DU NI wene abakure nga nyanyakipa he, na nyenye pabakure ni gupai ayengo nisaha ya. Ka si du nga pabakure ngbapai yo, ginipai rengbe ka undo ka batasaha? Ani rengbe ka wirika badungu apai ti gu kura aboro nga aguyo furayo tipa yo rogo Ziazia Kekeapai yo nga aguyo nangia wene abakure ono kusa gayo pabakure kidu ngbapai yo.

Davide nangia bangerefuo akandoro na kidu ni bakindo, aduadu na wene abakureako ti ni. Yonatana nga boro sa dagba agu abakureako yo pani narengbe ka ye ku berãro yo. (1 Sam. 18:1) Ono Davide aduadu na kura abakureako ti ni, wa gu nebi nangia Natana. Ziazia Kekeapai afuranga nzunzu tipa gu regbo gayo pabakure atona ti ni te. Ono wa vura duhe wo, ti gu kura regbo sa, Davide apeke agu apai naadu ngbadukoyo fu Natana kina wai rengbe mo ka peka agu apai du ngbaduroyo fu bakureamo. Davide adu na nyemu ka dua bambu fu Yekova. Si nawira wa bakindo Davide aima bi gu bipai nga ga Natana na nyanyakipaha wa ko angia bakureako na kidu ni gu kumba naadu na ga Yekova toro tiko.—2 Sam. 7:2, 3.

Ono tie, pai akuru nga gu naaida ka gbarasa gayo pabakure. Bakindo Davide amangi barii na Bataseba na tingbafuo ho, ko ki mangi mbakadapai i imi kumbari nangia Uria. (2 Sam. 11:2-21) Tipa dungu agarã, Davide aima du ni ruruko fu Yekova na kini saringbanga ni ruruhe. Ono ko  kini mangi gi kere ingapai re! Ginipai du naasa gi wene bakindo re ko mangipai wo? Ya mo si rengbe kadu nga ko aabingo gu kerepai naadu ti gako mangapai te? Ya mo ko aberẽ gupai nga ko nika gbu agbu na ni ti Mbori?

Ginipai ka Natana amangihe? Ya mo ka ko ambu kura boro kia ni ye ka kusa gupai re fu bakindo? Kura aboro aima inopa wai Davide amangi mbakadapai tipa i imi Uria. Sidu tie, tipagine ka Natana arimisi tiko ti ni ku rogo gupai re na ki moi gu gayo pabakure nga gu naima dia dungu aregbo re ngbapai yo? Zavura gupai nga, si aima rengba ka maa ga Natana raka ngbapai yo ka ko afura tipaha. Gu garakaha agaraka nga, Davide aima imo boro wenesa nangia Uria.

Ono Natana angia gu boro naafura kuba Mbori. Gu nebi nangia Natana re aima ino gupai nga ka ko ongo aonga, gako pabakure na Davide adunga berewe wagu si adu mbata te na sangbakpotokoyo ni kaa fuda ko afuda. Bakureako nangia Davide aima manga gupai Yekova aaidanga na ni ya. Gu bakindo re aaida na undo ni kina boro ipo tipa ka mbakada gako pagume berewe na Yekova. Nirengo, Davide aaida na ndikidi bakure. Na Natana angia gu ngbatunga bakure re. Ko asia ka fura tipa gupai Davide amangihe re niye ko na gu kpiapai nga gu narengbe ka zio ngbadu gu kumba nangia babanda akandoro mbata re. Natana agumba gu pangbanga nangia ga Mbori ono rogo gu gene yo narengbe ka undo Davide ko bi gu kerepai naadu ti gupai ko amangihe re na si ki fõngbadukoyo ko mangipai.—2 Sam. 12:1-14.

Ginipai ka mo mangihe ka bakureamo mangi kere ingapai? Mo ima rengba ka berã gupai nga kusapa gani ingapai ima rengba ka gbarasapa gaoni pabakure. Watadu mo ima rengba ka berã gupai nga kusapa gani ingapai fu abaakumba, nga aguyo rengbe ka undo ni rogo toro yo, wakina samungu kuti gaoni pabakure. Ginipai ka mo mangihe?

