Diana, ni bisetlano ló artículo ni godudy, biduidybu cuent que por ni goyoʼbu ló galrrasaʼ gosaló gosochbu más. La Biblia diti riaani buñ gueʼ tidxó niis ni notz alcohol, per náni: «Diti tzoʼlo lad buñ ni reʼgolu vino» (Proverbios 23:20). Órni radudy midid rasoch buñ, xtol ngú, raxoʼ buñ, radíil buñ né saʼ, né dada raity xidal millón de buñ guirá íz. Pal buñ nasob xilitz la Biblia, diti nasacloyibu guirá ni ma bisetlano.

Ngú buny Diana né nigoreʼ nábu: «Biduidy cuent que galrrasoch diti biscueʼsni galrrasaʼ ni goyoʼya ló. Bisoba xilitz Filipenses 4:6, 7 ni ná: Diti tzoʼto ló galrrasaʼ por nitisi cós, ni gonyto ngú guininéto, guinabto lóo Dios. Guirá goxin, órni radudy midid rioʼya ló galrrasaʼ, raninéya Jehová né raabi láabu ximod cayó xian naʼ, cayoʼob xcalnabani né ma diti radzel xcalrriena xí goni... né gonaba que ñacnébu naʼ par nabeʼya guirá cós malcu ló xpensari. Órni raraa gueʼel, buni por nabeʼya láani tiplad. Ni goninéya Jehová gocnéni naʼ nabiʼya xí cós napa xalagary ñoni pensary ló cós ni diti napa. Goloʼya guica dipa ñeeya nís ni notz alcohol stoib, portín par naʼ más rasac ni noʼya goxt nigoreʼ né diti raniiny naʼ guisnita láani stoib».

Galyoxh nacni toibtica cós ni nigolú ragoʼ galrrioʼob né galnabann ronoʼ buñ. Per xilitz la Biblia labúu gacnéni lóono par diti tudyno ló galrrioʼob portín rasetlani tipnés cós ni rabeʼ ñeʼ galyoxh, xomod órni buñ raduidy xomod a stoib buñ o rasaló rabiʼ pornografía. Toib mbioxhlas buñguieeu ni laa Samuel ná: «Diti gosac nagana nadudi xomoda mbioxhlas... rioʼ ór diti bioladxi layibu, per biduidy cuent que layibu bioladxyibu naʼ né ngú buny que gosaca sacró». Bidxin midid guirá buñ góoch láabu que nigolú raduidybu xomodbu mbioxhlas, ná rioʼ ór diti cayonybu láani, por ngú Samuel ma nompa buny láani, per xcalrriembu bisioʼob láabu. Nigoreʼ nábu: «Órni buny raduidy xomod, mal láani. Ronyni que binaity nosi tzoʼ ló galrrasaʼ por cós ni caquiin».

Samuel bíil toib artículo par mbioxhlas ni noʼ ló Internet jw.org. Láaca bunybu pensary ló Proverbios 20:11, ni ná: «Dada toib mbiox raduidy diitz mod nac por mod ronybu, pal nacbu buñ nayaa né buñ ni rony xinésni». ¿Ximod gocné litz reʼ láabu? Samuel biduidy cuent que ni raduidybu xomodbu, raduidyni diitz que diti nayaabu né diti xinésni cayonybu. Nábu: «Biduidy cuent que ni rony modcu diti sapbu respet tzeelbu. Né buni xpensari ximod nasac buñgonaʼ ni gac tzeʼela pal nabiʼbu naʼ cadudi xomoda stoib buñgonaʼ. Ngú buny que naduidy cuent que mal gony buñ scú. Diti nagan guiduidy buñ xomod, per ndeʼ diti raduidy diitz que galán láani». Samuel bitzaʼ mod góc, né ngú gocné láabu par diti ñabbu ló galyoxh.

Antonio mersi ñab ló toib cós ni más xiroʼ, portín nigolú bioladxbu pornografía. Ná nigolú binladxbu tzeelbu, ratca ór bibiʼbu pornografía. Nábu que ni gocné láabu ngú 1 Pedro 5:8, ni ná: «Colcoʼ xcalrriento, ¡nanísi colguiguaʼ! Xi enemigto, Buñdzab, casaa xomod toib betz ni cacaʼ rudx, ni cayopy ni guá». Antonio ná: «Pór pornografías nagoo lóono, guirá ndeʼ riaʼanni ló xpensaryno. Versículoca gocnéni naʼ nadudi cuent chú ná guisiab naʼ ló galkié. Buni por nasetnaladxi que guirá cós buidyca sieedni de Buñdzab. Nigoreʼ naana que nosi Jehová labúu gacné naʼ gaca buñ ni noʼ xcalrrien né guiguanáya par gapa xpensari, xcalnabani né xcaltzeela». Antonio cuaʼ galrracné né bisiambu mod yoxcu. Por ni bisiambu láani, diti biabbu ló stipnés galnagandaʼ.

Riendxichni que la Biblia nap litz ni labúu gacné lóono par diti guiabno ló stipnés galnagan. Per ¿né pal racxiroʼ galnagan ni noʼno ló né diti radzel xcalrrienno xí gonyno ga? Guisuidyno ximod Xtiitz Dios labúu gacné lóono ór cú.