BA KATHERINE bakuliile mu United States kabili ilyo bali ne myaka 16 balibatishiwe no kuba Inte ya kwa Yehova. Bali abacincila mu kushimikila, lelo abantu mu cifulo baleshimikilamo tabatemenwe ukukutika ku mbila nsuma. Ba Katherine batile: “Nalebelenga pa fyalecitikila abantu abalepepa kuli Lesa ukuti abatumiine aba kubafwa ukuti beshibe Lesa. Na ine nalefwaisha ukusanga umuntu wa musango yu, lelo nshabalile musanga.”

Ilyo ba Katherine bashimikile pa myaka iingi mu cifulo cimo cine, batampile ukutontonkanya pa kuselela ku cifulo cimbi uko bengasanga abengatemwa ukukutika sana ku mbila nsuma. Lelo balelanguluka ukuti bakalafuluka sana balupwa lwabo, pantu ukutula ku bwaice bwabo, bafuminepo fye pa ng’anda umuku umo ilyo baile mu kutandala. Baile pa milungu fye ibili, lelo cila bushiku balefuluka sana ku ng’anda. Lelo batwalilile fye ukufwaisha ukwafwa abantu abalefwaya sana ukwishiba Yehova. Pa numa ya kutontonkanya pa fifulo fyalekanalekana uko bengakuukila, balembeele amaofeshi ya Nte sha kwa Yehova mu Guam, kabili balibatumine ifyebo ifyo balekabila. Mu July 2007, ba Katherine bakuukile pa cishi ca Saipan, icaba pali Bemba wa Pacific ninshi bali fye ne myaka 26. Ukufuma ku mwabo ukufika pali ici cishi, paba amakilomita 10,000. Bushe cali shani ilyo bakuukile kuli ici cishi?

Ilyo ba Katherine bafikile pali ici cishi, tapakokwele, batendeke ukusambilila Baibolo na ba Doris, abali ne myaka nalimo 45. Ilyo basambilileko ifipandwa fitatu mu citabo citila Ico Baibolo Isambilisha, kwali icasakamike ba Katherine. Batile: “Ba Doris balibikile sana amano ku kusambilila Baibolo. Lelo apo nshabalile ntungululapo isambililo lya Baibolo mu kutwalilila, nalefwaya ukuti balesambilila no muntu uwaishiba sana ukusambilisha, kabili umukalambako pali ine.” Ba Katherine balipepele kuli Yehova ukuti abafwe ukusanga nkanshi uwafikapo uwingalasambilisha ba Doris. E ico batontonkenye ukuti balaeba ba Doris ukuti bali no kubapeela umuntu umbi uwa kulasambilila nabo Baibolo.

Lelo ba Katherine batile: “Ilyo nshilabeba ifyo napangile ukucita, ba Doris banjebele ukuti balefwaya ukunjebako ubwafwa bakwete. Ilyo banjebele, nabalondolwele ifyo Yehova angafwile ilyo na ine nakwete ubwafya bumo bwine. Balitashishe sana pa fyo nabebele.” Ba Doris baebele ba Katherine ukuti: “Yehova alangafwa ukupitila muli iwe. Ubushiku bwa  kubalilapo ilyo waishile pano ng’anda, nalibelengele Baibolo pa nshita iikalamba. Nalelila, kabili nalepepa kuli Lesa ukuti antumine uwingangafwa ukwishiba ifya mu Baibolo. Kabili tapakokwele, walishile. E fyo Yehova ayaswike ipepo lyandi!” Ifilamba mu menso ya ba Katherine fyalelengalenga ilyo balelondolola icacitike. Batile: “Ifyo ba Doris banjebele fyalelanga ukuti Yehova alyaswike ipepo lyandi. Kabili calimoneke apabuuta ukuti nalingile ukutwalilila ukusambilila na ba Doris.”

