Labib pa en liv medikal. Me i annan bann konsey pratik ki kapab ed en dimoun ki pe lite avek problenm lasante mantal. Annou vwar serten legzanp.

“Dimoun an bonn sante pa bezwen dokter, me bann ki malad ki bezwen dokter.”​—MATYE 9:12.

Labib i montre ki nou bezwen rod tretman medikal. Bokou dimoun ki annan en maladi mantal, in ganny led ler zot in al vwar en dokter ki’n donn zot lenformasyon egzakt konsernan zot problenm.

“Legzersis i bon pour lekor.”​—1 TIMOTE 4:8, Contemporary English Version.

Ler ou pran letan ek lenerzi pour fer legzersis, sa i kapab ede pour amelyor ou lasante mantal. Pour sa arive, nou bezwen annan en bon progranm legzersis, en bon ladyet e dormi byen.

“En leker ki dan lazwa i en bon latizann, me lespri demoralize i tir tou lafors en dimoun.”​—PROVERB 17:22.

Ler ou lir bann verse Labib ankourazan, i annan bann lobzektif ki ou kapab atenn e sa i  kapab fer ou zwaye. Si ou konsantre lo bann bon keksoz dan lavi e krwar ki i pou amelyore dan lavenir, sa pou ed ou fer fas avek ou problenm lasante mantal.

“Bann ki modes pou saz.”​—PROVERB 11:2.

Petet ou santi ki ou pa kapab fer tou keksoz lo ou menm, alor aksepte led ki lezot i donn ou. I tre probab ki ou fanmir ek ou bann zanmi i anvi ed ou me petet zot pa konnen ki pour fer. Les zot konnen kwa ki ou vreman bezwen. Pa ekspekte zot fer tro bokou pour ou e toultan rekonesan pour led ki zot donn ou.

“Mon pa ti santi mwan tro byen, alor mon ti koz avek en dokter. I ti dir mwan ki mon gannyen. Sa ti ed mwan pour vreman konpran mon sityasyon e i ti fer mwan konn diferan opsyon ki pou ed mwan avek mon lasante.”​—Nicole, a ki pe soufer avek bipolar disorder.

“Mon’n vwar ki ler mon lir Labib regilyerman avek mon madanm, sa i ed mwan pour konmans mon lazournen avek bann panse pozitif. Bann zour ki mon vwar mwan pe lite avek mon maladi, en verse spesifik i ankouraz mwan.”​—Peter, ki pe soufer avek depresyon.

“Mon ti kanmi e sa ti fer li difisil pour mwan koz avek lezot lo mon maladi. Me en zanmi ki pros avek mwan ti ekout mwan atantivman e i ti esey konpran ki mannyer mon ti pe santi. Apre ki mon ti’n koz avek li, mon ti santi mwan pli byen e mon konnen ki mon pa tousel.”​—Ji-yoo, ki pe lalit avek en maladi ki apel eating disorder.

“Labib in ed mwan pour vin en dimoun rezonnab, pour repoz byen e pa travay tro bokou. Lasazes ki dan Labib in ed mwan pour fer fas avek mon bann problenm emosyonnel ki mon pe lalit avek.”​—Timothy, ki pe fer fas avek obsessive-compulsive disorder.