«Улус нениҥ учун божоп турган?» — деп сурак, кӧп улуста чыгып јат. Анчада ла бу сурак, биске јуук кижи божозо, чыгат. Агару Бичикте: «Кинчектиҥ чактырмазы — ӧлӱм» — деп айдылат (1 Коринфтегилерге 15:56, ЈТ).

Нениҥ учун ончо улус кинчектӱ болуп калган ла божоп турган?

 Баштапкы улус, Адам ла Ева, Кудайга удура кинчек эткенинеҥ улам, јӱрӱмин јылыйтып салган (Башталганы 3:17—19). Кудайга удура тӱймеен кӧдӱреле, улус божоп турар болуп калган, нениҥ учун дезе јӱрӱм — Кудайдаҥ болот (Сарын 36:9; Башталганы 2:17).

 Адам деп кижи бала-барказына толо кеминде эмести ле кинчекти берген. Агару Бичикле болзо: «Кинчек телекейге бир кижи ажыра келген, кинчек ажыра ӧлӱм келген. Анайып ончо улус ӧлӱмдӱ боло берген, нениҥ учун дезе ончозы кинчек эткен» (Римдегилерге 5:12). Айдарда, ончо улус кинчектӱ болуп калганынаҥ улам божоп јат (Римдегилерге 3:23).

Ӧлӱм канайып јоголтылар

 Кудай келер ӧйдӧ «ӧлӱмди јажын-чакка јоголтып салар» деп сӧзин берген (Исайя 25:8). Ӧлӱмди јоголторго, озо баштап кинчекти јоголтор керек. Кудай мыны Иисус Христос ажыра эдер, ол «телекейдиҥ улузыныҥ кинчегин кедери алып [«туура апарып», ЈТ] јаткан» (Иоанн 1:29; 1 Иоанн 1:7).