LUZIA A NIKKOI WÓÓN PECHEN PELIEFEFINAN. Me lekúkkúnún Luzia a úri ewe semmwen itan poliomyelitis, a mecheres án ena semmwen epwe úri aramas me a atai kókkótun án ewe inis waan memmeef. Atun a 16 ierin, emén fefin Luzia a angang ngeni a ereni, “Kot a apwúnguk ren an ámálóói kifetin inisum pokiten ka álleasolapa me kirikiringaw ngeni inom we.” Fite ier mwirin, Luzia a chúen chechchemeni ifa úkúkún metekin alon na fefin ngeni.

ATUN DAMARIS A SILEI PWE A ÚRI KANSERIN TUPWU, seman we a eisini: “Met ke féri iei a uruk ei semmwen? Ese mwáál ka féri och mettóch mi fókkun ngaw. Ina popun Kot a apwúngúk.” Damaris a fókkun letipechou ren minne seman na a erá.

Seni chék me lóóm aramas ra eáni ewe lúkú mi mwáál pwe Kot a apwúngú aramas ren semmwen. Ewe puk itan Manners and Customs of Bible Lands a erá pwe chómmóng aramas lón fansoun Jesus we ra lúkú pwe “semmwen a popu seni tipisin ewe mi semmwen, are tipisin eménnewe ewe mi semmwen a riri ngeni, me a fis kapwúngún pokiten an tipis.” Ewe puk itelapan Medieval Medicine and the Plague a erá pwe ina epwe 700 ier lóóm, “ekkóch aramas ra lúkú pwe Kot a efisi semmwen mi chéú pwe epwe apwúngú aramas pokiten ar kewe tipis.” Iwe lupwen fite million aramas lón Iurop ra máló ina epwe 600 ier a ló pokiten eú semmwen mi chéú, itá a fis pokiten Kot a apwúngú ekkewe aramasangaw? Are a fis ena semmwen mi chéú pokiten och sókkun ménún semmwen mi efisi paiking, usun met ekkewe soukáén pekin sáfei ra apwúngaló fite ier me mwirin? Eli ekkóch repwe ekieki, Kot a áeá semmwen le eriáfféwú aramas pokiten ar kewe tipis? *

EKIEKI EI: Ika Kot a áeá semmwen me riáfféú le apwúngú chókkewe mi fich ngeniir kapwúng, iwe pwata Jesus a echikara chókkewe mi semmwen? Esap pwe usun itá Jesus a ú ngeni án Kot pwúng me pwúngiéch? (Mateus 4:23, 24) Esap fán eú Jesus epwe ú ngeni minne Jiowa a féri. A erá: “Üa föri mine a pwapwa ren fansoun meinisin” me, “üa föri meinisin mine i a allük ngeniei.”​—Johannes 8:29; 14:31.

A mmen ffat alon Paipel, Jiowa Kot “esap wor an mwäl.” (Tuteronomi 32:4) Áwewe chék, esap fán eú án Kot epwe efisi taan efóch sepelin mi nieló fitepúkú aramas ese wor tipisiir, pokiten an mochen apwúngú emén mi nóm wóón ena sepelin! Minne emén chón angang mi tuppwél itan Apraham a erá a tipeeú ngeni án Kot pwúng, pwe Kot esap fókkun “niela chon pwüng fiti chon pwüngingau.” A pwal erá “ese tufich.” (Keneses 18:23, 25) Ewe Paipel a pwal erá pwe “Kot esap föri och föför mi ngau,” esap pwal “föri mine a mwäl.”​—Hiop 34:10-12.

Ekkewe riáfféú sia kúkkúna, ese fis pokiten Kot a apwúngúkich ren och tipis sia féri. A mmen ffat me ren Jesus ena atun i me néún kewe Chón Káé ra kúna emén mwán mi chun seni leuputiwan. “Nöün kewe chon kaiö ra aisini, “Sense, tipisin iö pwe ei mwän a upuchun? Püsin tipisin ika tipisin  saman me inan?” Jesus a pölüeniir, “Esap tipisin ei mwän, esap pwal tipisin saman me inan, nge ei a fis pwe manamanen Kot epwe pwä lon manauan.”​—Johannes 9:1-3.

Lón ena fansoun atun a chéúfetál ena sókkun ekiek mi mwáál, ese mwáál néún Jesus kewe Chón Káé ra máirú atun a ereniir pwe esap tipisin ewe mwán are tipisin seman kewe me inan minne a fis ngeni ena mwán. Jesus ese chék echikara ewe mwán, nge ren minne a féri fán itan, a áwena án aramas we lúkú mi chofona pwe án aramas riáfféú a feito seni Kot. (Johannes 9:6, 7) Chókkewe mi riáfféú pokiten semmwen mi chéú ikenái, ra kúna ourur ren ar silei pwe ar riáfféú ese feito seni Kot.

Ekkeei Wokisin ra alúkúlúkúkich

• “Pun Kot esap tongeni küna sosotingau, i esap pwal sotuningauei eman.” (JAMES 1:13) Mei pwúng, ekiseló chék epwele wes ekkewe “sosotingau” aramas ra rirriáfféú fan ren fitepúkú ier, kapachelong semmwen, metek, me máló.

• Jesus Kraist a “apöchöküla chokewe meinisin mi samau.” (MATEUS 8:16) Atun Jesus a echikara chókkewe mi feiló ren, a pwári met án Kot we Mwú epwe apwénúetá wóón unusen fenufan.

• “[Kot] epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”​—PWÄRÄTÄ 21:3-5.

Iwe, pwata aramas ra kúkkúna chómmóng riáfféú me metek? Aramas ra ekkekieki ena kapas eis ren fitepúkú ier. Ika esap efisien Kot, iwe tipisin ié? Pélúwen ekkena kapas eis repwe pélú lón en lesen mwirin ei.