Eski ou dezapwente avek Bondye?

“AKOZ mwan? Akoz Bondye in les sa arive avek mwan?” Sa bann kestyon ti pe trouble Sidnei en garson 24 an sorti Brezil. I ti ganny en aksidan ki ti fer li reste dan wiltyer pour leres son lavi.

Bann soufrans ki arive akoz aksidan, maladi, perdi en dimoun ki nou kontan dan lanmor, en dezas natirel oubyen lager, i fer li fasil pour en dimoun dezapwente avek Bondye. Sa pa nouvo. Zob en zonm dan lepase ti pas atraver bann difikilte enn deryer lot. San konnen akoz i ti blanm Bondye. I ti dir: “Mon’n kriy osekour me ou pa’n reponn mwan; mon’n debout ou’n zis get mwan. Ou’n azir dan en fason kriyel anver mwan e ou’n atak mwan avek tou ou lafors.”​—Zob 30:20, 21.

Zob pa ti konnen akoz i ti pe sibir sa bann problenm, kote sa bann problenm ti sorti e akoz sa ti ganny permet. Erezman, Labib i ed nou konpran akoz sa bann keksoz i arive e osi ki mannyer nou devret reazir ler nou trouv nou dan sa bann sityasyon.

ESKI I TI DAN PLAN BONDYE POUR BANN DIMOUN SOUFER?

La sa ki Labib i dir nou sa konsernan Bondye: “Tou sa ki i fer i parfe, parski tou sa ki i fer i zis. En Bondye fidel ki pa zanmen enzis, i drwat e zis.” (Deterononm 32:4) Alor, eski i fer sans ki i ti pou dan plan en Bondye ki “drwat e zis” pour fer bann imen soufer oubyen servi bann maler pour pini oubyen pirifye zot?

O kontrer, Labib i dir nou: “Personn pa devre dir, ler i ganny tante, ‘Mon’n ganny tante par Bondye,’ parski Bondye pa kapab ganny tante par sa ki mal, e limenm i pa tant personn.” (Zak 1:13) Anfet, dan Labib nou lir ki Bondye ti donn limanite en konmansman parfe. I ti donn bann premye imen, Adan ek Ev, en zoli lakour, tou sa ki zot ti bezwen e en travay satisfezan pour fer. Bondye ti dir zot: “Fer zanfan e vin bokou, ranpli later, domin li.” Definitivman Adan ek Ev ti napa okenn rezon pour santi zot dezapwente avek Bondye.​—Zenez 1:28.

Me ozordi, kondisyon lavi pa ditou parey. Anfet, sityasyon bann imen tou dilon listwar in vin pli grav. Eski pa ou pou dakor ki: “Ziska aprezan tou lakreasyon Bondye pe soupire e soufer parey en madanm ki pe ganny baba.” (Romen 8:22) Ki’n arive?

AKOZ I ANNAN SOUFRANS?

Pour konpran akoz i annan soufrans, nou bezwen retourn kot i ti konmanse. Bondye ti’n donn Adan ek Ev lord pour pa manz fri dan “sa pye konnesans bon e move,” ki ti reprezant son standar lo sa ki byen ek sa ki mal. Me zot ti ganny tante par en move lanz ki pli tar ti ganny apele Satan oubyen Dyab. Dyab ti dir Ev ki i pa ti pou mor si i ti dezobei Bondye, alor i ti akiz Bondye konmkwa i en manter. Satan ti osi akiz Bondye ki i pe anpes bann dimoun lo later pour annan sa drwa pour deside kwa ki byen e kwa ki mal. (Zenez 2:17; 3:1-6) I konmsi Satan ti pe sizere ki limanite ti pou dan en pli bon pozisyon si Bondye pa ti pe diriz zot. Tousala ti soulev en kestyon enportan: Eski Bondye i annan drwa dirize?

