Baa mbañ i Bibel i i mpôdôl Mésia i ñéba toi le Yésu a bé Mésia?

AÑ NI

Ndimbhe i Bibel

Ñ. I ngéda a bé hana ’isi, Yésu a bi yônôs ngandak mbañ i i bé pôdôl “Ñéga le Mésia,” nu a bé lama ba “ntohol nkoñ ’isi.” (Daniel 9:25; 1 Yôhanes 4:14) To i mbus nyemb yé, Yésu a bi ke ni bisu i yônôs mbañ i u mpôdôl Mésia.—Tjémbi 110:1; Minson mi baôma 2:34-36.

I buk ini le “Mésia” i nkobla le kii?

I buk i hop Lôk Héber ini le Ma·shiʹach (Mésia) ni i buk hop i Grikia le Khri·stos (Kristô) bi nkobla le “Mut a yé Nhook.” Inyu hala nyen bibuk bini le, “Yésu Kristô” bi nkobla le “Yésu Nhook,” tole “Yésu Mésia.”

I ngéda ba bé tila Bibel; ba bé kal le mut a yé nhook i ngéda ba bé ba kôp mut môô i ngii ño inyu éba le ba nti nye ngim nson u tôbôtôbô tole ba nti nye ngim kunde. (Lôk Lévi 8:12; 1 Samuel 16:13) Djob a bi tep Yésu inyu ba Mésia. I tel i, i nti Yésu kunde keñi. (Minson mi baôma 2:36) Môô bé mon Nyambe a bi gwélél inyu nhoo Yésu, ndi mbuu wé mpubi.—Matéô 3:16.

Baa ngandak bôt i bé le i yônôs i mbañ i Bibel i i mpôdôl Mésia?

To. Nlélém kiki mintende mi libai li woo li mut wada mi mpôôna bé mintende mi libai li woo li mut numpe, hala nyen mbañ i Bibel i nyônôl ndik mut wada le a ba Mésia, tole Kristô. Bibel i mbéhe bés le “bikristô bi bitembee ni bapôdôl ba bitembee b’a telep, ba boñ biyimbne bikeñi ni bihélha bi mam inyu boñ le, ibale ba nla, ba yumus yak mimpohlak mi bôt.”—Matéô 24:24.

Baa di ngi kenek ni bisu i bem malo ma Mésia?

To. Bibel i bi bôk i legel le Mésia a bé lama pémél i ndaye i David, Kiñe Israel. (Tjémbi 89:4, 5) Ndi kaat i lihaa i Kiñe David i bi nimil, i nene le i bi tjiba i nwii 70 N.Y. a i ngéda Lôk Rôma i bi lo tjé Yérusalem. Jon i len ini, mut to wada a nla bé éba mapep ma ma ñunda le a nlôl toi ndaye i Kiñe David. Ndi i ngéda Yésu, mapep ma, ma bé ma nginda yii, jon to baoo bé ba bé pééna bé le a bé lôl i ndaye David.—Matéô 22:41-46.

Ikété Bibel, mbañ yañen i mpôdôl Mésia?

I ta bé bun i yi nsoñgi u mbañ i i mpôdôl Mésia, i yé ikété Bibel. Bôt bobasôna ba nsoñgol bé mbañ i Bibel nya yada, yak i i mbéñge Mésia. Kiki ’héga, kaat Yésaya 53:2-7 i mpôdôl mbañ i i mbéñge Mésia. Ngim bôt i nla kal le i bipes bi kaat bi, bi yé mbañ yada ki le bape ba nla kal le i yé ngandak mbañ.

