EN KANTITE dimoun i konn sa resi dan Labib ki dir ki Zezi ti ganny met a mor lo en poto ant de kriminel. (Mat. 27:35-38) Labib i osi dir ki lekor Zezi ti ganny prepare pour lanterman e ganny met dan en latonm. Me serten dimoun i krwar ki sa pa egzakt.​—Mark 15:42-46.

Serten dimoun ki kritik bann Levanzil pa krwar ki bann Romen ti pou les en dimoun ki’n ganny met a mor ganny en lanterman parey lezot dimoun, tel parey ganny met dan en latonm. O kontrer, zot ti krwar ki en kriminel ki’n ganny met a mor ti ganny trete dan en lot fason. En zournalis ki apel Ariel Sabar ti eksplike akoz serten dimoun i krwar sa dan magazin Smithsonian. I dir: “Bann move dimoun dan lasosyete ki ti ganny krisifye e serten eksper i dir ki bann Romen pa ti pou zanmen vwar sa bann dimoun diny pour ganny en bon lanterman.” Bann Romen ti anvi imilye bann kriminel. Alor souvandfwa, zot ti kit lekor sa bann kriminel lo poto pour bann zannimo sovaz manze. Apre sa, zot ti anter restan lekor sa dimoun dan en trou kot zot ti met bann lekor mor.

Par kont, bann arkeolog in dekouver ki pour serten Zwif ki ti ganny met a mor, zot restan lekor pa ti ganny mete dan sa trou. An 1968, bann lezo en zonm ki ti’n ganny met a mor dan premye syek ti ganny dekouver dan en latonm Zwif pre avek Zerizalenm. Sa bann lezo ti dan en ossuary oubyen en kof kot lezo en dimoun mor i ganny mete. Parmi sa bann lezo, i ti annan en lezo talon ki ti’n ganny kloute lo en bout dibwa avek en klou ki ti mezir 11.5 santimet longer. Sabar i dir: “Sa lezo ti lezo talon en zonm ki ti apel Yehochanan. Sa lezo talon ti montre ki i kapab vre ki Zezi ti ganny met dan en latonm parey Levanzil i dir.” Osi “lezo Yehochanan ti montre ki dan letan Zezi, bann Romen ti permet en zonm ki ti’n ganny krisifye pour ganny antere dapre koutim lanterman bann Zwif.”

Kantmenm sa, lafason ki sa lezo talon i ete i fer dimoun annan diferan lopinyon konsernan lafason ki lekor Zezi ti ganny kloute lo sa poto. Me sa ki kler i ki serten kriminel ki ti ganny met a mor, ti ganny en lanterman e zot pa ti zis ganny zete dan en trou kot i ti annan bann lekor mor. Alor, sa levidans i siport sa ki Labib i dir konsernan lefet ki lekor Zezi ti ganny prepare pour lanterman e ganny met dan en latonm.

Zeova ti predir ki Zezi ti pou ganny antere dan latonm en zonm ris. Sa levidans i montre ki personn pa kapab anpes parol Zeova ganny akonplir.​—Iza. 53:9; 55:11.