Dyab ti osi soulev en lot kestyon. I ti akiz bann imen e dir ki zot servi Bondye akoz bann rezon egois. Konsernan sa zonm fidel Zob, Dyab ti dir avek Bondye: “Pa ou menm ou’n met en baraz otour li, otour son lakaz e otour tou sa ki i annan? . . . Me pour en sanzman, avans ou lanmen, silvouple e tous tou sa ki i annan e vwar si i pa pou modi ou dan ou figir.” (Zob 1:10, 11) Menm si Satan ti pe refer avek Zob i ti pe osi esey dir ki tou imen pe servi Bondye pour bann rezon egois.

LAFASON KI BONDYE IN REZOURD SA PROBLENM

Ki pli bon fason pour rezourd sa bann problenm enn fwa pour tou? Bondye sa Enn ki annan plis lasazes, i annan sa pli bon solisyon, setadir enn ki pa pou fer nou santi nou dezapwente. (Romen 11:33) I’n deside les imen domin zot prop lekor pour en serten letan e les rezilta montre dominasyon lekel ki pli siperyer.

 Bann move kondisyon dan sa lemonn ozordi i montre klerman ki dominasyon imen pa’n abouti dan nanryen ki bon. I pa zis ki bann gouvernman imen pa’n reisi anmenn lape, sekirite ek boner me zot in osi preski detri later. Sa i konfirm sa ki Labib i dir: “I pa pour en imen ki pe marse pour diriz son lepa.” (Zeremi 10:23) Zis lafason ki Bondye i dirize ki kapab garanti limanite en lape dirab, boner ek prosperite, akoz sa i son lavolonte.​—Izai 45:18.

Ki mannyer Bondye pou fer ki kondisyon imen in vin anliny avek son lavolonte? Rapel ki mannyer Zezi ti ansenny son bann serviter pour priye: “Ki ou renny i ganny etabli. Ki ou lavolonte i ganny akonpli lo later parey dan lesyel.” (Matye 6:10). Wi, dan son letan apropriye, atraver son Rwayonm Bondye pou retir tou sa ki pe koz soufrans. (Danyel 2:44) Lapovrete, maladi ek lanmor pou vin bann keksoz lepase. Konsernan bann pov, Labib i dir ki Bondye “pou sov sa enn pov ki pe kriy osekour.” (Psonm 72:12-14) Pour bann dimoun ki malad, Labib i promet: “Okenn zabitan pa pou dir: ‘Mon malad.’” (Izai 33:24) Menm konsernan bann dimoun ki’n mor ki dan memwar Bondye, Zezi ti dir, “Ler pe arive kan tou bann mor ki dan tonbo pou tann son lavwa, e zot pou sorti.” (Zan 5:28, 29) Sa i en zoli promes!

SIRMONT DEZAPWENTMAN

Diset an apre son aksidan, Sidnei, ki ganny mansyonnen lo konmansman sa lartik ti dir: “Mon pan’n zanmen blanm Bondye pour sa aksidan, me mon bezwen admet ki premye kou mon ti dezapwente avek li. I annan zour ki mon moral i vreman ba e mon plere ler mon mazin mon dezabilite fizik. Par kont, mon’n arive konpran atraver Labib ki sa aksidan pa ti en pinisyon sorti kot Bondye. Parey Labib i dir, ‘letan ek bann levennman san ekspekte i ariv lo nou tou.’ Priy avek Zeova osi byen ki lir bann verse spesifik in fer mwan vin pli for spirityelman e reste pozitif.”​—Eklezyast 9:11; Psonm 145:18; 2 Korentyen 4:8, 9, 16.

Ler nou gard antet rezon akoz Bondye i permet soufrans e ki mannyer son lefe pou byento ganny retire, sa i ed nou sirmont nenport santiman dezapwentman ki nou kapab annan dan Bondye. Nou asire ki Bondye i “rekonpans tou bann ki rod li.” Napa personn ki met lafwa dan li ek son garson ki pou dezapwente.​—Ebre 11:6; Romen 10:11.

[Portre lo paz 15]

Batir nou lafwa dan promes Bondye i ed nou sirmont nenport santiman dezapwentman ki nou kapab annan dan li.