Labib in vreman ganny enspire par Bondye

KI ZAPOT Pol ti anvi fer nou konpran letan i ti dir Labib in ganny “enspire par Bondye”? (2 Timote 3:16) Kan Pol ti ekrir sa verse dan langaz Grek, i ti servi en mo ki literalman vedir “soufle par Bondye.” Par sa, Pol ti montre ki Bondye ti servi son lespri sen pour gid bann ekriven Labib pour ekrir selman sa ki I ti anvi zot ekrir.

Zapot Pyer ti dir ki “se Sent-Espri ki’n pous zonm pour anons mesaz Bondye.” (2 Pyer 1:21; nou ki’n met  an italik.) Alor zapot Pol ti osi kapab dekrir bann liv Labib konman “Lekritir sakre, ki kapab donn ou lasazes ki kondir dan lavi eternel par lafwa dan Kris Zezi.”—2 Timote 3:15.

Bokou dimoun pa aksepte ki Bondye i loter Labib. Bann dimoun ki kritik Labib in direktman dir ki Labib i mal. Charles Marston sa arkeolog ti dir ki zot napa “okenn respe pour bann resi Labib.” Serten dimoun i dir ki i selman “en vye koleksyon lezann ek zistwar envante.”

Reflesir avan ou pran en desizyon

Alor, eski ou kapab met ou konfyans dan Labib? I enportan ki ou fer en bon desizyon lo sa size. Akoz? Si dan Labib i annan mesaz ki vreman sorti kot Bondye li menm, i pou bet e menm fatal pour ou inyor li. Si ou vwar Labib konman parol zonm olye Parol Bondye, sa pou annan en lefe lo lafason ki ou pou les Labib gid e enfliyans ou aksyon ek ou krwayans.—1 Tesalonisyen 2:13.

Kwa ki pou kapab ed ou pour met ou konfyans dan Labib? Kwa ki ti pou ed ou met ou konfyans dan en dimoun ki ou pa tro konnen? An realite, ou pou vwar li vreman difisil pour met ou konfyans total dan nenport ki dimoun ki ou pa konn byen. I selman apre ki ou’n pran letan pour konn en dimoun byen ki ou pou konnen si i vreman onnet e si ou kapab met konfyans dan li. Ou kapab aprann konn Labib dan sa menm fason. Pa fasilman aksepte okenn lopinyon oubyen menm bann teori ki napa laprev ki dekouraz dimoun pour met zot konfyans dan Labib, san poz okenn kestyon. Pran letan pour egzamin levidans ki siport parol zapot Pol kan i ti dir Labib in ganny “enspire par Bondye.”

Bann swadizan siporter Labib i kritik Labib

Pa bezwen dekouraze akoz sa bann ki dir zot siport Labib pe an menm tan dir ki i pa  egzakt e i pa en liv ki ou kapab met konfyans ladan. New Dictionary of Theology i dir ki konmela, menm si laplipar spesyalis Labib i dir zot Kretyen, zot “selman koz lo [Labib] konman en liv ki’n ganny ekrir par imen.”

Bokou profeser larelizyon i annan doutans lo lekel ki’n vreman ekrir bann liv Labib. Serten i dir ki profet Izai pa ti ekrir liv Izai, an dizan ki sa liv Labib ti ganny ekrir en bon pe letan apre ki Izai ti’n mor. Lowther Clarke i argimante dan son liv Concise Bible Commentary ki liv Izai in “ganny ekrir par plizyer dimoun ki’n viv dan plizyer zenerasyon.” Par kont, sa ki bann profeser larelizyon in dir pa annakor avek sa ki Zezi Kri ek son bann disip ti dir. Zot ti plizyer fwa montre ki se Izai ki’n ekrir liv Izai.—Matye 3:3; 15:7; Lik 4:17; Zan 12:38-41; Romen 9:27, 29.

Pli pir ankor, bann dimoun ki kritik Labib tel parey John Dummelow, en spesyalis Labib, i dir ki bann profesi dan liv Danyel “i plito bann levennman ki’n fini pase e sa loter in fer zot paret parey bann prediksyon ki depi lontan in ganny ekrir.” La ankor enn fwa, bann dimoun ki kritik Labib pa rekonnet sa ki Zezi Kri ti dir. Zezi ti averti dimoun kont sa ki i ti apel “dezolasyon abominab ki profet Danyel ti koz lo la, debout dan landrwa Sen.” (Matye 24:15; nou ki’n met an italik.) Eski i rezonnab alor, pour en Kretyen krwar ki Zezi Kri ti pou siport en mansonz par fer dimoun krwar en keksoz ki pa vre e siport dimoun ki pe fer bann levennman ki’n fini arive, pas pour bann profesi? Ditou!

