Tika Lok ma Lunebi Gutito Con i Kom Meciya Moko ni Yecu Aye Meciya?

TUKI

Lagam ma Baibul miyo

Ada, moko. I kare ma Yecu tye i lobo, Yecu ocobo lok ma lunebi mapol gutito i kom ‘Dano ma Kiwiro ma en Laker,’ dok bibedo “Lalar me lobo.” (Daniel 9:25; 1 Jon 4:14) Kadi wa i nge tone, Yecu pud omedde ki cobo lok pa lunebi i kom Meciya.—Jabuli 110:1; Tic pa Lukwena 2:34-36.

Nyig lok ni “Meciya” tyen lokke ngo?

Nyig lok me leb Ibru ni Ma·shiʹach (nyo Meciya) rom ki me leb Grik ni Khri·stos (nyo Kricito) dok nyig lok aryo-ni ducu gonye ni “Ngat ma Kiwiro.” Man nyuto ni, “Yecu Kricito” tyen lokke ni “Yecu ma En Aye Ngat ma Kiwiro,” nyo “Yecu ma En Meciya.”

I kare me Baibul, ka kitye ka wiro ngat moni pi tic mo ma pire tek, onongo kionyo moo i wiye. (Lulevi 8:12; 1 Camuel 16:13) Lubanga aye owiro Yecu me bedo Meciya—dok man obedo tic mo ma pire tek adada. (Tic pa Lukwena 2:36) Kadi bed kit meno, me ka wiro Yecu ki moo, Lubanga owirre ki cwiny maleng.—Matayo 3:16.

Tika lok ma lunebi gutito i kom Meciya onongo twero cobbe i kom jo mapol?

Pe. Kit macalo lain nyig cing ngat moni pe twero bedo rom ki pa ngat mukene, lok pa lunebi me Baibul i kom Meciya bene onongo loko i kom ngat acel keken, ma en aye Kricito. Kadi bed kumeno, Baibul cikowa ni “Kricito ma lugoba kacel ki lunebi-gu ma lugoba gibibino, gibinyutu lanyut kacel ki tiyo jami me tango, wek girweny jo mapol ka gitwero, wek girweny wa ki jo ma Lubanga oyero bene.”—Matayo 24:24.

Tika Meciya pud bibino wa i anyim?

Pe. Baibul otito con ni Meciya bibedo lakwar Kabaka Daudi me Icrael. (Jabuli 89:3, 4) Ento rekod ma nyuto likwayi pa Daudi dong pe, nen calo kibalo woko i kare ma Luroma gujwero Jerucalem i mwaka 70 K.M. a Nicakke i kare ma gujwero Jerucalem, onongo dong pe kitwero moko anga ma a ki i doggola pa Daudi. Ento rekod meno onongo pud tye i kare ma Yecu tye i lobo, dok kadi wa lumonene onongo pe gitwero kwerone ni en obedo lakwar Daudi.—Matayo 22:41-46.

Jami mapatpat adi ma nonge i Baibul ma lunebi gutito ni bicobbe i kom Meciya?

Pe watwero waco welle kikome. Pien, me labolle, kit ma dano gikwano kwede wel jami ma lunebi gutito i kom Meciya patpat. Lok ma kicoyo i Icaya 53:2-7 nyuto jami mapatpat ma onongo bicobbe i kom Meciya. Jo mogo gikwano lok ma kicoyogi-ni ducu ni gin acel ma kicoyo ni bicobbe i kom Meciya, ento jo mukene dok gikwano ni meno jami mapatpat ma onongo bicobbe i kom Meciya.

