OZUMALƐDƖYƐ 2
Aninyia Dɩyɛ Yɛ Lɛ Nyamɩnlɩ a?
1. Mɩnla ti mɔɔ ɩsɛ kɛɛ yɛsʋ̃mɩ Nyamɩnlɩ a?
Nɔhʋanlɛ Nyamɩnlɩ yɩ yɛ ɩdɩ nninyeni munwaa Ɩwɔlɛvʋlɔ a. Íni ahyɛasɩ na ilényia awielɩyɛ sʋ̃ kyɩ̃. (1 Timoti 1:17) Odwokɔba mɔɔ yɛnwʋ yɩ wɔ Bayɩbʋlʋ yɩ nu nɩ ɩzʋ̃ yɩ ɛkɛnɩ. (1 Timoti 1:11) Iluwakɛɛ Nyamɩnlɩ yɛ ɩmanlɩ nnwʋanlɩ yɛ nɩ ti, ɩsɛ kɛɛ yɛsʋ̃mɩ yɩzayɩ nkʋ̃ kyeinyii.—Kɩnga Yikile 4:11.
2. Nyamɩnlɩ, kɛ ɩdɩ ise a?
Enii bela íni ɛkɛnɩ mɔɔ ɩnwʋ Nyamɩnlɩ kyɩ̃, iluwakɛɛ ɩdɩ Sunzuma. Eyi ikile kɛɛ ɩwɔ tumi ɩtɛla mmenii mɔɔ bɔwɔ nnwʋnlamɩ wudo mɔɔ bɔwɔ azɩlɛ yɩ zʋ nɩ. (1 Dwɔɔnʋ 4:12; Dwɔɔnʋ 4:24) Naasʋ̃, sa yɛkʋla yeduwa nninyeni mɔɔ Nyamɩnlɩ ɩwɔ yɩ zʋ yɛnwʋ yɩ subanɩ. Kɛ ndianwʋ nɩ, nnuwalɩba nɩɩ fɩlawɛsɩ azʋlɔtʋ mɔɔ ɩwɔ nɩ ɩma yɛnwʋ yɩ kɛɛ ɩwɔ ɔlɔlɛ nɩɩ nɣɛlɛbɛ. Kezimɔ oyuwadɩ eyi ɩdɩ kezile nɩ ɩma yɛnwʋ yɩ kɛɛ ɩwɔ tumi.—Kɩnga Wulomimaa 1:20.
Yɛkɔhʋla sʋ̃ yekozuma Nyamɩnlɩ yɩ subanɩ nwʋ dɩyɛ sʋ̃maa iluwa Bayɩbʋlʋ mɔɔ yɛkɛɣɩnga yɩ nɩ zʋ. Kɛ ndianwʋ nɩ, ɩkã nninyeni mɔɔ Nyamɩnlɩ ɩpɛyɩ nɩɩ mɔɔ ɩábɛyɩ, kezimɔ ɩnɩ enii di, nɩɩ kezimɔ ɩyɛ yɩ dɩyɛ wɔ odwokɔ bela mɔɔ isi nwʋ.—Kɩnga 1 Dwɔɔnʋ 4:8; Gyemisi 4:6.
3. Asʋ̃ Nyamɩnlɩ ɩwɔ dima a?
Gyisɛsɩ ɩhanlɩ kɛɛ: “Yɛ Zɩ mɔɔ ɔwɔ sʋlɔ, ma yɛva annidi yɛwɔ́ wu dima.” (Matiyu 6:9) Yɛávalɩ ɔnwʋmɔ kɛɛ Nyamɩnlɩ ɩwɔ abodini azʋlɔtʋ sʋ̃maa nɩ, yi dima ɩdɩ ɔkʋ̃ kyeinyii. Wɔ ɛdɩndɛlɛ bela nu nɩ, ɔsʋ̃nɩ kezimɔ bɔbɔ dima yɩ nɩ. Wɔ Aɣɩnda nu nɩ, bɔbɔ dima yɩ nɩ kɛɛ “Gyehova.”—Kɩnga Psalm 83:18, NW.
Bɛyɩɩ Nyamɩnlɩ yi dima wɔ Bayɩbʋlʋ sʋ̃maa zɛ nu na bɛva abodini Niibenyia anzɛnyɩɩ Nyamɩnlɩ beziye iagyia nu. Naasʋ̃ wɔ mmɩlɩ mɔɔ bɛhɛlɛlɩ Bayɩbʋlʋ yɩ nɩ, nɩ Nyamɩnlɩ yi dima mɔɔ ɩwɔ numɔ nɩ ɩkɛyɛ 7,000. Gyisɛsɩ ihileli mmenii nɔhʋanlɛ mɔɔ ɩfalɩ Nyamɩnlɩ ɩnwʋ mɔɔ nɩ yi dima ɩkɩnla ɔnwʋmɔ.—Kɩnga Dwɔɔnʋ 17:26.
Kilá vidiyo mɔɔ ise Asʋ̃ Nyamɩnlɩ Ɩwɔ Dima a?
