GUSTO natong mahalon ta sa mga tawo. Mibati ka ba usab niana?— * Ang Bibliya naghisgot kang Dorcas, usa ka babayeng daghan ang nagmahal.

Si Dorcas nagpuyo sa Jope, usa ka siyudad nga kasikbit sa Dagat Mediteranyo. Ang Jerusalem mga 56 kilometros lang pailaya gikan sa Jope. Si Dorcas usa sa unang mga tinun-an ni Jesus.

Ngano kahang gimahal pag-ayo si Dorcas?— Gihisgotan sa Bibliya nga siya daghag maayong nahimo ug naghatag ug mga gasa. Dayag nga siya naghimog nindot nga mga besti alang sa mga babayeng balo. Daghan usab ang iyang gisangyawan bahin sa matuod nga Diyos, si Jehova, ingon sa gihimo ni Jesus.

Nahibalo ka bag unsay nahitabo kang Dorcas?— Siya grabeng nasakit ug namatay. Naguol ang tanan niyang higala. Busa nagsugo  silag mga tawo nga magpahibalo kang apostol Pedro, kinsa atua sa dapit nga mga 16 kilometros ang gilay-on. Kining mga tawhana naghangyo sa apostol nga magdali pag-adto. Pag-abot ni Pedro, siya misaka sa nahimutangan ni Dorcas. Nanghilak ang tanang babaye, ug ilang gipakita kaniya ang mga besti nga gihimo ni Dorcas kanila.

Unya gipapahawa ni Pedro ang tanan sa lawak. Si Pedro ug ang ubang apostoles nakahimo nag mga milagro kaniadto, apan wala pa kanilay nakabanhawg patay. Unsa kahay buhaton ni Pedro?—

Miluhod si Pedro nga nag-atubang sa patayng lawas ug nag-ampo kang Jehova. Dayon iyang gisugo si Dorcas sa pagbangon. Ug kini mibangon! Gigunitan ni Pedro ang iyang kamot ug gipatindog siya. Dayon iyang gitawag ang mga babayeng balo ug ang uban ug gipakita si Dorcas kanila. Mahanduraw mo ba ang kalipay nilang tanan?—

Atong palandongon kon unsay imong makat-onan sa pagkabanhaw ni Dorcas. Atong makat-onan nga kon ikaw matinabangon, daghan usab ang magmahal kanimo. Apan labaw sa tanan, ikaw mahinumdoman ug mahalon sa Diyos. Dili gyod niya kalimtan ang imong maayong gihimo alang sa uban. Ug iya kang gantihan ug kinabuhing walay kataposan sa iyang matarong nga bag-ong kalibotan diin ikaw magmalipayon.