Mi mi bon long wan smol taon long Polan, we i stap klosap long Jemani. Mi stap long wan ples we i kwaet, mo raonabaot i gat ol fam mo ol tri. Papa mo mama blong mi tufala i wantem se mi gat wan gudfala laef, mi skul gud, mo gat wan gudfala wok.

Mi stat blong kasem trabol, taem mi go skul from loa long wan yunivesiti we i stap long taon blong Wrocław. Taem mi stap longwe long papa mo mama blong mi, mi stap joen wetem ol rabis fren. Mi mi laekem futbol, be taem mi stap joen wetem ol niufala fren blong mi, oli mekem se mi krangke gud long futbol. Mi laekem tumas tim blong taon ya Warsaw, mo long ol wiken, mi stap folem olgeta i go long ol ples we oli plei long hem. Long taem ya, mifala i stap dring bitim mak, mifala i tekem drag, mo samtaem mifala i faet wetem ol sapota blong ol narafala tim. Mi mekem olsem jes blong fogetem ol wari blong mi, nating se mi save we sipos ol polis oli arestem mi, hemia i save spolem skul blong mi.

Mi mo ol fren blong mi, mifala i laekem blong go long ol naet klab, mo oltaem mifala i joen long ol faet long rod. Plante taem polis i arestem mi, be oli letem mi fri from we mi stap givim mane long olgeta blong oli haedem ol rong blong mi. Mi ting se mi gat wan gudfala laef finis. Nating se i olsem, mi save se mi stap mekem samting we i no stret. Ale, evri sande mi go long jos blong mi harem gud bakegen.

Long 2004, tu Witnes blong Jehova i kam luk mi, mo mi agri blong stadi Baebol wetem olgeta. Taem mi stap lanem fasin blong ol trufala Kristin, mi luksave se mi mekem ol samting we oli no stret mo mi harem nogud tumas. Mi save se mi mas stop blong dring bitim mak, tekem drag mo joen wetem ol man we oli no folem ol rul blong Baebol. Mo tu, mi mas jenisim fasin blong mi blong kros kwik mo blong faet. Naoia mi luksave ol samting we mi mas jenisim, be mi gohed yet blong mekem ol nogud samting.

Be wan naet tingting blong mi i open. Mi wantem mekem bigman blong mi, mi statem wan faet wetem eit man. Oli girap oli faetem mi mo oli kikim hed blong mi mo oli lego mi, mi stap slip long rod. Long taem ya, mi harem se ded hemia nomo, ale mi prea se: “Jehova, plis yu sore long mi, from we mi no tinghae long ol Tok  blong yu. Mi promes long yu se sipos mi laef, bambae mi stadi Baebol wetem ol Witnes mo jenisim laef blong mi.” Mi sek se mi laef, ale mi stadi Baebol folem promes we mi mekem.

Long 2006, mi go stap long Inglan, blong mi kasem naf mane blong mi gobak long Polan blong kasem wan hae edukesen long loa. Taem mi stap gohed blong stadi long Baebol, i gat wan vas we i mekem mi mi glad tumas. Aposol Pol i talem se: “Naoia mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi. Be from Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.” (Filipae 3:8) Pol tu i skul from loa, mo bifo hem tu i wan man blong faet. (Ol Wok 8:3) Nating se i olsem, hem i luk se i gat wan rod blong gat wan gudfala laef. Hemia blong mekem wok blong God mo traehad blong folem fasin blong Jisas. Taem mi tingting gud long eksampol blong Pol, mi luksave se fasin blong faet mo blong kasem wan gudfala wok, oli no save mekem mi glad long laef. Bilif blong mi i kam strong moa, taem mi tingbaot se sipos Pol i save jenisim fasin blong hem, be mi tu mi save jenisim fasin blong mi. Ale, mi stap long Inglan mo mi no moa tingbaot blong kasem wan hae edukesen long loa.

Taem mi save moa ol fasin blong Jehova, mi stap kam klosap moa long hem. Mo promes we hem i mekem blong fogivim olgeta we oli jenisim laef blong olgeta, i tajem hat blong mi. (Ol Wok 2:38) Mo tu, taem mi tingting dip long 1 Jon 4:16, we i talem se “God, hem i stamba blong fasin blong lavem man,” mi kasem save se God i no laekem nating man we i stap faet.

Mo tu, fasin blong ol Witnes i mekem mi glad tumas. Mi luksave se oltaem oli traehad blong folem ol rul blong Baebol long laef blong olgeta. Mi wantem joen blong harem gud wetem olgeta. Afta, mi traehad blong stretem ol samting long laef blong mi. Long 2008 mi baptaes mo mi kam wan Witnes blong Jehova.

Baebol i jenisim laef blong mi, blong mi kam wan man blong God, mo mi glad blong tijim ol narafala long Baebol. Mi no moa laekem blong faet, tekem drag, mo dring bitim mak. Mi laekem yet blong wajem futbol, be mi no krangke tumas long hem olsem fastaem.

Naoia mi mared long Esther, wan naesfala sista we i wosipim Jehova. Mitufala i glad tumas taem mitufala i prij long ol man Polan we oli stap long not wes blong Inglan. Hemia fas taem we mi harem gud tumas long laef blong mi. Tingting blong mi i klin mo mi gat wan gudfala laef.