Eski i fer okenn diferans?

Me petet ou kapab demande: “Eski i fer okenn diferans pour konnen lekel ki’n ekrir bann diferan liv Labib?” Wi, i fer en gran diferans. Ki kantite valer en dokiman ki sipoze annan dernyen swe ek testaman ou bon zanmi ki’n mor ti pou annan pour ou, si apre ou dekouver ki pa ou zanmi ki’n ekrir li? Fer krwar bann eksper i dir ou sa dokiman i en fek e ki bann dimoun ki ou konn byen in ekrir sa ki zot ti panse ti swe ou zanmi avek en bon lentansyon. Pa sa ti pou devalye valer sa dokiman? Eski ou ti pou annan konfyans total ki sa dokiman i port swe ou zanmi?

I menm parey avek Labib. Pa vwar li drol si bokou dimoun, menm bann ki dir zot Kretyen pa ezite pour inyor sa ki Labib i dir lo bann size parey lonnekte, seksyalite e lezot. Konbyen fwa ou’n tann dimoun dir dan en fason negatif: “Be sa i Ansyen Testaman!,” konmsi i napa bokou valer. Zot dir tou sa la, menm si zapot Pol in dekrir sa swadizan Ansyen Testaman konman “Lekritir sakre” ki’n ganny “enspire par Bondye.”

Me ou kapab dir: “Nou pa kapab zis inyor tou levidans ki bann eksper ek spesyalis in prezante.” Byensir non! Nou rekonesan ki bann letid avanse e onnet ki’n ganny fer in ed nou pour idantifye teks orizinal Labib. I kler ki bann pti fot in antre dan teks Labib anmezir ki in ganny kopye e rekopye pandan plizyer syek. Kantmenm sa, mazinen: I annan en gran diferans ant rekonnet ki i annan  bann pti fot ki’n antre dan teks Labib e pour pa aksepte Labib an antye par dir ki i panse imen.

Gard ou lafwa dan “Lekritir sakre”

Zis avan ki Pol ti dir ki Labib in ganny enspire par Bondye, i ti dir Timote akoz i ti neseser pour nou annan parol Bondye. I ti dir: “Dan bann dernyen zour, . . . bann move dimoun ek bann anbeter, zot pou fer touzour plis progre dan sa ki mal, zot pou anbet lezot e zot osi zot pou ganny anbete.” (2 Timote 3:1, 13) Sa ti pe deza arive dan letan Pol kot bann dimoun ki ti paret ‘saz e entelizan’ ti pe servi “bann bel diskour” pour tronp dimoun e afeblir zot lafwa dan Zezi Kri. (1 Korentyen 1:18, 19; Kolosyen 2:4, 8) Konman en proteksyon kont zot lenfliyans, zapot Pol ti ankouraz Timote pour “reste ferm dan sa ki [i ti’n] aprann depi son lanfans atraver Lekritir sakre” ki Bondye in donnen.—2 Timote 3:14, 15.

I annan menm lenportans pour ou fer sa pandan sa “bann dernyen zour.” Pa bezwen krwar ki ou pa pou zanmen ganny anbete par “bann bel diskour” ki bann dimoun byen malen i fer. Plito fer parey bann Kretyen dan premye syek, protez ou lekor par depan konpletman lo sa ki ou’n aprann dan Labib, ki vreman Parol enspire Bondye.

Temwen Zeova pou kontan ed ou pour batir ou lafwa dan Labib. Zot pou kapab ed ou vwar, par egzanp, ki mannyer Labib i en liv ki nou’n kapab vreman depan lo la tou dilon listwar imen; ki mannyer Labib i annakor avek lasyans; ki mannyer bann diferan liv Labib i an armoni avek kanmarad depi son premye liv ziska dernyen liv; ki mannyer bann profesi in ganny akonplir egzakteman parey ti’n ganny profetize e bokou, bokou plis. Si ou ti a kontan konn plis, pa ezite pour ekrir bann ki’n pibliy sa magazin pour ganny sa lenformasyon ki’n ed plizyer milyon dimoun ki annan leker senser pour vwar ki Labib i vreman Parol Bondye.

[Portre lo paz 5]

Kwa ki ti pou ed ou met ou konfyans dan en dimoun ki ou pa tro konnen?

[Portre lo paz 6]

Nou rekonesan ki bann letid avanse e onnet ki’n ganny fer in ed nou pour idantifye teks orizinal Labib