Ndék mbañ i i mbéñge Mésia Yésu a bi yônôs

Mbañ	I het i nlébna ikété Bibel	Biyônôl
Ndaye i Abraham	Bibôdle 22:17, 18	Matéô 1:1
Ndaye i Isak man Abraham	Bibôdle 17:19	Matéô 1:2
A bi gwéé i litén li Yuda	Bibôdle 49:10	Matéô 1:1, 3
A bé i mbôda i Kiñe David	Yésaya 9:7	Matéô 1:1
Ngond i ngi yi bôlôm yon i bi gwal nye	Yésaya 7:14	Matéô 1:18, 22, 23
A bi gwéé i Bétléhém	Mika 5:2	Matéô 2:1, 5, 6
Ba bi sébél nye le Emmanuel b	Yésaya 7:14	Matéô 1:21-23
A bi gwéé ikété lihaa li li bé bé ngwañ	Yésaya 53:2	Lukas 2:7
Ba bi nol disii di boñge i mbus ligwéé jé	Yérémia 31:15	Matéô 2:16-18
A bi nyodi Égiptô	Hôséa 11:1	Matéô 2:13-15
Ba bé sébél nye le mut Nasaret c	Yésaya 11:1	Matéô 2:23
Nlegelnwin wada a bi bôk nye bisu	Malaki 3:1	Matéô 11:7-10
A bi yila Mésia i nwii 29 N.Y. d	Daniel 9:25	Matéô 3:13-17
Djob a bi kal le a yé Man wé	Tjémbi 2:7	Minson mi baôma 13:33, 34
A bééna makénd inyu ndap Nyambe	Tjémbi 69:9	Yôhanes 2:13-17
A bé añal miñañ minlam	Yésaya 61:1	Lukas 4:16-21
Likalô jé i Galiléa li bé mapubi makeñi	Yésaya 9:1, 2	Matéô 4:13-16
A bi boñ manyaga kiki Môsi	Ndiimba Mbén 18:15	Minson mi baôma 2:22
Kiki Môsi, a bé mpôdôl	Ndiimba Mbén 18:18, 19	Yôhanes 12:49
A bi mélés ngandak makon	Yésaya 53:4	Matéô 8:16, 17
A bé gwés bé nene	Yésaya 42:2	Matéô 12:17, 19
A bé éba i bôt ba bééna mandutu konangoo	Yésaya 42:3	Matéô 12:9-20; Markô 6:34
A bé éba bôt telepsép	Yésaya 42:1, 4	Matéô 12:17-20
A bé loñge Nti maéba	Yésaya 9:6, 7	Yôhanes 6:68
A bi niiga bôt jôl li Djob le Yéhôva	Tjémbi 22:22	Yôhanes 17:6
A bé gwélél dihéga inyu niiga	Tjémbi 78:2	Matéô 13:34, 35
A bé Ñéga	Daniel 9:25	Matéô 23:10
Ngandak bôt i bi hémle bé nye	Yésaya 53:1	Yôhanes 12:37, 38
A bé kiki ngok i baagene	Yésaya 8:14, 15	Matéô 21:42-44
Ba bi tjél nye	Tjémbi 118:22, 23	Minson mi baôma 4:10, 11
Ba bi oo nye ngi njom	Tjémbi 69:4	Yôhanes 15:24, 25
Ni maséé a njôp i Yérusalem i ngii man jakas	Sakaria 9:9	Matéô 21:4-9
Boñge ba bi bégés nye	Tjémbi 8:2	Matéô 21:15, 16
A bi lo i jôl li Yéhôva	Tjémbi 118:26	Yôhanes 12:12, 13
Liwanda jé li ñem nyuu li bi liibana nye	Tjémbi 41:9	Yôhanes 13:18
Ba bi liibana nye inyu 30 ma batjañtjañ ba silba e	Sakaria 11:12, 13	Matéô 26:14-16; 27:3-10
Mawanda mé ma bi tjôô nye	Sakaria 13:7	Matéô 26:31, 56
Ba bi bok nye mbôgi bitembee	Tjémbi 35:11	Matéô 26:59-61
A bi yén nwee ngéda ba bé ôm nye nsohi	Yésaya 53:7	Matéô 27:12-14
Ba bi tjôle nye matai i su	Yésaya 50:6	Matéô 26:67; 27:27, 30
Ba bi bép nye mabai	Mika 5:1	Markô 15:19
Ba bép nye disôô	Yésaya 50:6	Yôhanes 19:1
A bi ke bé ngolba ngwéé	Yésaya 50:6	Yôhanes 18:22, 23
Bikiñe bi nkoñ bi bi kolba nye	Tjémbi 2:2	Lukas 23:10-12
Ba bi tômôl nye moo ni makôô i kék	Tjémbi 22:16	Matéô 27:35; Yôhanes 20:25
Ba leñ mbam inyu mbot yé	Tjémbi 22:18	Yôhanes 19:23, 24
A bi lébna ipôla baboñbéba	Yésaya 53:12	Matéô 27:38
Ba bi sol nye, ba yan nye	Tjémbi 22:7, 8	Matéô 27:39-43
A bi nok ndutu inyu bibéba bi bôt	Yésaya 53:5, 6	1 Pétrô 2:23-25
I bi nene wee Djob a ntjôô nye	Tjémbi 22:1	Markô 15:34
Ba bi ti nye wai mpôdnaga ni njôñlô	Tjémbi 69:21	Matéô 27:34
Nyus i bi gwel nye ilole a nwo	Tjémbi 22:15	Yôhanes 19:28, 29
A bi ti Djob mbuu wé	Tjémbi 31:5	Lukas 23:46
A bi ti niñ yé	Yésaya 53:12	Markô 15:37
A bi ti sesema inyu mélés béba	Yésaya 53:12	Matéô 20:28
Hés yé to yada i bi bugi bé	Tjémbi 34:20	Yôhanes 19:31-33, 36
Ba bi tôp nye	Sakaria 12:10	Yôhanes 19:33-35, 37
A juba ni mingwañ mi bôt	Yésaya 53:9	Matéô 27:57-60
A tuglana	Tjémbi 16:10	Minson mi baôma 2:29-31
Ba héñha i mut a bi liibana nye	Tjémbi 109:8	Minson mi baôma 1:15-20
A bi yén i woo walôm u Djob	Tjémbi 110:1	Minson mi baôma 2:34-36