Gianni i nifura tipa ko mbata kusayo aya: “Mi abi gupai nga ariapai ima manga. Maurizio aadunga gbaiga fere wagu ko adu mbata te. Mi adiberã ka fura na ko, wa si avura du nga si aima du ni ba mbumbuhe ka mangaha wo. ‘Mi aabaka bangire nga: Ginipai rengbe mi ka gumbaha fuko nga gu ko ata inongo pai tipaha ya? Gako karagapai sa ni ima rengba kadu ni kerehe!’ Ono ho mi aatingida agu apai ni dunduko ani awisigihe na ko wa sa, si afu ngarã fere mi fura na ko. Kina gu bangisapai re Maurizio amangihe ho mi aaida undo ni. Mi aaidanga gaani pabakure gberẽ te, ono mi aaida ka undoko bambiko mi aaberã pako aberã.”

Maurizio ape gupai berewe nga: “Gianni aduadu zukazuka na kina rengo du ko amangihe. Mi aima ino gupai nga, sangbana gimi gbegberẽ diaberã aangianga ga Gianni ingahe watadu ga Yekova te. Sidu, mi adi agu arugute kugume abaakumba afuhe na tingbafuo aregbo kusa mi ki da rogo toro yo berewe wenengai.”

Davide aduadu na kura abakureako ti ni nga aguyo naaru kugiiko ti regbo kpakaraapai. Boro sa bangbanda agu abakure re nangia Usai, nga guko Ziazia Kekeapai aya tiko “badia Dawidi.” (2 Sam. 16:16; 1 Peka 27:33) Si ima rengba kadu nga ko angia banyaki ngbanga yo kua bakindo yo na ni mbembedi bakurea bakindo, na ni gu boro ti kura aregbo naana manga gu ga bakindo arugapai nga gu naadu ni gbugbuhe.

Ho wiri Davide nangia Abisaroma adi mbatabakindo ni ngbaome, badungu aYisaraere aru kugii Abisaroma, ono Usai aamanganga ha wo te. Ho Davide aaora ni be Abisaroma, Usai andu fuoko. Rago aima gberã ti Davide ni kerehe mbiko kina boro wiriko gbiati gu boro ko aakido kuti ni naasamungu kutiko. Ono tie, Usai anye ni ruruko, na ni gu boro naima rengba ka maa gako raka ngbapai yo tipa ka manga gupai narengbe ka gbarasa ga Abisaroma buro. Usai aamanganga gipai re gbua mbiko gupai nga ko angia banyaki ngbanga yo kua bakindo yo te. Ko angia ndikidi bakure.—2 Sam. 15:13-17, 32-37; 16:15–17:16.

Si ni pangbarago ka bi wai du awirina areme na kodatise nga gu adunga mbiko kina gu sunge du  yo na ni rogo dungurati ya. Rogo gayo mangapai yo, si wa ka i ya i nape gupai nga, “Anga mi nga bakureamo mbiko si nga gupai si aida mi mangihe te, ono mbiko mo na nyanyaki paro fere.”

Si nga gupai namangi fu wirina sa du rimoko nga Federico. Ko adu na diabese ti regbo kpakarapai rogo gako raka yo mbiko gu undo nga ga bakureako nangia Antonio. Federico aya: “Ho Antonio ayego ni ku rogo gaani dungurati, si aimanga te ani ki da ni abakure. Ani dunduko nangia amoundo abaakumba, na ani aima gbia ngbarago ti mangasunge kina sa. Ngbutuko fuo gure, i amoi Antonio ni bakumba. Kupati gu nga du ko ni bawene bakureami, ko adu ni gu boro mi aaida ka wirika gani kpiapai rogo toro yo.” Fuoho Federico kini ka manga ingapai. Ko agbata undo rogo toro yo ni kina wiri ipo, ono ka ko arẽnga berewe kadu ni bazakigene watadu ni moundo abaakumba ya. Ginipai Antonio amangihe?

