʼob yaantiʼ yéetel tu kʼáataj wa jeʼel u páajtal u taal u xíimbalteneʼ».

 Juntúul koʼolel u kʼaj óol Irmaeʼ bin kajtal táanxel tuʼux ka tu yaʼalaj tiʼ ka u túuxt cartaʼob tiʼ. Irmaeʼ ku yaʼalik: «Le koʼoleloʼ u líiʼsmaj tuláakal le cartaʼob in túuxtmajtiʼoʼ. Ka kíimeʼ tu tʼaanen u hijaeʼ ka tu yaʼalajteneʼ tu xokaj tuláakal le cartaʼob in túuxtmaj tiʼ u maamaoʼ yéetel tu kʼáatajten ka in túuxt cartaʼob xan tiʼ letiʼ».

 Irmaeʼ jach uts tu tʼaan u tsʼíibtik tiʼ cartaʼob baʼaxoʼob ku creertik. Letiʼeʼ ku yaʼalik: «Mantatsʼ kin kʼáatik tiʼ Jéeoba ka u yáanten. Kex maʼ tu páajtal in bin joonaj joonajileʼ kin beetik tuláakal le ku páajtal utiaʼal u seguer in meyajtik».