?YU SAVE mekem wanem taem rao i kamaot long famle? Yufala i lavlavem yufala, mo yufala i no wantem spolem yufala. Be yufala i luk se ol rao oli stap kamaot oltaem nomo mo oli stap kam strong moa. I olsem se yufala i stap rao from nating nomo.

Yu mas tingbaot se taem i gat defdefren tingting long famle, hemia i no min se famle bambae i seraot. Samting we i mekem se famle i gat pis no i no gat pis, hemia fasin we yu mekem taem yufala i gat defdefren tingting. Hemia sam samting we yu save mekem blong stopem rao.

Taem rao i kamaot tu man i mekem, be sipos wan long tufala i no moa toktok be i lesin, rao i save godaon. Taswe, taem narafala i mekem yu yu kros, yu no mas givimbak. Sipos yu bos long fasin blong yu, bambae yu no talem no mekem samting we biaen yu sem from. Yu mas tingbaot se i moa gud yu mekem pis i bitim we yu winim wan rao.

“Sipos i no moa gat faeawud, bambae faea i ded, mo long sem fasin, sipos i no moa gat man i stap talem ol tok olbaot blong spolem narafala man, rao tu bambae i finis.”—Ol Proveb 26:20.

Sipos yu no katem toktok blong narafala mo yu no jajem hem be yu lesin gud, hemia i save mekem kros i godaon, mo i putumbak pis long famle. I moa gud yu traem kasem save tingting blong hem, i bitim we yu jajem hem. Yu no mas ting se hem i wantem agensem yu, maet hem i mestem nomo. Maet hem i sakem nogud tok from we hem i harem nogud, no from we hem i no tingting gud fastaem, be i no from we hem i wantem spolem yu mo givimbak.

“Yufala i mas putum niufala laef ya blong yufala olsem prapa klos blong yufala. Yufala i mas gat sore long ol man mo yufala i mas mekem i gud long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala.”—Kolosi 3:12.

Sipos yu harem se yu wantem faerap long kros, i moa gud yu talem ‘eskius mi,’ mo yu gowe smoltaem blong kros i godaon. Maet yu go long wan narafala rum no yu go wokbaot smol, blong harem gud bakegen. Yu no mekem samting ya from we yu wantem ronwe long trabol, no yu wantem go haed. Mo yu no mekem from we yu no moa wantem toktok long narawan. Be hemia wan gudfala taem blong yu save prea long God. Yu save askem long hem blong i givim longfala tingting mo waes, mo i givhan long yu blong yu kasem save tingting blong narafala. Taem yu mekem olsem, yu folem tok ya blong Ol Proveb.

“I gud yu gowe bifo rao i kamaot.” —Ol Proveb 17:14, NW.

Yu no save mekem pis long famle sipos yu tingbaot nomo blong faenem ol tok we bambae i spolem narafala. Yu mas traem faenem ol tok we i mekem narafala i harem gud bakegen. Yu no mas tok strong long hem se hem i mas olsem no olsem. Be yu askem kwestin long hem, mo taem hem i ansa, yu talem tangkiu from we hem i givhan long yu blong yu kasem save tingting blong hem.

“Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem, be tok we i waes i save mekem man i harem gud bakegen.”—Ol Proveb 12:18.

Sipos man no woman blong yu i harem nogud oltaem long ol smosmol samting nomo, yu save kam kros from. Nating se yu wantem sakem nogud tok no tok strong no jikim hem, be yu no mas mekem olsem. Yu no mas sakem ol tok we i stikim hem, olsem se “Yu no kea” mo “Yu neva lesin.” I moa gud yu talem long kwaet fasin, olsem wanem samting we hem i talem no i mekem, i spolem yu (“Mi mi harem nogud taem yu . . . ”). I nogud yu pusum, no yu slavem, no yu kikim hem, no yu mekem wan narafala raf fasin olsem. Mo i nogud yu talem ol tok we i no soemaot respek, blong daonem hem, no blong mekem hem i fraet.

“Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren long yufala.” —Efesas 4:31.

Yu no mas fogetem se yu wantem mekem pis. Taswe yu no letem ol nogud tingting blong yu oli blokem yu blong mekem pis. Yu traem tingbaot: Sipos yu rao long narafala, yutufala tugeta i lus, be sipos yu mekem pis, yutufala tugeta i win. Taswe yu no mas blemem hem. Maet yu no ting se yu mekem rong, be yu save talem sore yet, from we yu kam kros, yu talem tok we i no stret, no yu mekem wan narafala samting olsem. I moa impoten we yu mekem pis i bitim we yu flas, mo yu wantem win nomo. Mo sipos hem i talem sore long yu, yu mas kwik blong fogivim hem.

Taem rao i finis, ?yu save mekem wanem blong holemtaet pis long famle? Ol tok we i kam biaen bambae i ansa long kwestin ya.

“Yu mas hareap blong go luk man ya, mo yu mas krae long hem blong i letem yu yu go fri.”—Ol Proveb 6:3.