“Mi aima tona nisungudi gipai re tipa agarã nga 19!” Ginipai wirinarani aasungudo ho? Gu Baibiri nga New World Translation of the Christian Greek Scriptures rogo gako fugo yo nga, Bengali. Badungu aboro ape kina ngbatungapai wa gure ho i akusi gu Baibiri ni nga New World Translation rogo gayo afugo yo. Ono ya mo mo aabakinga bangiro tipa agu apai si akodaha tipa ka sa agi aBaibiri re na ka kusaha?

 Ni bambatapai, i namaa gu badona nga ga safugo tiibe gu rugapai nga ga Gu Rondo Nabipa Sunge Kekeapai Nga ga Riigbu Bipasunge. Bagizo regbo wai si adiaha tipa i sa Baibiri? Nicholas Ahladis, nga gu ko namangasunge na Gu Basunge Nga ga Sapai Warwick yo, New York yo, aya: “Dungu apai kinaho si aidaha, kodihe na bange abasafugo wai duho tipa gu sunge re, pa wai kpakara gu fugo re, na pa bakio wai abagedi gu Baibiri re narugutiyo na pa wai raka adu ti agu aregbo i aake Baibiri ti ni, na singia i nape gu fugo re ni bakiakia rogo aba ni bakiakia. Dedede, si naadia abasafugo tona ti garã sa kuti agarã biata tipa i sa Vovo Ndika na si kini dihe wa agarã biama watadu kisusi gure tipa i sa Baibiri dunduko. Tipa agu aboro nape fugo nibee si nadia gbanga regbo adia.”

 Dungu apai kinaho si aidaha kisusi gu badona nga ga safugo. Si naida na badona aida nga ga agu aboro du apai tipa yo kia—na ti kura aregbo nga aguyo naraka rogo kura aringara—tipa i ngererii gu sasapai re, i nafu tiyo ka manga gipai re zanga i fu marã afu fuyo. Agu apai i nika pekaha nika undo abasafugo tipa i kusi gu Baibiri du ni ruruhe, du ziazia, na du na rogoyo ti ni. Gu kurapai berewe nga, a wa gu boro naraba aboro tipa sa Baibiri du South Africa yo agumbaha, “abasafugo na bakere tindiro kuriyo fu Yekova nafu agu aboro nageda Fugoko.”

 Fuo i nyasi sa Baibiri, i nakusaha na ki mbakadi baraha ku rogo ba sa. Tipa ka manga gupai re, si naida ahe kandara wa bawe tipa ka gbingbidaha: waraga, ime kepai, kpoto waraga, guhe nadiko he, guhe nazio kpoto waraga ku rogo ba sa i ayambaha nga cover liners, guhe i ambakada gu kpotoho du ku dimoyo rogoho nga silver leaf, na agu agire du bebere Baibiri yo nga ribbons, guhe akpe Baibiri asungo riihe i ayambaha nga headbands, guhe na zio ngongoho i ayambaha nga spine stiffeners, na gu kurahe i abingoho ya i ayambaha nga capping material naundo na gbingbida Baibiri ku rogo ba sa. Rogo 2019, i amangisunge na adorari naima susa amirioni 20 tipa ka ngbe agi ahe re tipa kusa Baibiri. Agu aboro du rogo gu biroo nga ga gbingbida abuku amangisunge tipa asaa naima susa 300,000 rogo gu garã re tipa ka kusa aBaibiri na ka kedaha.

 Tipagine ani amangasunge na bakere regbo gbiati marã ti ni wa gure tipa agu asunge re? Joel Blue namangasunge rogo International Printing Department aya, “Baibiri nga gu nyanyakipa waraga kisusi ani akusaha. Sidu, ani naida wai si angera naafu taarimo afu fu gu Mbori ani airisoko gbiati gu pangbanga ani atungusaha.”

 Kupati gu Baibiri nga New World Translation, ani nakusa agu akusa a du tipa agu aboro du apai tipa yo ni kparakparaha. Ni kpiapai, gu Baibiri nga New World Translation du tipa airavurari kinaho awere rogo afugo yo bawe. Tipa ka nyasa Baibiri sa nga ga airavurari si nadia asaa nga muambe tipa ka mangaha, na mbiko gupai nga si ima kio, gu ba rengbehe ka diaha si naida bagizoho susa ametere 2 (dagbandue saba na beberehe). Ani nakusa Baibiri akusaha a fu agu aboro du bambukiso yo nga gu ba i aida kina agu abuku rogoho du na rurungbura kpotoho.

 Gu Baibiri nga New World Translation na maapai kurii gu raka nga ga agu aboro nagedaha. Oni bingo gupai du tipa gu dungurati nape gu fugo nga Kiluba du rogo gu ba i ayambaha nga Tombe, du Democratic Republic of the Congo yo. Baturõ Tombe ti bakere gbata nga akirometere 1,700 (amairo 1,000). Baibiri gbua sa naadu be aDezire Yekova yo, na si adu rogo agu afugo Kiluba i akehe bakuru kusayo. Gu Baibiri naadu gbua sa re anaatanga atanga be awirina tipa wa ka i mbakadi papara adunguratise. Ono naatona rogo Buza 2018, aboro dunduko rogo dungurati aima gbia gu Baibiri nga New World Translation rogo taata afugoyo rogo Kiluba.

 Wirina nidee nape pa aboro Germani agumba gupai tipa gu Baibiri nga New World Translation du rogo gari fugo yo nga: “Mi agumbanga gupai berewe nga si naida mi gedi Baibiri te. Kuba gure, mi naasana tire nga, ‘Gini regbo rengbe mi ka gedaha ni bakerehe?’” Boro bambukiso akepai nga: “I afu gu Baibiri fere nga New World Translation, na si naˈaria gimi raka. Mi aagianga tire mbata na Fugo Mbori wenengai wa gu mi nagi tire na ni wa mi atona geda gi sasapai re te. Mi nakpinyemu ka ino dungu apai tipa aDezire Yekova na wai rengbe mi kada ni boro sa dagbayo yo.”

 Agu aboro dunduko nageda gu Baibiri nga New World Translation na bakere tambuahe tipa agu agamahe oni afuhe nga gu nasongoda pa kusaha. Agi agamahe i afuhe tipa gu sunge namanga rogo zegino dunduko re, gene sa dagba agu agene yo i afuhe ngbaha nga rogo donate.mt711.com. Tambuahe furoni tipa gaoni agamahe.