¿XIMOD GUICHOCNO LÓ GALRRIANLADX?
4 | Biyopy xcalrracné Dios
La Biblia ná:
«Buñ ni nap cualidad xtuny espíritu nap galnadxiʼ, rabaladx, nabany goxt, nap paseins, nac buñtzay, nap galrronladx, nap fe, nac buñ nadaʼa, rony mandarybu láacabu» (GÁLATAS 5:22, 23).
¿Xí radudyni diitz?
Labúu guichocno ló galrrianladx né xcalrracné Dios. Espíritu santo labúu gacné lóono gapno cualidades ni rolooyni diti labúu ñapno. Por ngú, xalagary guichocno ló galrrianladx por stiplóocano, más galán guinabno xcalrracné Dios. Pal ronyno ngú, sasaclono modca gosaclóo apóstol Pablo. Láabu bicaʼbu: «Náapa fuers par goni nitisi cós, portín Dios radudy galnadip naʼ» (Filipenses 4:13). Né modreʼ labúu guinino: «Xcalrracnéya sieedni de Jehová» (Salmo 121:2).
Buny por gonylo ndeʼ:
«Dzú see góca toib buñ mal […]. Per Jehová gocné naʼ ñaca buñtzay» (WALDO).
Gonab lóo Jehová né guidopy xcalnabanylo par guidudybu espíritu santo looy né gacnébu looy gaplo cualidades sacróyen (Lucas 11:13). Par labúu cueʼlo galrrianladx lainy xcalnabanylo raquiin gandxiʼlo saʼlo, guibanylo goxt, gaplo paseins né gony mandarylo looyca. Bisuidy xi ná la Biblia de tigaaga cualidades reʼ né biyopy mod guislooylo láani. Láaca nigolú rasac guidzaklo buñ ni nap cualidades de clas reʼ, portín layibu labúu sacnéyibu looy guislooylo galnadxiʼ né gonylo cós tzaay (Hebreos 10:24).
