MYANGO ma Bibe̱l mena mi tilabe̱ o Bebotedi 22:6 mi makwala ná, ponda a tano̱ a boṅsane̱ o bola jabea la dise̱ o wum’etum, Abraham ‘a no̱ngi bepasi ba wea ba jabea la dise̱, a bambe̱le̱ mo̱ mun’ao Isak, mo̱me̱ne̱ pe̱ alea we’a doi na diwe̱ndi; na babo̱ babane̱ bala.’

Betiledi be si malangwa o njika mbadi ba tano̱ be̱ ba bota wea o mińa ma Bibe̱l. Mukwaleye̱ ońola myango ma Bibe̱l mō̱ a mo̱nge̱le̱ jombwea din to̱ti ná “e wusa be̱ ndutu ná wea i tike jońa ni pond’a ńe̱se̱ ńa bwaba ba lo̱ndo̱” Abraham na Isak ba dangono̱. Ye so̱ ná e be̱ ná nje myango mi makwaleano̱ ye nde belongisan ba botane̱ wea.

Nde bape̱pe̱ bā ná jońse̱ la wea o mi mińa di si ta bu. E wusa be̱ bato lambo di bo̱bi, e we̱li te̱ be̱, o no̱ngo̱ makalando ma wea o mbo’a moyo ma mboa o botane̱ mo̱ wea buka wasa bota mo̱ wame̱ne̱. Jita la bamabie̱ ba mo̱nge̱le̱ ná nje Abraham a tano̱ alea o dia e ta nde ewa—pondapo̱ ew’a weya e tingabe̱ o ngo̱ko̱bi—yena e ta e be̱ne̱ makalando mano̱ngo̱be̱ o wea i botabe̱ bulu bo tombi. (Yes. 30:14) Makalando ba tano̱ ba bambe̱ ni mbadi ma wusa bolane̱ na mbudu ma wea o jońse̱ pe̱te̱ wea o to̱ njika pond’a lo̱ndo̱.