Lok pa lunebi ma ocobbe i kom Yecu

Lok pa lunebi	Ka ma kicoyo iye	Kit ma ocobbe kwede
Lakwar Abraim	Acakki 22:17, 18	Matayo 1:1
Lakwar Icaka, wod pa Abraim	Acakki 17:19	Matayo 1:2
Bia ki i kaka me Juda	Acakki 49:10	Matayo 1:1, 3
Bia ki ot ker pa Kabaka Daudi	Icaya 9:7	Matayo 1:1
Nyako ma peya ongeyo laco aye binywalle	Icaya 7:14	Matayo 1:18, 22, 23
Kibinywalle i Beterekem	Mika 5:2	Matayo 2:1, 5, 6
Kibicako nyinge ni Immanuel b	Icaya 7:14	Matayo 1:21-23
Kibinywalle i gang ma rwomme lapiny	Icaya 53:2	Luka 2:7
Kibineko lutino mapol i nge nywalle	Jeremia 31:15	Matayo 2:16-18
Kibilwonge me a woko ki i Ejipt	Kocea 11:1	Matayo 2:13-15
Kibilwonge ni Lanajaret c	Icaya 11:1	Matayo 2:23
Kibicwalo lakwena pire ma peya en obino	Malaki 3:1	Matayo 11:7-10
Kibiwirre macalo Meciya i mwaka 29 K.M. d	Daniel 9:25	Matayo 3:13-17
Lubanga bilwonge ni Wode	Jabuli 2:7	Tic pa Lukwena 13:33, 34
Bibedo ki arima madwong pi ot pa Lubanga	Jabuli 69:9	Jon 2:13-17
Bitito lok me kwena maber	Icaya 61:1	Luka 4:16-21
Ticce me pwony i Galilaya bibedo macalo dero ceng madit	Icaya 9:1, 2	Matayo 4:13-16
Bitimmo tango calo Moses	Nwoyo Cik 18:15	Tic pa Lukwena 2:22
Calo Moses, en bene bititiwa tam pa Lubanga	Nwoyo Cik 18:18, 19	Jon 12:49
Bicango two pa jo mapol	Icaya 53:4	Matayo 8:16, 17
Pe biywayo tam pa dano i kome	Icaya 42:2	Matayo 12:17, 19
Kica bimakke i kom jo ma can obwoyogi	Icaya 42:3	Matayo 12:9-20; Marako 6:34
Bingolo kop atir calo Lubanga	Icaya 42:1, 4	Matayo 12:17-20
Bibedo Lami Tam ma Kiuro	Icaya 9:6, 7	Jon 6:68
Bitito pi nying Jehovah	Jabuli 22:22	Jon 17:6
Bilok kun tiyo ki lapor mapol	Jabuli 78:2	Matayo 13:34, 35
Bibedo Latela	Daniel 9:25	Matayo 23:10
Dano mapol pe biye en	Icaya 53:1	Jon 12:37, 38
Bibedo macalo got ma weko dano yokke	Icaya 8:14, 15	Matayo 21:42-44
Dano mapol bikwere woko	Jabuli 118:22, 23	Tic pa Lukwena 4:10, 11
Kibidage labongo tyen lok mo	Jabuli 69:4	Jon 15:24, 25
Bidonyo i Jerucalem ki deyo madit dok ma obedo i wi kana	Jekaria 9:9	Matayo 21:4-9
Lutino gibipakke	Jabuli 8:2	Matayo 21:15, 16
Bibino i nying Jehovah	Jabuli 118:26	Jon 12:12, 13
Lareme ma en geno aye bidobbe	Jabuli 41:9	Jon 13:18
Kibidobbe pi cekel 30 me ryal e	Jekaria 11:12, 13	Matayo 26:14-16; 27:3-10
Lureme gibiwekke woko	Jekaria 13:7	Matayo 26:31, 56
Lucaden ma lugoba gibikelo lok goba i kome	Jabuli 35:11	Matayo 26:59-61
Pe bigamo dog jo ma gukelo adot i kome	Icaya 53:7	Matayo 27:12-14
Kibingulo laa i kome	Icaya 50:6	Matayo 26:67; 27:27, 30
Kibigoyo wiye	Mika 5:1	Marako 15:19
Kibipwodde	Icaya 50:6	Jon 19:1
Pe bijemo i kom jo ma goye	Icaya 50:6	Jon 18:22, 23
Luloc me gamente gibipiro lok i kome	Jabuli 2:2	Luka 23:10-12
Kibiguru cinge ki tyene i kom yat	Jabuli 22:16	Matayo 27:35; Jon 20:25
Kibibolo kwir pi bongone	Jabuli 22:18	Jon 19:23, 24
Kibikwanne i kin lubalo	Icaya 53:12	Matayo 27:38
Kibingalle dok kibiyette	Jabuli 22:7, 8	Matayo 27:39-43
Bideno can pi lubalo	Icaya 53:5, 6	1 Petero 2:23-25
Binen calo Lubanga oweke woko	Jabuli 22:1	Marako 15:34
Kibimiye kongo mawac ki kwir makec ni omati	Jabuli 69:21	Matayo 27:34
Orwo pii binekke ka dong cok to	Jabuli 22:15	Jon 19:28, 29
Bimiyo kwone i cing Lubanga	Jabuli 31:5	Luka 23:46
Bimine kene me to	Icaya 53:12	Marako 15:37
Bikokowa ki i bal	Icaya 53:12	Matayo 20:28
Pe kibituro cogone mo	Jabuli 34:20	Jon 19:31-33, 36
Kibicobbe	Jekaria 12:10	Jon 19:33-35, 37
Kibiyikke i kin lulonyo	Icaya 53:9	Matayo 27:57-60
Kibicere woko ki i kin jo muto	Jabuli 16:10	Tic pa Lukwena 2:29-31
Kibileyo ka wang ngat ma odobbe-ni woko	Jabuli 109:8	Tic pa Lukwena 1:15-20
Bibedo i nget Lubanga tung cinge me lacuc	Jabuli 110:1	Tic pa Lukwena 2:34-36

a Buk me Cyclopedia ma McClintock gin ki Strong aye gucoyo waco ni: “Akalakala mo pe ni rekod ma nyuto kaki me Juda kacel ki doggolagi ducu onongo pud tye ma peya kijwero Jerucalem, ento dong orweny i nge jwerone.”

b Nying me leb Ibru ni Immanuel, ma tyen lokke ni “Lubanga Tye Kwedwa,” nyuto tic pa Yecu macalo Meciya. Bedone i lobo kacel ki ticce onongo nyuto ni Lubanga tye kacel ki jo ma wore.—Luka 2:27-32; 7:12-16.

c Nyig lok ni “Lanajaret” oa ki i nyig lok me leb Ibru ni neʹtser, ma gonye ni “jang yat.”

d Me nongo ngec mapol ma moko ni Meciya obino i mwaka 29 K.M., nen pwony ma wiye tye ni “Kit ma Lanebi Daniel Otito pi Bino pa Meciya Con.”

e Kicoyo lok man i Jekaria, ento Matayo owaco ni meno “lok ma yam lanebi Jeremia oloko.” (Matayo 27:9) Nen calo i kare mo, buk pa Jeremia onongo tye i kin bukke ma kilwongogi ni “Lunebi.” (Luka 24:44) Dong gwok Matayo olwongo bukke magi ducu ni lok pa “Jeremia” dok buk pa Jekaria bene tye i kin bukke magi.

Itwero Bedo ki Miti i kom Lok Man

WI LUBELE

Yecu Gin Mumiyo En Oto

LAPENY MA KIGAMO ME BAIBUL