LAKRWA i en keksoz ki bokou dimoun i kontan e respekte. The Encyclopædia Britannica i dir lakrwa i “senbol prensipal larelizyon Kretyen.” Parkont bann vre Kretyen zot, zot pa servi lakrwa dan zot ladorasyon. Akoz sa?

En rezon enportan pour sa i ki Zezi Kri pa ti mor lo en lakrwa. Sa mo Grek ki souvan ganny tradwir konman “lakrwa” i stau·rosʹ. Stau·rosʹ i senpleman “en poto drwat.” The Companion Bible i fer sa remark: “Zanmen [Stau·rosʹ] i vedir de bout dibwa ki’n ganny plase enn atraver kanmarad . . . Napa ni menm en mo Grek dan [Nouvo Testaman] ki pe donn lide de bout dibwa.”

Dan plizyer pasaz Labib, bann ekriven Labib i servi en lot  mo pour sa keksoz ki Zezi ti mor lo la. Sa i mo Grek xyʹlon. (Akt 5:30; 10:39; 13:29; Galat 3:13; 1 Pyer 2:24) Sa mo i senpleman vedir “dibwa” oubyen en “brans, poto lour, oubyen pye dibwa.”

Liv Das Kreuz und die Kreuzigung (Lakrwa e Krisifiksyon), ekrir par Hermann Fulda, i eksplike akoz zot ti souvan servi en senp poto pour egzekit en dimoun lo la: “Dan bann landrwa kot zot ti swazir pour fer legzekisyon, ti napa pye dibwa partou. Alor en senp poto ti ganny anfonse dan later. Bann kriminel ti ganny mete lo la, avek zot lanmen anler, swa anmare oubyen kloute, e souvannfwa zot lipye osi parey.”

Me laprev pli konvenkan i sorti dan Parol Bondye. Zapot Pol i dir: “Kris in liber nou avek malediksyon Lalwa, akoz i’n pran malediksyon dan nou plas, parey in ekri: ‘Modi sa ki ganny pann lo en pye dibwa [oubyen poto, NW].’” (Galat 3:13) La Pol pe sit Deterononm 21:22, 23, ki pa pe refer avek en lakrwa me plito en pye dibwa oubyen en poto. Kan en dimoun i ganny egzekite koumsa, i en “malediksyon.” Alors i pa apropriye pour bann Kretyen dekor zot lakaz avek bann zimaz oubyen stati Kris lo lakrwa.

Napa okenn levidans ki montre ki pandan sa premye 300 zan apre lanmor Kris, bann ki ti dir zot Kretyen ti servi lakrwa dan zot ladorasyon. Me dan katriyenm syek, en Lanperer payen Constantine, ti konverti pour vin swadizan Kretyen e i ti promot lakrwa konman en senbol Kretyen. Akoz Constantine ti fer sa, nou pa konnen. Me antouleka lakrwa napa nanryen pour fer avek Zezi Kri. An realite lakrwa i sorti dan en lorizin payen. New Catholic Encyclopedia i admet: “Lakrwa i ganny trouve dan bann kiltir avan lepok Kretyen e osi dan bann kiltir ki pa Kretyen.” Plizyer lezot liv referans in asosye lakrwa avek ladorasyon lanatir e bann koutim seksyel ki bann payen ti fer.

Be akoz sa senbol payen ti konmans ganny servi? I paret ki i ti fer li pli fasil pour bann payen vin swadizan Kretyen. Toudmenm Labib i klerman montre ki i mal pour reste atase avek okenn senbol payen. (2 Korentyen 6:14-18) Labib i osi dir ki nou pa devret ador zidol dan okenn fason. (Egzod 20:4, 5;  1 Korentyen 10:14) Alor, bann vre Kretyen i annan bon rezon pour pa servi lakrwa dan zot ladorasyon. *