GU KEKEAPAI du mbata fu gere, nayugo wai rengbe kere gbegberẽ apai ka sa raka si du ni guhe ka boro ahi nga ha ya. Wa mo nikaa hi gamo akpakarapai, mo ima rengba ka bakabangiro singia rẽhe arẽ boro naaraka watadu singia boro ho naberãpa ro nzunzu. Mo du na gu kido nga Mbori naberãpa gamo akpakarapai aberã. Paro bangiriko ni nyanyakihe.

Bake Atambuahe 86 agumbapa gu kido ko adu na ni kuti Mbori nga: “Rago gi fudifudipai mi akpara fu kina ro, bambiko mo akaraga pai fere.” (Atambuahe 86:7) Ono mo ima rengba ka baka bangiro nga, ‘Wai du rengbe Mbori ka karagapai fere rago gimi “fudifudipai”?’

Wa vura duhe nga Mbori arengbanga ka dia gamo akpakarapai nibasa kusayo te, Fugoko nga Baibiri, nakido ro nga, ko ima rengba ka fu gu zereda nga ga kpotoseyo foro tipa si undo ro mo sovura kuti gamo akpakarapai: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (AFiripoio 4:6, 7) Ani nahõpai bero nga mo makianga wai agi averesi nga ga Ziazia Kekeapai re afu gu kido furani nga Mbori naberãpa rani aberã.

“Bangiri Mbori ago nga ti gu ru [bavurukporo] wa sa te. . . oni nga bahe ti dungu abavurukporo.”​—Ruka 12:6, 7.

MO MAKIANGA GIPAI RE: Rukutu wiri azire wa abavurukporo arengbanga ka du na nyanyaki para bangiri aboro te, ono Mbori naberãpa ra aberã. Mbori ima inopai tipa ra ni basasa; ami dunduko ni basasa nga rakiraki ahe. Aboro kiipa yo bangiri Mbori kisusi abavurukporo. Aboro nga nyanyaki papara ga Mbori kusikusiahe auru kpotosende, i ambakadi yo ni “kpiako” na i na rengba ka sonosa agu awene asino du tiko na kini yuguhe.​—Bambata Pai 1:26, 27.

“Ako Yekova, mo awisigi pa re, ki ini re!. . . . mo rugu tiro na pa gi berã . . . Mo asádi re, ki ini gimi berã pa apai!.”​—Atambuahe 139:1, 2, 23.

MO MAKIANGA GIPAI RE: Mbori ima ino pai tipa ro wenengai. Ko ima ino pai tipa gu gamo gbugbuapai du ku kpotoroyo na gamo abakabangirise. Kura aboro arengbanga ka inopai tipa gamo akpakarapai na abakabangirise te, ono Mbori naberãpa ro aberã na ko naida aida ka undo ro. Mbiko agi apai re, gamo raka kindi na nyanyakipaha.

“Ako Yekova, mo gί gi kpetambuahe, ki idi he gi kpe ku ari da koyo du mo ni! . . . Mo dége turo kono du mi ni; ni gu rago mi ka akpara foro mo káraga pai fere ni ipo! . . . ko agia gu kpetambuahe nga ga aboro ngera vurũ.”​—Atambuahe 102:1, 2, 17.

MO MAKIANGA GIPAI RE: Mbori ima ino pai tipa gu kpee ni aume aboro nakpari he ni basasa mbiko gayo arungo. (Atambuahe 56:8) Gipai re nakoda gamo aume akodaha a. Mbori natingidapa gamo arungo gbiati aume mbiko gupai nga paro ni nyanyakihe bangiriko.

“Ka mo kío nga ya, mbiko mi nga ga Mbori; mi anyákasa ro, mi aúnda ro . . . mi nga Yekova nga ga Mbori, . . . mi du naya foro, “Ka mo gúnde nga ya, mi aúnda ro.’”​—Yesaya 41:10, 13.

MO MAKIANGA GIPAI RE: Mbori nga regerege tipa ka undo ro. Ka mo ti sande, ko nika tumba ro atumba kuari.

“Bambiko Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”​—Yoane 3:16.

MO MAKIANGA GIPAI RE: Paro ni nyanyakihe bangiri Mbori, si du nasako ko du na nyemu kafu Wiriko nga Yesu ni motumo tipa ro. Gu motumo re nafu gu momu foro nga ga raka gu raka du na rogoyo ti ni na ngbarago nyeanye kindi. *