a Kaat miñañ ini le McClintock and Strong’s Cyclopedia i nkal le: “Mut to wada a nla bé pééna le bikaat bi mahaa ma Lôk Yuda bi bi nimil bé i bisu bi ngéda, ndi bi bi nimil i mbus tjiba i Yérusalem.”

b I jôl li hop Lôk Héber lini le Emmanuel, li nkobla le “Nyambe a yé ni bés.” I jôl li, li ntibil toñol minson Yésu a bi gwel i ngéda a bé hana ’isi. Malo mé hana ’isi ni mam a bi boñ ma bé éba ni toi le Djob a yé ni bagwélél bé.—Lukas 2:27-32; 7:12-16.

c I buk i Lôk Héber ini le “mut Nazaret” i nlôl i buk ini le neʹtser, i i nkobla le “nkôdôlbum.”

d Inyu yi inyuki Bibel i ñéba le nwii 29 N.Y., u yé nwii Mésia a bi nene, béñge “La prophétie de Daniel prédit l’arrivée du Messie.”

e I mbañ ini i nlébna i kaat Sakaria, ndi Matéô a bi tila le “jam mpôdôl Yérémia a pot.” (Matéô 27:9) Ba bé béna sima kaat i Yérémia kiki kaat i bisu i bikaat bi Bibel ba bé sébél le “Bapôdôl.” (Lukas 24:44) Jon i ngéda Matéô a nsima “Yérémia,” a nsima bikaat bi gwobisôna yak kaat Sakaria i bak mukété.

Yak ini i nla lémél we

BINIIGANA BI BIBEL

Noode nigil Bibel ni bés

Bat yigil i Bibel kiki nkwel, le mut a nigil ni we.

MAMBADGA BIBEL I NTIMBHE