Federico ape gupai nga: “Mi aima bi gupai nga Antonio adu na rungo kpotokoyo tipa gupai namangi re. Ko aima asada ka undore mi du wenengai berãre yo. Ko adu na nyemu gupai nga mi du berewe wenengai rogo toro yo na ko aambunga re te. Ko angarasi re mi nyakasi tire berewe rogo toro yo na ka omere batingo ya.” Antonio aya: “Mi adi bakere regbo na Federico. Mi aaida ko fura fere tipa gako apai dunduko zanga na gunde, na zavura tipa gako rungo a.” Si ni pa ngbarago tie nga, kusa, Federico ada berewe nyanyaki rogo toro yo na kusa, i amoi ko berewe ni bazakigene na ni moundo abaakumba. Antonio adigisi fugoko ki ya: “Wa vura duhe nga ani namangasunge awere rogo adungurati ni bakiakia, ani nga wene abakure awere kisusi gu naadu mbata.”

Wai du rengbe mo kadu ka wene bakureamo sa gii ni kutiro tigu regbo mo aida ni gbe? Si du dagba agu apai yo naimisa boro kisusi. Ya mo mo ambupai funi? Ya mo gaoni pabakure adu ni nyanyaki he berewe wagu si adu mbata?

Mo berẽnga pa gupai namangi tipa Yesu ti regbo gako yangara arame auru kpotosende. Ko aima dia bakere regbo na gako ruru amokedi, na i adu na kodatise. Wene ndupai adu kina ho Yesu  anaayamba yo ti ni nga abadiangbako. (Yo. 15:15) Ono wa si avura duwo, ginipai namangi ho i aziko ni? Amokedi aoro patiko. Petero aima gumbaha gbaiga nga, ko ambunga Bairako te, ono rogo gu yuru re, Petero aoro rimo Yesu!—Mt. 26:31-33, 56, 69-75.

Yesu aima inoho nga ko nika gbiatiko na gako yangara asada nisako. Ono wa si avura duwo, ko aduadu na ndupai beko kadu na gberãrago. Ono gako fugodagbase na gako abawiriki bete aʹuru kusa tingbafuo zingako be kpio ayugongo gupai nga ko adu na gberãrago, zinga, watadu biratise te. Yesu aaberãnga gupai nga ko tangara agu aingahe nangia ga gako abawiriki kodihe na gu i amangihe rogo gu yuru i aziko te.

Kuba gure, Yesu akido Petero berewe na kura amokedi. Ko ayugu gupai nga ko kindi na kido kuti yo nifu ko arugapai fuyo tipa gu nyanyakipa sunge yugopai naamanganga mbata rogo gu pangbanga nga ga ga aboro raka yo ya. Amokedi adu kindi ni abakurea Yesu. Gako nyemuse aima du na nyenye sangbanaha kurii yo. I aambunga Bairayo berewe te. Nirengo, i aima du na diabese tingba gu sunge Yesu afuhe fu apefuoko.—Amo. 1:8; Koro. 1:23.

Wirina nga Elvira natingidapa gu regbo atingida kpakarapai adu bangbanda ri na nakurea ri nangia Giuliana, Elvira aya: “Ho ri ape gupai ni fere nga gupai mi amangihe aima imisa ri, rago agberẽ tire ni kerehe. Ri aduadu na rengo beri ka zinga. Ono gupai nazi ngbadureyo nga, ri adu na bakabangirise gbe tipa re na gu sangbanapai narengbe ka ye mbiko gimi mangaapai. Mi nikaa tambua ri kindi tipa wai ri aagbenga berãri kuti gu ingahe mi amangihe re ya, ono kuti gu gbarasahe mi aaye na ni kina kuti tire. Mi natambua Yekova tipa du mi na bakure wa gure, nga guri namaa agu apai du tipa re mbatayo fu gari.”

Nibi gipai re, wai du si aida wene bakure mangipai ho du gayo pabakure ni ngbapai yo? Si naida ni du na nyemu ka fura zezeredi ono kidu adu gbaiga ho si aidaha ni. Gu bakure re nika du wakina aNatana na Usai nga aguyo nanye ni ruruyo zavura ti regbo kpakaraapai, na kidu berewe wa Yesu naadu na nyemu ka mbupai. Ya mo mo nga ngbatunga gi bakure re?