KURA ABORO NAYA OÓ. Kura munganga sa abi mangasunge na agu arugute nga ga Ziazia Kekeapai wa ka boro ayugopai awere rogo gu buku nga ga chemistry i kusihe rogo gu garã nangia 1920. Agu aboro adunga na irisa tipa Ziazia Kekeapai ya rengbe ka sanahe singia mo rengbe ka mangasunge na gu waraga kompiuta garãha aima susa tipa si undoro mo mangisunge na gu vovo mbakadapai nga ga kompiuta du awere. Ka pepai rogo kura fugo, kura aboro nabi Ziazia Kekeapai ni gu buku adunga na undo ti ni berewe ya.

Tipagine si aida boro mangisunge ti ni na ngbatunga gu kuru kitabu re rogo gi zegino naima sona rogo inohe re? Gu kurapai berewe nga, badungu abangiriba du ho nga ga Internet aboro ageda vovo apai rogoho gbiati arugute. Abainipai, agu aboro wirikipai tipa berã aboro, abarumbatayo rogo apambori na abakeapai nafura dedede rogo aterevizioni. Na dungu abuku i abagaha du na apai rogoho tipa undo tise nga gu nakusa ndugu akutu adorari.

Na gi vovo apai naye ti mburu kuraha re, tipagine si aida boro ngere ti ni ku rogo Ziazia Kekeapai—nga gu buku i anyasi kehe agarã 2,000 kusayo? Ya mo si rengbe ka du nga rengo du aboro agumbaha nga gi kuru buku nga ga arugute re wakina mangasunge na kuru buku nga ga chemistry watadu mangasunge na gu waraga kompiuta garãha aima susa? Ni rengo, gu berãpai re ni irairaha. Agu apai nga ga aboro birĩ-inohe gbiati agu abirĩ ino mangaahe du awere na aria tihe ni ipo, ono ya mo agu apai du tipa aboro ima ariatihe? Aboro kindi naida ka ino ndu gupai i araka ti ni, gbiati ka du na ngbarago na zereda, wene ramukporo, gbiati wene abakure.

Wa vura du Ziazia Kekeapai ni kuruhe, si nafura tipa agu apai re gbiati kura apai. Si nagumba gupai a nga, baenge kehe nga Bakusirani. Si rengbe ka ngbe furani rogo gaani gene ngbatunga raka yo nabaha dunduko na ki mbakadi rani tipa agu akpakarapai dunduko du ho. (2 Timoteo 3:16, 17) Kurigure, regbo agu arugute re adigonga te—nga agu arugute garãha nikaa nyasanga ya! Ziazia Kekeapai ni tihe naya: “Bambiko gu pai nga ga Mbori du na unga.”—AEbere 4:12.

Ya mo gupai Ziazia Kekeapai agumbaha re rengbe ka du ni rengo nzunzu? Ya mo garãha aima susa watadu si nzunzu nga gu nyanyakipa buku—nga gu namangasunge amanga? Ndu kusa gi vovo Ngbaõbambu Sinziri re nga ka undo ro mo gbia akaragapai kuti agi asanahe re.