Lakin bəzi cütlüklər elektron cihazlardan yanlış istifadə edirlər. Bu səbəbdən...

• bir-birinə ayırmağa vaxtları qalmır.

• işi lazımsız yerə evə gətirirlər.

• aralarında etibarsızlıq yaranır və hətta xəyanətə yol verirlər.

VAXT AYIRIN

Maykl adlı bir kişi deyir: «Bəzən arvadımla bir otaqda olsaq da, adamda elə hiss olur ki, sanki o, başqa yerdədir. Onun başı telefonuna qarışır. O deyir: “Telefona baxmağa vaxtım olmayıb”». Conatan adlı bir kişi deyir ki, belə vəziyyətlərdə ərlə arvad cismən bir yerdə olsalar da, ruhən bir-birindən çox uzaqdadırlar.

DÜŞÜNÜN: Həyat yoldaşımla vaxt keçirərkən telefon zəngləri, mesajlar, bildirişlər diqqətimi tez-tez yayındırır? (EFESLİLƏRƏ 5:33).

İŞ

Bəzilərinin işi elədir ki, gecə-gündüz telefona gələn zənglərə cavab verməli olurlar. Bəzilərinin isə işi bunu tələb etməsə də, evdə də işdən ayrıla bilmirlər. Li adlı bir kişi deyir: «Arvadımla birgə keçirmək üçün ayırdığım vaxtlarda da özümü saxlaya bilməyib işlə bağlı gələn zənglərə və mesajlara cavab verirəm». Coy adlı bir qadın deyir: «Mən evdən işləyirəm. Buna görə də iş saatı ilə asudə vaxt arasında sərhəd qoymaq asan olmur».

DÜŞÜNÜN: Həyat yoldaşınız sizinlə danışanda ona diqqətlə qulaq asırsınız? (LUKA 8:18).

SƏDAQƏT

Bir sorğuya əsasən, ərlə-arvad arasında olan söz-söhbətin əsas səbəblərindən biri sosial mediadır. Sorğuda iştirak edənlərdən on faizi etiraf etmişdir ki, internetdə həyat yoldaşından gizli paylaşımlar edib.

Məhz elə buna görə sosial media «nikahda minalanmış ərazi» və hətta «xəyanət xidməti» adlanır. Təəccüblü deyil ki, boşanma işlərinə baxan vəkillərin sözlərinə görə, sosial media müasir dövrdə ailələrin dağılmasının başlıca səbəblərindən biridir.

DÜŞÜNÜN: Əks cinsdən kiminləsə ünsiyyət etdiyinizi həyat yoldaşınızdan gizlədirsiniz? (MƏSƏLLƏR 4:23).

NƏYİN VACİB OLDUĞUNU MÜƏYYƏN EDİN

Yeməyinə fikir verməyən insanın səhhətində problemlər olacaq. Eynilə, həyat yoldaşı ilə münasibətinə fikir verməyən, onunla vaxt keçirməyən insanın da nikahında problemlər olacaq (Efeslilərə 5:28, 29).

Sizə uyğun olan məsləhətləri müzakirə edin, yaxud öz fikirlərinizi yazın.

• Hər gün ən azı bir dəfə birlikdə yemək yeyin.

• Hər gün müəyyən vaxt ərzində elektron cihazdan istifadə etməyin.

• Birlikdə gəzməyə gedin.

• Elektron cihazı yatdığınız otaqdan kənara qoyun.

• Elektron cihazınızı söndürüb hər gün ən azı on beş dəqiqə bir-birinizlə söhbət edin.

• Günün müəyyən vaxtında interneti söndürün.