1, 2. Ki Eliya ti bezwen fer e dan ki fason i ti diferan avek Aab?

ELIYA i anvi li tousel pour koz avek son Papa dan lesyel. Me, sa lafoul ki otour li fek vwar sa vre profet kriye pour ki dife i sorti dan lesyel e bokou parmi lepep i sirman zis anvi ganny son laprouvasyon. Avan ki Eliya i mont pli o lo Montanny Karmel pour koz avek Zeova dan lapriyer, i annan en keksoz ase difisil pour li fer. I bezwen al koz avek Lerwa Aab.

² Eliya ek Aab i de dimoun konpletman diferan. Aab ki dan son zoli lenz rwayal i en aposta, voras e i fasilman ganny enfliyanse. Me Eliya li, i dan son lenz ofisyel bann profet. Sa lenz i en rob senp ki tre probab in ganny fer avek lapo zannimo oubyen pwal kabri ouswa samo. I en zonm ki annan en kantite kouraz, lafwa ek lentegrite. Anmezir sa zour i fini, bokou i ganny revele lo tou le de zonm.

3, 4. (a) Akoz sa zour ti enn move pour Aab ek lezot adorater Baal? (b) Ki kestyon nou pou diskite?

³ I en move zour pour Aab ek lezot adorater Baal. Sa larelizyon payen ki Aab ek son madanm, Larenn Zezabel, i ankouraz sa dis tribi Izrael pour swiv in sibir en gro defet. Baal in ganny devwale konman en fo bondye. Menm si son bann adorater in koup koup zot lekor, danse e fer en kantite siplikasyon, sa fo bondye pa’n kapab alim en senp pti dife. Baal pa’n ni menm kapab protez sa 450 zonm ler zot in ganny egzekite. Me sa fo bondye pa’n reisi dan en lot domenn osi e byento sa i pou ganny met o kler. Pour plis ki trwa-z-an, bann profet Baal in enplor zot bondye pour termin sa lasesres ki pe ravaz sa pei, me Baal pa’n reisi fer li. Zeova pe al montre zot byento ki li ki annan tou pouvwar pour aret sa lasesres.​—1 Rwa. 16:30–17:1; 18:1-40.

⁴ Me, kan ki Zeova ti pou azir? Ki Eliya ti pou fer antretan anmezir ki i ti esper Zeova azir? Ki nou kapab aprann avek sa  zonm ki ti annan lafwa? Annou vwar anmezir nou egzamin sa resi.​—Lir 1 Lerwa 18:41-46.

5. Ki Eliya ti dir Aab fer? Eski Aab ti’n aprann en leson avek bann levennman ki ti’n arive sa zour?

⁵ Eliya ti apros Aab e dir: “Monte, manze e bwar, akoz i annan tapaz en gro lapli.” Eski sa move lerwa ti’n aprann en leson avek bann levennman ki ti’n arive sa zour? Sa resi pa dir spesifikman, me napa nanryen ki endike ki i ti’n repantir. I pa ti ni menm demann sa profet pour ed li apros Zeova e demann pardon. Plito, Aab ti zis “monte pour al manze e bwar.” (1 Rwa. 18:41, 42) Me ki Eliya ti fer?

6, 7. Lo kwa Eliya ti priye e akoz?

⁶ “Tandis ki Eliya, i ti mont anler lo latet Montanny Karmel e konmans prosternen e met son latet ant son de zenou.” Pandan ki Aab ti’n al ranpli son vant, Eliya ti sezi sa loportinite pour koz avek son Papa dan lesyel. Get byen pozisyon Eliya. I ti en siny limilite. I ti ater e i ti’n bes son latet sitan ba ki son figir ti pros pour tous avek son zenou. Ki Eliya ti pe fer?  Pa fodre nou reflesir pour konnen. Dan Zak 5:18, Labib i dir ki Eliya ti priye pour lasesres arete e i paret ki i ti fer sa lapriyer anler lo latet Montanny Karmel.

⁷ Pli boner, Zeova ti’n dir: “Mon deside pour fer lapli tonm lo later.” (1 Rwa. 18:1) Alor, Eliya ti pe priye pour ki lavolonte Zeova i ganny akonplir, zis parey Zezi ti ansenny son bann disip pour priye apepre mil an pli tar.​—Mat. 6:9, 10.

8. Ki legzanp Eliya i ansenny nou lo lapriyer?

⁸ Legzanp Eliya i ansenny nou bokou lo lapriyer. Lakonplisman lavolonte Bondye ti sa keksoz pli enportan ki Eliya ti pe mazinen. Kan nou priye, i byen pour mazin sa: “Si nou demann keksoz dapre lavolonte [Bondye], i pou ekout nou.” (1 Zan 5:14) Alor, i kler ki nou devret konn lavolonte Bondye pour ki nou lapriyer i akseptab. En fason pour fer sa i ler nou fer letid Labib vin en labitid dan nou lavi tou le zour. Sirman, Eliya osi ti anvi lasesres i fini akoz dimoun dan son pei ti pe soufer bokou. Tre probab, i ti vreman anvi remersye Zeova pour sa mirak ki I ti’n fer sa zour. Nou osi nou ti a voudre ki dan nou lapriyer nou demontre en rekonesans senser anver Zeova e osi lentere senser pour byennet lezot.​—Lir 2 Korentyen 1:11; Filipyen 4:6.