4. Asʋ̃ Gyehova ɩdwɩnɩ yɛ nwʋ a?
Dɩkɛ ɛzɩlɛ eyi mɔɔ ɩwɔ ɔlɔlɛ nɩ, Nyamɩnlɩ ɩyɛɛ mɔɔ ɩkɔhʋla bela na ama yɛazi yɛ bʋwɔ eɣile bela
Asʋ̃ amanɩyɛ mɔɔ yɛnwʋ yɩ wɔ oyuwadɩ yɩ dɩka bela nɩ ikile kɛɛ Gyehova ɩdɩ Nyamɩnlɩ mɔɔ ɩádwɩnɩ yɛ nwʋ a? Mmenii be bɛkã kɛɛ mɛyɩ yɛɛ ɩma yɛ nwʋ amanɩyɛ na ɩava iadwe yɛ iahila, naasʋ̃ eyi ɩ́dɩ nɔhʋanlɛ.—Kɩnga Gyemisi 1:13.
Nyamɩnlɩ ɩva abiyela ɩpɛ ɩma yɩ. Asʋ̃ yɛanyɩ azɔ yɩ kɛɛ Nyamɩnlɩ ɩma yɛzayɛ fawʋnwʋdi mɔɔ yɛkɔhʋla yekezi pɔkɔ kɛɛ yɛkɔzʋ̃mɩ yɩ a? (Egyima 4:19, 20) Naasʋ̃ mmenii sʋ̃maa si pɔkɔ kɛɛ bɛkɛyɛ nninyeni tanɩ bekediyia mvʋlɔ, eyi ti, ɩma mmenii sʋ̃maa zɛ bɔnwʋ amanɩyɛ. Ɩyɛ Gyehova aɣɛlɛbɔ kɛɛ ɩkɔnwʋ ɔzɔ nsisi yɩ nɩ.—Kɩnga 1 Pita 5:7.
Gyehova ɩdɩ Nyamɩnlɩ mɔɔ ɩdwɩnɩ yɛ nwʋ. Ɩpɛyɩ kɛɛ yɛ anyɩ ide wɔ ɛbɩlawɔlɛ nu. Ɩlɛ́kyɛ, ɩbɛayɩ amanɩyɛnwʋnlɛ nɩɩ mmenii mɔɔ bɛfa amanɩyɛnwʋnlɛ bɛba yɩ nɩ wɔ ɛkɛnɩ. Naasʋ̃ kakɩ yɩ mɛyɩ, ɩwɔ sianti baaba be ti mɔɔ ɩma amanɩyɛnwʋnlɛ nwʋ ɔhʋanɩ wɔ mmɩlɩ ɛgyɩkɩ̃ɩ̃ yɩ nu. Yekozuma ɔzɔ sianti eyi nɩ wɔ Ozumalɛdɩyɛ mɔɔ ɩtɔ ɔzʋlɔ 8.—Kɩnga 2 Pita 2:9; 3:13.
5. Kɛ ɩkɛyɛ na yɛaɣike Nyamɩnlɩ a?
Gyehova ɩtʋ salɛ ɩfʋlɛ yɛ kɛɛ yeɣike yɩ iluwa ɛdɩndɛlɛ mɔɔ yɛnɩ yɩ kɛdɩndɛ wɔ mpayɩwɔlɛ nu. Ɩanyɩ ideli yɛ nwʋ nkʋ̃kʋ̃ nkʋ̃kʋ̃. (1 Dwɔɔnʋ 5:14) Ɩwɔ ɛpɛ kɛɛ ɩkɛva yɛ tanɩ ɩkɛhyɛ yɛ. Ɩ nwʋ mmɔdɩnɩ mɔɔ yɛbɔ kɛɛ yɛkɔzɔ ɩanyɩ yɛávalɩ ɔnwʋmɔ kɛɛ ɩyɛ a, yedi mfʋmɩ nɩ. Meti ɩwɔ onumɔ kɛɛ yɛáli munli dɩyɛ, naasʋ̃ sa yɛkʋla yɛnɩ Nyamɩnlɩ nyia abusunwawɔlɛ mɔɔ onumɔ yɛ ɛzɩzɩbɛ.—Kɩnga 1 Dwɔɔnʋ 1:9; Gyemisi 4:8.
Iluwakɛɛ Gyehova yɛɛ ɩma nnwʋanlɩ yɛ nɩ ti, ɩsɛ kɛɛ yɛdɔ yɩ yɛtɛla abiyela. (Maakɩ 12:30) Mmɩlɩ mɔɔ ekile kɛɛ ɔdɔ Gyehova iluwa ɩnwʋ dɩyɛ sʋ̃maa mɔɔ okozuma nɩɩ ɛyɛlɛ mɔɔ ɛkɛyɛ mɔɔ ɩkã bela nɩ, sa ebike yɩ baaba paa.—Kɩnga 1 Timoti 2:4; 1 Dwɔɔnʋ 5:3.
