Delphine, ki nou’n koz lo la dan sa lartik avan, ti santi ki son bann problenm ti pe fer li konmans bwar tro bokou. Labib pa anpese bwar avek moderasyon me i dir: “Pa frekant bann bwarer diven.” (Proverb 23:20) Labi lalkol i souvan donn bann gro problenm lasante. I andomaz e kas bann relasyon e i koz lanmor plizyer milyon dimoun sak lannen. En bon pe sa bann problenm ti kapab ganny evite si dimoun ti swiv bann konsey saz Labib.

Sanmenm ki Delphine ti fer. Aprezan i dir: “Mon realize ki lakol pa ti pe rezourd mon bann problenm. Mon ti aplik sa konsey dan Filipyen 4:6, 7 ki dir: ‘Pa bezwen trakas pour nanryen, me . . . fer Bondye konn ou bann demann.’ Tou le swar ler mon ganny bann move panse e konmans enkyet, mon koz avek Zeova dan lapriyer. Mon ti dir Li tou mon bann santiman, enkli lakoler, sa ki pe fer mwan soufer, mon dezespwar e mon ti sipliy li pour ed mwan trouv bann fason pour vin pli pozitif. Dan bomaten, mon ti fer sir ki mon oubliy tou sa bann santiman. Sa labitid pour demann Zeova led pour mwan vin pli pozitif, ti ed mwan konsantre lo sa ki mon annan dan plas sa ki mon napa. Mon ti deside pour pa zanmen bwar lalkol ankor akoz mon pa ti anvi perdi sa lape lespri ki mon ti gannyen avek led Zeova.”

Imoralite seksyel i enn parmi bann rezon prensipal ki fer dimoun soufer. Me bann prensip Labib i kapab ed nou evit tousala par adres serten lakoz sa bann problenm. Par egzanp flirting e get pornografi. En zenn garson ki apel Samuel i dir: “I ti vreman fasil pour flirt. Par ler mon pa ti enterese avek sa lot dimoun, me vi ki mon ti konnen ki i dakor avek mwan sa ti fer li gou.” Dimoun ti souvan dir ki Samuel ti kontan flirt menm si i pa ti son lentansyon. Me vi ki zot ti pe dir sa, i ti deside flirt par ekspre. Me sa labitid ti fatig li. Aprezan i dir: “I danzere akoz i fer ou devlop bann tandans egois.”

Samuel ti lir en lartik pour bann zenn ki ti ganny pibliye lo sit Enternet jw.org. I ti reflesir lo Proverb 20:11 ki dir: “Menm en zanfan, i fer konnen par son konportman, si son bann aksyon pou pir e drwat.” Ki mannyer sa ti ed li? Samuel ti realize ki flirting pa ti ni pir ni drwat. Aprezan i dir: “Mon ti osi aprann ki en zenn ki flirt pe devlop bann kalite ki pou fer li vin en move konzwen. Mon ti konmans mazinen ler mon marye ki mannyer mon madanm ti pou santi si i vwar mwan pe flirt avek en lot madanm. Sa ti fer mwan realize ki sa labitid i danzere. I pa akoz i fasil pour flirt ki sa i fer li en bon keksoz.” Samuel ti sanze. Vi ki i’n aret flirt, sa in ed li evit imoralite seksyel.

Antonio ti adikt avek pornografi e sa ti fasilman kapab fer li komet imoralite seksyel. Menm si i ti’n marye avek en madanm ki i ti vreman kontan, i ti souvan pe get pornografi. I dir ki ler i ti reflesir lo 1 Pyer 5:8, sa ti vreman ed li. Sa verse i dir: “Kontinyen rezonn byen e kontinyen veye! Zot lennmi Dyab pe ale vini parey en lyon ki pe kriye pe rode lekel i pou devore.” Antonio i dir: “Bann portre pornografi i partou dan lemonn e sa bann portre i kapab reste dan nou lespri. Sa verse ti vreman ed mwan pour mazin lo lekel ki par deryer sa bann tantasyon. Mon ti bezwen toultan rapel ki pornografi i bann portre sorti kot Dyab. La mon konnen ki Zeova i kapab ed mwan pour ‘kontinyen rezonn byen e kontinyen veye’ pour ki mon kapab lager ek sa bann latak ki Dyab pe fer lo mon lespri, leker ek mon maryaz.” Antonio ti ganny sa led ki i ti bezwen e i’n rezet sa move labitid. Sa in ed li evit bann lezot pli gro problenm ankor.

I kler ki Labib i donn bann bon konsey ki kapab ed nou evit bann problenm grav. Me ki nou pour dir lo bann problenm ki persiste. Annou vwar ki mannyer Labib i kapab ed nou dan sa domenn.