Gudxi laadu xi bizaaca dxi gúcaluʼ nahuiiniʼ.

Guleʼ ndaaniʼ guidxi Italia lu iza 1943. Naa ne ca bicheʼ biniisidu ndaaniʼ ti guidxihuiiniʼ. Bi’ni’ bixhozeʼ dxiiñaʼ lu layú ne guca carpinteru. Laabe ne jñaaʼ bisiniisicabe laadu ndaaniʼ religión católica.

¿Xiñee gúcaluʼ sacerdote yaʼ?

Dxi nahuiineʼ guizáʼ guyuuladxeʼ chaaʼ mixaʼ para gucaadiaʼgaʼ sacerdote que. Nabé guyuuladxeʼ modo riniʼbe ne guyuuladxeʼ ca ritual ni rúnibe. Raqué nga guyuuladxeʼ gacaʼ sacerdote. Dxi napaʼ 13 iza, yené jñaaʼ naa ndaaniʼ ti internadu ra rudiicabe cursu ca xcuidi para gácacaʼ sacerdote.

¿Ñee bi’ni’ estudiarluʼ Biblia tiempu gucuaaluʼ cursu que la?

Huaxiéʼ. Dxi napaʼ 15 iza bidii tobi de ca maestru que naa ti libru stiʼ ca Evangeliu, ra zeeda ca relatu ni caníʼ de modo bibani Jesús ne biindaʼ ni stale biaje. Dxi napaʼ 18 iza yendezaʼ Roma para chaaʼ scuela stiʼ ca católico, ra runi mandar papa. Raqué bineʼ estudiar latín, griegu, historia, filosofía, psicología ne teología. Neca ruzéʼtedu ni zeeda lu ca versículo stiʼ Biblia ne rucaadiágadu ora ruundacabe Biblia lu ca mixaʼ ni raca ca domingu, peru ni dxandíʼ la? qué runi estudiardu ni.

¿Ñee laaca bidiiluʼ clase tiempu bíʼniluʼ dxiiñaʼ ndaaniʼ seminariu que la?

Ni bineʼ raqué nga biiyaʼ ximodo gatachaahuiʼ dxiiñaʼ ni raca lugar que, peru laaca bisiideʼ de ca ley ni zeeda lu Concilio Vaticano II.

¿Xiñee maʼ qué ñuulá’dxilu’ ni raca ndaaniʼ yu’du’ que?

Purtiʼ biiyaʼ riuu yu’du’ que lade política, rudiicabe lugar guni ca sacerdote ne ca ni racané laacaʼ cosa ni cadi jneza ne cadi dxandíʼ stale de ca ni rusiidicabe que. Chiguzeeteʼ chupa de laacani, pa nadxii Dios binni ¿ximodo nga guni castigarbe laacaʼ ora maʼ gúticaʼ yaʼ? ¿Ñee dxandíʼ nga rinabaʼ Dios laanu iquiiñenu ti rosariu para gúninu reza ne guininu ngueca ca ngueca stale biaje la? *

¿Xi bíʼniluʼ yaʼ?

Dede cayuunaʼ gunabaʼ Dios gacané naa, guzieeʼ Biblia de Jerusalén, ni nacubi biree lu diidxaʼ Italiano ne bizuluáʼ biindaʼ ni. Ti domingu siadóʼ, laga cugaandaʼ lari ni bineniaʼ mixaʼ, guyé chupa hombre ra seminariu que. Gúdxicabe naa testigu stiʼ Jehová laacabe ne bizulú gunidu diidxaʼ. Jma de ti hora gunidu de ca ni zeeda lu Biblia ne ni ruzeeteni de religión ni dxandíʼ.

¿Xi guyuuláʼdxiluʼ de ca Testigu?

Bidxagayaaʼ purtiʼ nuucabe seguru de ni cusiidicabe, modo riquiiñecabe Biblia ne bi’ni’ citárcabe stale textu ni zeeda lu Biblia católico stinneʼ. Despué yeganna ti Testigu lá Mario naa. Guizáʼ gúpabe paciencia naa ne guiráʼ sábadu a las nueve de la mañana maʼ zuhuaabe ra puertaʼ seminariu que.

¿Xi guníʼ ique xcaadxi sacerdote que purtiʼ rigánnacabe lii yaʼ?

Runeʼ invitar laacabe lu estudiu rudii hermanu que naa, peru gucuaacabe ni casi guendariguite. Peru naa guizáʼ guyuuladxeʼ guiráʼ ca cosa sicarú ni caziideʼ que. Ti cosa ni biziideʼ nga xiñee rudii Dios lugar chuʼ guendaquéiquiiñeʼ ne yuubaʼ, ti tema ni nabé guca nagana para naa guieneʼ.

¿Ñee gudxi ca xaíque yu’du’ que lii gusaana de guni estudiarluʼ Biblia la?

Lu iza 1975 guyaaʼ Roma stale biaje para guinieeʼ de ni caziideʼ. Gucala’dxi’ ca xaíque yu’du’ que nucaaca’ naa niníʼ iqueʼ cadi jneza ni caziideʼ que, peru nin tobi de laacaʼ qué niquiiñecaʼ Biblia. Ngue runi, 9 de enero de 1976, bicaaʼ ti carta ra cusieneʼ chigusaanaʼ yu’du’ católico ne biseendaʼ ni guidxi Roma, chupa gubidxa despué bisaanaʼ seminariu que ne guyaaʼ primé reunión né ca testigu stiʼ Jehová. Gúcani ti asamblea ra guyé stale congregación. ¡Gadxé peʼ ni biiyaʼ raqué! Cada tobi naaze Biblia stiʼ ne cuyubi ca textu ni cuzeeteʼ hermanu ni cudii discursu que.

¿Ximodo biiyaʼ familia stiluʼ ni bíʼniluʼ que yaʼ?

Stale de laacaʼ guizáʼ bidxiichicaʼ. Peru gunnaʼ laaca cayuni estudiar tobi de ca bicheʼ Biblia né ca Testigu guidxi Lombardía, ti región ni riaana ladu guiaʼ de Italia. Yegannaʼ laabe, ne ca Testigu de raqué gucanecaʼ naa guidxelaʼ dxiiñaʼ ne ti lugar ra cuezaʼ. Iza queca gucaʼ testigu stiʼ Jehová.

¿Ñee raca arrepentirluʼ pur ni bíʼniluʼ ca la?

Qué ziuu dxi. Yanna huaxa runeʼ sentir nuaa’ gaxha de Dios, purtiʼ maʼ biziideʼ tuu peʼ nga laabe casi rusiidiʼ Biblia ne cadi casi rusiidiʼ binni guidxilayú ne yu’du’ católico. Yanna maʼ nuaa’ seguru dxandíʼ nga ni cusiideʼ binni.