Fundeni Abana Benu

Ubufunushi Bwaliletelele Gehasi

BUSHE walibala aufwaishapo ukukwata ifintu fimo?— * Nga walifwaishapo, wishibe ukuti tawaba weka. Lelo bushe ufwile ukubepa ubufi pa kuti fye ukwate ifyo ulefwaya?— Awe iyo. Umuntu uucita ifi wa bufunushi. Leka tulande pa fyo ubufunushi bwaletelele umuntu umo uo baleita ati Gehasi. Gehasi ali mubomfi wa kwa Elisha, kasesema wa kwa Lesa wa cine, Yehova.

Elisha na Gehasi baliko kale sana napamo imyaka 1,000 ilyo Yesu, Umwana uwa kwa Lesa, talafyalwa pe sonde. Yehova alepeela Elisha amaka ya kucita ifintu ifisuma nga nshi, e kutila, ukucita ifipesha amano! Ku ca kumwenako, Baibolo ilanda pa mwaume uwali uwacindama nga nshi mwi bumba lya bashilika ba bena Siria, uwalwele ubulwele ubwabipa sana ubwa fibashi. Bonse balifililwe ukumundapa, lelo Elisha alimundepe.

Elisha nga aundapa abantu ukubomfya amaka ya kwa Lesa, alekaana ukupoka indalama. Bushe nawishiba umulandu alekaanina?— Pantu Elisha alishibe ukuti Yehova e walecita filya ifipesha amano, te Elisha umwine iyo. Ilyo Naamani apolele, alitemenwe sana ica kuti alefwaya ukupeela Elisha ifya bupe fya golde ne fya kufwala ifisuma. Elisha alikeene ukupoka ifi fya bupe, lelo Gehasi ena alefifwaisha nga nshi.

Ilyo Naamani aile, Gehasi alimukonkele ulubilo ukwabula no kweba Elisha. Ilyo amusangile, bushe nawishiba ifyo Gehasi aebele Naamani?— Amwebele ati ‘Elisha antuma ukwisamweba ati kwaisa abeni babili. Alelomba ifya kufwala fibili pa kuti abapeele.’

 Lelo ubu bwali bufi ubwafiita fititi! Gehasi apangile fye ili lyashi lya kuti kwaisa abeni babili. Alandile ifi pantu alefwaya ifya kufwala ifyo Naamani afwaile ukupeela Elisha. Kwena, Naamani ena taishibe ukuti ubu bwali bufi. E ico alitemenwe sana ukupeela Gehasi ifya bupe. Naamani alipeele Gehasi ifya bupe ifingi ukucila ne fyo alombele. Bushe nawishiba icacitike?—

Ilyo Gehasi abwelelemo ku ng’anda, Elisha amwipwishe ati: ‘Ni kwi wafuma?’

Gehasi ayaswike ati: ‘Tapali nangu kumo uko njile.’ Lelo, Yehova alilengele Elisha ukwishiba ico Gehasi acitile. E ico, Elisha atile: ‘Ino te nshita ya kupoka indalama ne fya kufwala!’

Gehasi alipokele indalama ne fya kufwala ifishali fyakwe. E ico, Lesa aletele ifibashi fya kwa Naamani pali Gehasi. Bushe uletontonkanya ukuti cinshi twingasambililako kuli ifi ifyacitike?— Cimo ico tulesambililako ca kuti tatufwile ukupanga no kulashimika amalyashi ya bufi.

Mulandu nshi Gehasi apangiile ilyashi lya bufi?— Pantu Gehasi ali mufunushi. Alefwaya ukukwata ifintu ifishali fyakwe, kabili pa kucita ifi alibepele ubufi. Pa mulandu wa fyo acitile, aishilelwala ubulwele bwabipisha ubwa fibashi mpaka ne mfwa yakwe.

Kwali na cimbi icabipa sana icacitikile Gehasi icacilile na pa kulwala ifibashi. Bushe naucishiba?— Lesa alilekele ukutemwa Gehasi. Na ifwe twikabala atucita ifintu ifikalenga Lesa ukuleka ukututemwa! Lelo, tulingile ukuba ne cikuuku no kulapeelako bambi ifyo tukwete.

Belenga muli Baibolo yobe

2 Ishamfumu 5:5, 20-27;

Yuda 21; Yohane 15:10

[Futunoti]