“Bann Temwen Zeova ti tret bann dimoun byen me zot ti osi tret mon bann lisyen byen. En zour, en madanm ki apel Elaine e ki ti pe debout o bor prezantwar, ti donn mon de lisyen biskwi. Depi sa zour, sak fwa nou ti pas pros avek sa prezantwar, mon de lisyen ti anvi al rod biskwi kot bann Temwen Zeova.

“Detrwa mwan ti pase. Mon bann lisyen ti kontinyen ganny biskwi e mwan mon ti annan bann pti konversasyon bref avek bann Temwen Zeova. Me kantmenm sa, mon pa ti anvi koz tro lontan avek zot. Mon ti annan plis ki 70 an e mon pa ti tro asire ki bann Temwen Zeova ti krwar ladan. Vi ki en kantite larelizyon Kretyen ti’n dezapwent mwan, mon ti’n deside ki i ti pou pli bon pour mwan etidye Labib lo mwan menm.

“Pandan sa letan, mon ti vwar lezot Temwen Zeova dan diferan parti lavil e zot osi zot ti pe debout o bor bann prezantwar. Zot osi zot ti zantiy. Zot ti toultan servi Labib pour reponn mon bann kestyon e avek letan mon ti annan plis konfyans dan zot.

“En zour, Elaine ti demann mwan, ‘Eski ou krwar ki bann zannimo i en kado sorti kot Bondye?’ Mon ti reponn li, ‘Wi, mon krwar ki zot en kado!’ Elaine ti lir Izai 11:6-9 avek mwan. Depi sa zour, mon ti anvi aprann konsernan Labib me mon pa ti anvi pran okenn magazin avek bann Temwen Zeova.

“Dan bann zour apre sa, mon ti fer bann pti konversasyon bref avek Elaine ek son msye Brent. Zot ti sizere ki mon lir liv Matye ziska Akt pour mwan konpran ki en Kretyen i devret fer. Alor, sanmenm sa ki mon ti fer. Pa bokou letan apre sa, mon ti dakor pour etidye Labib avek Brent ek Elaine. Sa ti ver milye lannen 2016.

“Mon ti vreman kontan pour etidye Labib e pour al renyon kot Lasal Rwayonm tou le semenn. Mon ti vreman kontan ki mon ti pe aprann sa ki Labib i vreman dir. En pti pe plis ki enn an pli tar, mon ti batize e vin en Temwen Zeova. Aprezan, mon annan 79 an e mon vreman rekonesan ki mon’n trouv sa vre larelizyon. Zeova in beni mwan parski in ed mwan pour vin enn son serviter e sa i fer ki mon form parti son fanmir.”