9. Ki Eliya ti demann son serviter pour fer e ki sa de leson ki nou kapab tire?

⁹ Eliya ti asire ki Zeova ti pou azir pour aret sa lasesres, me i pa ti asire kan ki Zeova ti pou azir. Alor, ki sa profet ti fer antretan? Remarke ki sa resi i dir: “I ti dir son serviter: ‘Silvouple, mont anler. Get ver direksyon lanmer.’ Alor, i ti mont anler e dir: ‘Napa nanryen.’ Apre pour set fwa i ti dir, ‘Ale retournen.’” (1 Rwa. 18:43) Nou aprann omwen de leson avek legzanp Eliya. Premyerman, konfyans ki sa profet ti annan dan Zeova e dezyenmman, lafason ki i ti veye.

10, 11. (a) Dan ki fason Eliya ti demontre konfyans dan promes Zeova? (b) Akoz nou kapab annan sa menm konfyans?

¹⁰ Vi ki Eliya ti annan konfyans dan promes Zeova, i ti anvi rod laprev ki Zeova ti pe al azir. I ti anvoy son serviter pli o anler  lo latet montanny pour get lo lorizon pour vwar si i ti napa okenn siny ki lapli ti pe vini. Kan i ti retournen, sa serviter ti dir san okenn lantouzyasm: “Napa nanryen.” Me, rapel byen, ki Eliya ti’n fek dir Lerwa Aab: “I annan tapaz en gro lapli.” Lorizon ti kler, i paret ki i ti napa okenn nyaz dan lesyel. Eski ou’n remark en keksoz drol? Ki mannyer sa profet ti’n kapab dir en keksoz koumsa si i ti napa okenn nyaz lo lorizon?

¹¹ Eliya ti konn promes Zeova. Konman profet ek reprezantan Zeova, i ti asire ki son Bondye ti pou tenir Son parol. Eliya ti telman annan konfyans, ki pour li, i ti konmsi i ti deza pe tann en gro lapli pe tonbe. I kapab ki sa i fer nou mazin lafason ki Labib i dekrir Moiz: “I ti reste ferm konmsi i ti pe war sa enn ki envizib.” Eski Bondye i sitan reel pour ou? Zeova i donn nou ase rezon pour annan sa kalite lafwa dan li e dan son bann promes.​—Ebr. 11:1, 27.

12. Ki Eliya ti fer pour montre ki i ti pe veye e ki mannyer i ti reazir ler i ti tande ki i ti annan en pti nyaz?

¹² Aprezan, annou vwar ki mannyer Eliya ti kontinyen veye. I pa ti reanvoy son serviter ankor zis enn oubyen de fwa, plito i ti reanvoy li set fwa! Petet, nou kapab mazinen ki sa serviter ti’n fatige ale vini pour fer menm zafer, me Eliya ti vreman anvi vwar en siny e i pa ti abandonnen. Finalman, apre son setyenm ale vini, sa serviter ti donn sa rapor: “Gete! I annan en pti nyaz ki pe monte sorti dan lanmer groser plak lanmen en zonm.” Eski ou kapab mazin sa serviter pe ouver son lanmen pour montre groser sa pti nyaz ki pe vini lo lorizon sorti dan sa Gran Lanmer? Petet sa serviter ti’n kapab mazinen ki sa nyaz pa nanryen. Me, pour Eliya, sa nyaz ti annan en gran lenportans. I ti donn son serviter sa lenstriksyon irzan: “Monte, dir Aab, ‘Met ou seval pare! Desann pour ki ou pa pri dan gro lapli!’”​—1 Rwa. 18:44.

13, 14. (a) Ki mannyer nou kapab kontinyen veye parey Eliya? (b) Ki rezon nou annan pour azir deswit?

¹³ Ankor enn fwa, Eliya in kit en bon legzanp pour nou. Nou osi nou pe viv dan en letan kot Bondye pou byento azir pour akonplir sa ki i’n dir. Eliya ti pe esper lafen lasesres e ozordi bann serviter Bondye pe esper lafen sa move lemonn. (1 Zan 2:17) Ziska ki Bondye i azir, nou bezwen kontinyen veye parey Eliya. Menm Zezi, Garson Bondye ti averti son bann disip: “Veye alor, akoz zot pa konnen ki zour zot Senyer pou arive.” (Mat. 24:42) Eski Zezi ti pe dir ki son bann disip pa ti  pou konn nanryen lo kan lafen ti pou vini? Non, akoz i ti koz bokou lo ki mannyer lemonn ti pou ete pandan bann zour avan ki lafen i arive. Nou tou nou kapab vwar lakonplisman sa siny detaye konsernan “lafen [oubyen “konklizyon sa sistenm,” NW].”​—Lir Matye 24:3-7.

