¿Xigony diti racapy Dios guirá oración?
Jehová, Bixiosno ni noʼ guibá, rioladxbu guicadiagbu órni raninéno láabu né guidopy xcalnabanyno. Per Dios diti racapybu guirá oración. ¿Xigony? ¿Xí raquiin guisetnaladxno órni gonyno oración? Bibiʼ ni ná la Biblia.
«Órni gonylo oración, diti guiniʼlo ngúca ngúca xidal buelt» (Mateo 6:7).
Jehová diti rioladx gonyno oración de memory nili golno láani ló toib libro. Raniiny láabu guinino ni noʼ lainy xcalnabanyno. Bunysi pensary que ximiglo guirá dzú raibybu ngúca ngúca looy. ¡Diti sacró nasaclo! Buñ ni radzak saʼ, guirá ór rooy diitz né raniʼ ni noʼ lainy xcalnabany. Órni raibyno Dios ni noʼ lainy xcalnabanyno caslooyno láabu que nacbu ximigno.
«Órni ranabto, diti racaʼto, portín ranabto par gonyto cós mal» (Santiago 4:3).
Diti labúu cuésno guicapy Dios lóono pal ranabno cós ni nanno que diti rioladxbu. Por ejemplo, buny pensary que toib buñ caguit par gony gan bidxiich né ranabbu Dios gacné láabu. ¿Sacapy Jehová oración xtunybu janlo láabu ma goniʼbu que diti non guisobladxno bidxiich nili gonyno crer ló suert la? (Isaías 65:11; Lucas 12:15). Diti labúu gapno confianz guicapy Jehová oración de clascu. Par labúu guicapy Dios lóono, non gandxichno pal oración ni cayonyno noʼni de acuerdo né ni nábu né ni ná la Biblia.
«Pal noʼ ni diti ná guisob ni ná ley, dada Dios diti rioladx oración xtunybu» (Proverbios 28:9).
Ló dzú ni cuá la Biblia, Dios diti bicadiag oración xtuny buñ ni diti bisob xileybu, né ló naareʼ láaca scúca ronybu (Isaías 1:15, 16; Malaquías 3:6). Pal raniiny guicapy Dios lóono, non gonyno por guisobno xileybu. ¿Né pal bunyno toib galkié ló dzú ni see ga? ¿Radudyni diitz que Jehová ma dipa sacadiag lóono la? Yaca, diti nacni scú. Dios puextca noʼbu guitudybu xcalkiéno pal raslooyno láabu que ma góc arrepentirno né ronyno dada rutirigaʼlni lóono gonyno xchiimbu (Hechos 3:19).