Ba Doris babatishiwe mu 2010, kabili ino nshita balatungulula amasambililo ya Baibolo ayengi. Ba Katherine batile: “Ukufuma fye na kale nalefwaisha ukwafwa umuntu ukuba umubomfi wa kwa Yehova, kanshi nalitemwa icine cine pantu ico nalefwaisha calicitika!” Ino nshita ba Katherine ni bapainiya waibela pa cishi cimbi ica Kosrae.

Bamunyinefwe ne nkashi abafuma ku fyalo fimbi ukucila pali 100 aba myaka pa kati ka 19 ukufika ku 79 balibombelapo mu fifulo umushaba sana bakasabankanya ba mbila nsuma mu Micronesia. Ifyo ba Erica baumfwile abaile ku Guam ukwali ukukabila mu 2006 ninshi bali fye ne myaka 19, e fyo na aba bonse baumfwile ilyo baile mu kubombela ukwali ukukabila. Ba Erica batile: “Cilawama sana ukubomba bupainiya mu cifulo umo abantu bafwaya sana ukumfwa icine. Ndatasha Yehova pa kungafwa ukutendeka bupainiya. E mulimo uundetela sana insansa!” Ino nshita, ba Erica ni bapainiya waibela pa cishi ca Ebeye, icaba pa fishi fya Marshall Islands. Kwena tacayanguka ukubombela mu calo cimbi. Lekeni tulande pa mafya yatatu ayo umuntu nalimo engakwata, tumone ne fyo abakuukila ku Micronesia bacita.

Imikalile ukwafya. Ilyo ba Simon abaali ne myaka 22 bafikile pa cishi ca Palau mu 2007, bamwene ukuti bali no kulakwata fye indalama ishinono sana nga kulinganya ku sho balekwata ilyo bali ku England uko bafumine. Ba Simon batile: “Nasambilile ukuti nshalingile ukulashita ifintu icishiteshite. Ndasala ifya kulya ningile ukushita, kabili ndashinguluka ukumona uko ningashita pa mutengo uuliko bwino. Nga ca kuti icipe candi caonaika, nshitilako fye icela icabombapo e lyo nafwaya uwa ukunungishisha.” Bushe ukwangusha imikalile kwayafwile shani ba Simon? Batile: “Kwalingafwile ukwishiba ifintu ifyacindeme sana ifyo nalekabila, ne fya kulabomfya fye ifintu ifinono. Imiku iingi nalimona ukuti Yehova alansakamana. Pa myaka yonse 7 iyo nabombela muli cino cifulo lyonse ndakwata ifya kulya no mwakulaala.” Ukwabula no kutwishika, Yehova alafwa bonse abangusha imikalile pa kuti balefwaya Ubufumu intanshi.—Mat. 6:32, 33.

Ukufuluka balupwa. Ba Erica batile: “Mu lupwa twalitemwana sana, kanshi nalemona kwati nkalabafuluka ica kuti nkafilwe no kubomba bwino umulimo wa kushimikila.” Bushe finshi bacitile pa kuti baipekanye bwino? Batile: “Ilyo nshilakuuka, nalibelengele ifipande fya mu Ulupungu lwa kwa Kalinda ifilanda pa fya kucita nga ulefuluka sana ulupwa. Ici calengele ukuti injipekanye bwino. Icipande cimo calelanda pa fyo nkashi umo akoseleshe umwana wakwe umwanakashi  ukuti Yehova akamusakamana. Amwebele ukuti, ‘Yehova kuti akusakamana bwino ukucila ifyo ningakusakamana.’ Aya mashiwi yalinkoseshe icine cine.” Ba Hannah na bena mwabo ba Patrick, babombela pa cishi ca Majuro icaba pa fishi fya Marshall Islands. Ica-afwa ba Hannah ukukanalafuluka sana balupwa, kubika amano kuli bamunyinefwe na bankashi aba mu cilonganino. Ba Hannah batile: “Ndatasha Yehova pa kukwata aba bwananyina ba mwi sonde lyonse pantu nabo ni balupwa lwandi. Nga tabalentungilila, nga nalifililwe ukubombela ukwali ukukabila.”