¹⁴ Sak laspe sa siny i donn nou en laprev konkret e konvenkan. Eski sa laprev i ase pour motiv nou pour azir deswit dan nou servis pour Zeova? Zis en pti nyaz ki ti pe leve lo lorizon ti ase pour konvenk Eliya ki Zeova ti pe al azir. Eski sa profet fidel ti dezapwente?

15, 16. Ki bann levennman ki ti ariv vitman e ki Eliya ti’n kapab mazinen Aab ti pou fer?

¹⁵ Sa resi i dir: “I ti arive ki antretan lesyel ti vin nwanr avek nyaz ek divan e gro lapli ti konmans tonm for. E lo son seval, Aab ti kontinyen ale lo semen Yizreel.” (1 Rwa. 18:45) Bann levennman ti konmans ariv vitman. Anmezir ki serviter Eliya ti pe pas mesaz sa profet avek Aab, sa pti nyaz ti vin en mas nyaz ki ti ranpli lesyel e partou ti fernwanr. En gro divan ti soufle. Alafendefen, apre trwa-z-an edmi, lapli ti tonbe lo later Izrael. Sa later sek ti konmans bwar sa delo. Anmezir lapli ti tonm pli for ankor, larivyer Kisonn ti deborde e san dout i ti lav disan tou sa bann profet Baal ki ti’n ganny egzekite. Bann Izraelit rebel osi ti ganny sans pour pirifye zot avek fo ladorasyon.

¹⁶ Sirman, Eliya ti anvi elimin ladorasyon Baal, pa i vre! Petet i ti pe mazinen ki mannyer Aab ti pou reazir apre sa bann levennman. Eski Aab ti pou repantir e aret ador Baal? Bann levennman ki ti’n arive sa zour ti’n donn li ase rezon pour sanze. Byensir, nou pa konnen ki ti pe pase dan lespri Aab sa letan parski sa resi i zis dir ki lerwa ti ‘lo son seval e i ti kontinyen ale lo semen Yizreel.’ Ki i ti’n aprann? Eski i ti determinen pour sanz son mannyer? Bann levennman ki ti arive pli tar i montre ki larepons i non. Kantmenm sa, sa zour pa ti ankor fini ni pour Aab, ni pour Eliya.

17, 18. (a) Ki ti arive avek Eliya lo semen pour al Yizreel? (b) Kwa ki ti remarkab avek lafason ki Eliya ti taye sorti Karmel ziska Yizreel? (Vwar osi not anba lo paz.)

 ¹⁷ Profet Zeova ti konmans pran menm semen ki Aab ti’n pran. I ti pou bezwen marse pour plizyer kilomet, lo en semen byen fernwanr kot i ti annan labou partou kote. Me en keksoz drol ti arive apre.

¹⁸ “Lanmen Zeova ti lo Eliya, alor i ti anmar son lenz dan son leren e konmans taye e pas par devan Aab tou dilon ziska Yizreel.” (1 Rwa. 18:46) I kler ki “lanmen Zeova” ti pe azir lo Eliya dan en fason ekstraordiner. Yizreel ti en zistans 30 kilomet avek Karmel e sa profet pa ti zenn. * Zis mazin sa profet pe redi son lenz anler, anmar li dan son leren pour ki i kapab taye e apre i ti konmans tay dan sa labou. I ti tay sitan vit ki i ti zwenn saret lerwa e depas li.

19. (a) Lafors ek lenerzi ki Bondye ti donn Eliya i fer nou mazin ki profesi? (b) Anmezir ki Eliya ti taye pour al Yizreel, ki i ti konnen?

¹⁹ Pa sa ti vreman en benediksyon pour Eliya! Dwatet i ti en leksperyans eksitan pour li annan sa lafors, abilite ek lenerzi, petet menm plis ki ler i ti zenn. Petet, sa i kapab fer nou rapel bann profesi ki garanti en lasante ek lafors parfe pour bann dimoun fidel ki pou viv dan Paradi lo later. (Lir Izai 35:6; Lik 23:43) Anmezir Eliya ti tay lo sa semen, i ti sirman konnen ki i ti annan laprouvasyon Zeova son Papa, sa sel vre Bondye!

20. Ki mannyer nou kapab rod benediksyon Zeova?

²⁰ Zeova i vreman anvi beni nou. Annou rod son benediksyon akoz i vo lapenn donn tou pour tou pour ganny zot. Parey Eliya, nou bezwen kontinyen veye e egzamin atantivman bann levidans konkret ki montre ki Zeova i pros pour azir dan sa letan danzere e irzan. Parey Eliya, nou annan tou rezon pour met konfyans total dan bann promes Zeova, “sa Bondye laverite.”​—Ps. 31:5.