Siya Nahinumdom nga “Kita Abog”
Pakigsuod sa Diyos
Siya Nahinumdom nga “Kita Abog”
“WALA ko magtuo nga si Jehova bug-os makapasaylo nako, ug abi nakog magpas-an ko niini sa tibuok nakong kinabuhi.” Mao kini ang giingon sa usa ka Kristohanong babaye bahin sa iyang nangaging mga sayop. Oo, ang sad-an nga tanlag maoy bug-at nga palas-anon. Apan, ang Bibliya makahupay sa kaguol sa mahinulsolong mga makasasala. Palandonga ang giingon ni David sa Salmo 103:8-14.
Nahibalo si David nga “si Jehova maluluy-on” ug “dili [kanunayng] mangitag sayop” kanato. (Bersikulo 8-10) Kon makita sa Diyos nga angayang magpakitag kaluoy, iya kining himoon sa bug-os. Si David, nga usa ka batid nga magbabalak, naggamit ug tulo ka pagtandi aron iilustrar ang pagkadako sa kaluoy sa Diyos kanato.
“Ingon nga ang mga langit hataas kay sa yuta, ang iyang mahigugmaong-kalulot labaw ngadto kanila nga nahadlok kaniya.” (Bersikulo 11) Kon kita molantaw sa langit panahon sa kagabhion, dili nato matukib kon unsa ka layo ang mga bituon gikan sa yuta. Oo, gipasiugda ni David ang kadako sa kaluoy ni Jehova, nga usa ka bahin sa iyang maunongong gugma. Kini nga kaluoy maoy alang “kanila nga nahadlok” sa Diyos—kadtong dunay “mapainubsanon, kinasingkasing nga pagtahod sa iyang awtoridad,” matod sa usa ka eskolar.
“Ingon sa pagkalayo sa sidlakan gikan sa kasadpan, sa mao nga gilay-on iyang gipahilayo gikan kanato ang atong mga kalapasan.” (Bersikulo 12) Unsa kana ka layo? Wala kita masayod. Ang usa ka Biblikanhong reperensiya nag-ingon: “Bisag unsa ka layo ang imong pagpanaw paingon sa sidlakan latas sa kawanangan, mas mosamot ka ug kalayo gikan sa kasadpan.” Gipasiugda ni David kanato nga kon ang Diyos magpasaylo sa atong mga sala, bug-os gayod niya kining ipahilayo kanato.
“Ingon sa usa ka amahan nga magapakitag kaluoy sa iyang mga anak, Si Jehova nagpakitag kaluoy kanila nga nahadlok kaniya.” (Bersikulo 13) Si David, nga usa usab ka amahan, nasayod kon unsay bation sa usa ka mahigugmaong amahan. Siya maluoy sa iyang mga anak, ilabina kon sila anaa sa kasakit. Gipasalig kanato ni David nga ang atong mahigugmaong Amahan sa langit maluoy sa iyang yutan-ong mga anak, ilabina kon ang ilang mahinulsolong mga kasingkasing ‘nagun-ob ug nadugmok’ tungod sa ilang mga sala.—Salmo 51:17.
Human sa tulo ka pagtandi, gibutyag ni David kon nganong si Jehova nagpakitag kaluoy sa dili hingpit nga mga tawo: “Siya nahibalo pag-ayo sa atong pagkaumol, nga nahinumdom nga kita abog.” (Bersikulo 14) Nasayod si Jehova nga kita gikan sa abog, nga may mga kaluyahon ug limitasyon. Tungod niini, si Jehova “andam sa pagpasaylo” basta kita kinasingkasing nga maghinulsol.—Salmo 86:5.
Natandog ka ba sa mga pulong ni David bahin sa kaluoy ni Jehova? Ang babaye nga gihisgotan sa sinugdan nagtuon kon unsay gibutyag sa Bibliya bahin sa pagkaandam sa Diyos mopasaylo, ug siya nakaingon: “Karon mibati ko nga tinuod diayng mahimong suod kang Jehova, ug nahuwasan ko sa kabug-at nga akong gibati.” * Mahimo kang magtuon ug dugang bahin sa kaluoy sa Diyos ug kon sa unsang paagi makab-ot nimo kini. Tingali ikaw usab mahuwasan sa kabug-at nga imong gibati.
Sugyot nga Pagbasa sa Bibliya sa Agosto:
[Footnote]
^ par. 7 Tan-awa ang kapitulo 26, “Usa ka Diyos nga ‘Andam sa Pagpasaylo,’” sa librong Pakigsuod Kang Jehova, nga gipatik sa mga Saksi ni Jehova.
[Blurb sa panid 13]
“Karon mibati ko nga tinuod diayng mahimong suod kang Jehova, ug nahuwasan ko sa kabug-at nga akong gibati”
