Nabé runiná ca guendanagana nuu lu Guidxilayú laanu ne ribeecani gana laanu. Jma nagueenda runiti binni esperanza ora guizaaca xiixa desgracia. ¿Xi rizaacacabe yaʼ?

• Nuu tu maʼ qué riná guiníʼ ique xi zándaca guizaaca despué.

• Xcaadxi rapa viciu xhudxi o cubaʼ droga.

• Nuu chupa chonna binni riníʼ ique pur gana si nabánicaʼ ne nacaʼ: «¿Maʼ xi para nabaneʼ?».

• Zándaca qué zandaa ca guendanaga stiluʼ o málasi gaca chaahuiʼ ca ni.

• Neca qué gaca chaahuiʼ ca guendanagana stiluʼ peru zanda gúniluʼ xiixa para gudxiiluluʼ ca ni.

• Biblia cayabi laanu zaca chaahuiʼ guiráʼ guendanagana stinu.

Biblia ná: «Cadi lica chuʼtu xizaa xi gaca guixíʼ, purtiʼ guixiruʼ nga gúʼyatu xi cuʼ xizaa laatu. Guyuu conforme né ca problema si stiʼ cada dxi» (Mateo 6:34).

Cadi chuʼluʼ xizaa pur ca guendanagana ni zándaca gápaluʼ guixíʼ dede maʼ qué guni tenderluʼ ca cosa ni chigúniluʼ yannadxí.

Pa chuʼ xhaataluʼ xizaa pur ca cosa malu ni caʼruʼ guizaaca la? zuni estresar ni lii ne zabee ni gana lii.

Sicaríʼ gudxi ti hombre Dios: «Naca stiidxaluʼ ti lámpara para ñeeʼ ne ti biaaniʼ lu neza ra rizayaʼ» (Salmo 119:105). ¿Xi riníʼ ca diidxaʼ riʼ yaʼ?

Cásica riquiiñenu ti lámpara para guzaaniʼ neza ra zizanu huaxhinni, zaqueca racané ca conseju zeeda lu Biblia laanu para guicaanu decisión jneza.

Cásica racané ti biaaniʼ laanu guidúʼyanu xi nuu nezalunu, zaqueca racané Biblia laanu gánnanu xi ca cosa galán cabeza laanu despué.