Sam man oli talem se yu mas presem pikinini oltaem nomo. Sam narafala oli talem se sipos yu presem pikinini oltaem, bambae yu spolem hem, from we hem i save ting se hem i gat raet blong mekem enikaen samting nomo we hem i wantem.

Yu mas tingbaot sipos i stret blong presem pikinini oltaem, be yu mas tingbaot tu wanem samting i stret blong presem hem from. ?Wanem kaen tok blong presem hem we bambae i givhan long hem? ?Wanem kaen tok bambae i no givhan long hem? ?Wanem fasin blong presem hem we bambae i karem gudfala frut?

Ol tok blong presem pikinini oli no sem mak. Yu traem tingbaot ol save we i kam biaen.

Yu spolem pikinini taem yu presem hem tumas. Sam papa mo mama oli presem pikinini from nating nomo. Oli ting se hemia bambae i mekem pikinini i harem gud. Be wan dokta (David Walsh) i givim woning se, ol yangfala “oli luksave taem yu bitim mak, mo oli save se yu no minim samting we yu talem.” Hem i gohed se: “Oli save se ol tok ya [blong presem olgeta] i no stret, mo maet oli ting se oli no moa save trastem tok blong yu.” *

I gud yu presem hem from samting we hem i gat gudhan blong mekem. Yu tingbaot se gel blong yu i save dro gud. I tru, bambae yu wantem presem hem, from we hemia i save pulum hem blong i kam gud moa. Be i gat wan problem. Sipos yu presem hem from samting we hem i gat gudhan blong mekem nomo, maet hem i ting se i no nid blong lanem samting we i had long hem. Maet hem i no wantem traem ol niufala samting from we hem i fraet se bambae i no save mekem. Tingting blong hem se: ‘Sipos mi no naf blong mekem wan samting, hemia i min se samting ya i no stret long mi. Taswe, ?from wanem mi mas traehad?’

I gud moa blong presem hem taem hem i traehad. I gud we papa mo mama tufala i presem pikinini from we hem i wok had mo i gohed nomo, i bitim we tufala i presem hem from gud han we hem i gat blong mekem samting. Olsem nao, pikinini i lanem wan impoten trutok: Blong gat gud han long wan wok, yu mas traehad mo yu mas gohed nomo. Wan buk (Letting Go With Love and Confidence) i talem se taem pikinini i save samting ya, “hem i wok had blong luk gudfala frut. Nating se hem i no naf blong mekem  gud wok ya, be bambae hem i tingbaot se hem i stap lanem. Bambae hem i no ting se hem i gud blong nating nomo.”

Yu presem hem from we i traehad, be i no from we hem i gat gud han blong mekem samting nomo. Maet yu talem long pikinini se: “Mi luk se yu tingting gud long samting ya we yu droem.” Ating hemia i moa gud i winim we yu talem se: “!Yu yes! Yu no skul nating blong dro, be yu save dro gud we.” Tufala tok ya tugeta i presem pikinini, be sekenwan i save givim tingting long pikinini se i no nid blong lanem moa, be hem i save mekem nomo samting we hem i gud long hem finis.

Taem yu presem pikinini from we i traehad, yu tijim hem se, moa we hem i traehad moa we hem i kam gud. From samting ya, hem i save gat strong tingting blong traem ol niufala samting.—Rul blong Baebol: Ol Proveb 14:23.

Yu givhan long pikinini blong i no harem nogud tumas taem i mestem. Ol gudfala man tu oli mekem mastik, mo samfala oli mekem bakegen mo bakegen. (Ol Proveb 24:16) Be taem oli mekem mastik, oli girap mo oli traehad bakegen, oli lanem samting from mastik blong olgeta, mo oli gohed blong wok. ?Olsem wanem blong givhan long pikinini blong i gat fasin olsem?

Bakegen, yu mas pulum pikinini blong i traehad. Yu traem tingbaot: Sipos yu presem gel blong yu se, “!Man! Matematik i isi nomo long yu. Yu no nid blong traehad nating.” ?Be olsem wanem nao sipos hem i no winim eksam blong hem? Maet hem i harem nogud mo i lego, from we fastaem matematik i isi nomo long hem, be naoia i lusum evri samting.

Taem yu presem pikinini from we hem i traehad, yu tijim hem blong i girap bakegen mo i gohed. Taem gel blong yu i no winim eksam blong hem, yu givhan long hem blong i luk samting ya olsem wan smol trabol we hem i save winim. Olsemia, bambae hem i no ting se i finis ya nao, be bambae hem i traem wan narafala rod, no bambae hem i wok had moa.—Rul blong Baebol: Jemes 3:2.

Yu talem gud samting we hem i save kam gud moa long hem. Sipos yu toktok gud blong talem samting we pikinini i mas kam gud moa long hem, bambae yu givhan long hem. Samting ya i no save spolem hem, mo i no save mekem se hem i wantem lego. Mo tu, sipos yu presem hem long fasin we i stret, ating bambae hem i glad taem yu talem samting we hem i save kam gud moa long hem. Nao taem hem i mekem samting we i gud tumas, bambae hem i harem gud, mo yu tu bambae yu harem gud.—Rul blong Baebol: Ol Proveb 13:4.