Ukupanga ifibusa. Ba Simon balandile ukuti: “Nga waya ku calo cimbi, ifintu fyonse filaaluka. Limo ndafuluka ukuseka na banandi uko nafumine, lelo kuno nga nalanda amashiwi yamipuulwe yamo tabomfwa umo yalolele.” Ba Erica balandile ukuti: “Pa kubala naletalalilwa, lelo icangafwile, kulatontonkanya pa calengele ukuti nkuukile kuli cino cifulo. Icalengele, kufwaya ukubombesha mu mulimo wa kwa Yehova, te kuisekesha iyo.” Na kabili batile: “Mu kupita kwa nshita, nasukile nakwata ifibusa ifisuma ifyo nacindika.” Ba Simon balibombeshe ukusambilila iciPalauan, icalenga no kuti ‘bakushe ukutemwa kwabo’ kuli bamunyinefwe na bankashi mu cilonganino. (2 Kor. 6:13) Ifi basambilile ululimi calengele bamunyinefwe babatemwe sana. Kanshi abaisa mu cilonganino nga babombela pamo na bakaya, aba mu cilonganino balatemwana no kwikatana sana. Mapaalo nshi yambi ayaba mu kuipeelesha ukuyabombela ukwaba ukukabila?

Umutumwa Paulo alandile ukuti: “Uutanda alefusha no kuseepa akaseepa ifingi.” (2 Kor. 9:6) Ifi fine e ficitika ku babombesha mu mulimo wa kushimikila. Fisuma nshi fyacitika kuli bamunyinefwe ‘abatanda mu kufusha’ mu Micronesia?

Mu Micronesia mucili abantu abengi abalefwaya ukusambilila Baibolo, kabili cilawama ukumona ifyo abantu balunduluka nga basambilila icine mu Cebo ca kwa Lesa no kulakonka ifyo balesambilila. Ba Patrick na ba Hannah nabo balishimikileko pa cishi ca Angaur, apekala fye abantu 320. Pa numa ya myeshi ibili, bushiku bumo balanshanye no mwanakashi uwa bana uushakwete umulume. Ilyo line fye uyu mwanakashi alisumine ukulasambilila Baibolo, kabili alyalwike mu fingi. Ba Hannah batile: “Lyonse nga twapwisha ukusambilila nankwe, ilyo twalebwelelamo ninshi tulecofa amacinga, twaleloleshanya no kutila: ‘Twatasha mwe Yehova!’” Ba Hannah balandile no kuti: “Nalishiba ukuti Yehova nga alibomfesheko inshila imbi iya kukulilamo uyu mwanakashi kuli ena, lelo pa mulandu wa kuti twalikuukile ukwaba ukukabila twalisangile uyu muntu no kumwafwa ukwishiba Yehova. Ala calituletela insansa nga nshi!” Ifi e fyo na ba Erica balandile, batile, “ala tulatemwa nga nshi nga twayafwa umuntu ukwishiba Yehova!”

Mu fyalo ifingi mwaliba ififulo ukushaba abakubila imbila nsuma abengi. Bushe na imwe te kuti mutemwe ukukuukila ku fifulo fya musango yu? Lombeni Yehova ukuti amwafwe pa kutila mulebombesha mu mulimo wa kushimikila. Lanshanyeni na baeluda mu cilonganino mwaba, na kangalila wa muputule, nelyo na babombako ku fifulo ukwaba ukukabila. Nga mwatendeka ukuipekanya, kuti mwalembela ku maofeshi ya Nte sha kwa Yehova ayaba mu calo cilolekesha pa cifulo mulefwaya ukuyabombelako, pa kuti bamwebeko ifyebo ifingamwafwa. * Nalimo na imwe kuti mwailunda kuli bamunyinefwe na bankashi abengi sana, abaice, na bakalamba, abashimbe na baupana abaipeelesha kabili ababa ne nsansa pa mulandu wa kuti ‘balaseepa ifingi.’