Abasi Ekere Aban̄a Onyụn̄ Okpono Iban

KE INI Jesus okodude ke isọn̄, enye ekenen̄ede anam n̄kpọ nte Ete esie. Enye ọkọdọhọ ete: “Ami nnamke baba n̄kpọ kiet ke odudu idemmi; edi kpa nte Ete ekekpepde mi kpa ntre ke ntịn̄ . . . koro nnamde n̄kpọ eke enemde enye esịt kpukpru ini.” (John 8:28, 29; Colossae 1:15) Ntem, edieke ikerede iban̄a nte Jesus ekesinamde n̄kpọ ye iban, nnyịn iyọfiọk nte Abasi esede iban ye se enye oyomde mmọ ẹnam.

Se ẹwetde ke mme Gospel anam ediwak mme ekpep n̄kpọ mban̄a Bible ẹdọhọ ke Jesus ikesehe iban nte mbon eyo esie ẹkesede. Didie? Ata akpan mbụme akam edi, Ndi ukpepn̄kpọ Jesus ke ọnọnọ iban ifụre mfịn?

Nte Jesus Akadade Iban

◼ Jesus ikekereke ke iban ẹsibiat irenowo. Mme adaiso ido ukpono mme Jew ẹkekere ke n̄wan ekeme ndibiat erenowo edieke enye adade ekpere erenowo. Ntre, owo ikesiyakke iban ẹneme nneme ye irenowo  ke eferife, owo ikesinyụn̄ iyakke n̄wan emi mîfụhọke n̄kpọ ke iso ọwọrọ an̄wa. Edi Jesus akakam ọdọhọ ke irenowo ẹkpenyene ndifara ke idem nnyụn̄ nnam n̄kpọ ukpono ukpono ye iban utu ke ndisari mmọ.—Matthew 5:28.

Jesus ọkọdọhọ n̄ko ete: “Owo ekededi eke osiode n̄wan esie ndọ onyụn̄ ọdọde efen esịn efịbe edue enye.” (Mark 10:11, 12) Jesus ikenyịmeke ye mme Jew oro ẹkedọhọde ke irenowo ẹkeme ndisio iban mmọ ndọ “ke ntak ekededi.” (Matthew 19:3, 9) Ata ediwak mme Jew ikenịmke ke erenowo emi esịnde efịbe edue n̄wan esie. Mme andikpep mmọ ẹkedọhọ ke erenowo emi esịnde efịbe iduehe n̄wan esie, ke n̄wan emi esịnde efịbe kpọt edue ebe esie. Ntre, nte n̄wed kiet emi esinamde Bible an̄wan̄a owụtde, “Jesus ndikọdọhọ ke ebe emi esịnde efịbe edue n̄wan esie n̄ko owụt ke enye ikosụhọkede iban itie, edi ke okokpokpono mmọ.”

Ufọn oro ukpepn̄kpọ Jesus enyenede mfịn: Iban ke esop Mme Ntiense Jehovah ẹsibuak idem ifụre ifụre ye irenowo ke mbono esop mmọ. Mmọ isikopke ndịk m̀mê irenowo ẹyese mmimọ ke enyịn use m̀mê ndibre idiọk mbre ye mmimọ. Ntak-a? Sia irenowo mmọ ẹsinam n̄kpọ ye ‘n̄kani iban nte mme eka, ẹnam ye n̄kparawa iban nte nditọeka iban ke ata edisana ido.’—1 Timothy 5:2.

◼ Jesus ama esikpep iban n̄kpọ. Jesus iketiehe nte mme andikpep eyo esie. Enye ama esikpep iban n̄kpọ onyụn̄ ayak mmọ ẹsioro uyo ke itie n̄kpọ. Jesus ndikenyịme ndikpep Mary n̄kpọ okowụt ke utom iban idịghe sụk editem udia m̀mê edinam n̄kpọ ke ufọk. (Luke 10:38-42) Ndien se Martha eyeneka Mary eketịn̄de ye Jesus ke Lazarus ama akakpa owụt ke Jesus ama ekpep Martha n̄kpọ n̄ko.—John 11:21-27.

Jesus ama esima ndikop ekikere iban. Ini oro, ediwak iban Jew ẹkekere ke se ikemede ndinọ n̄wan inemesịt edi ndiman eti eyen, akpan akpan prọfet. Emi akanam mma kiet emi okokopde ukwọrọikọ Jesus ọdọhọ ke eka emi akamande Jesus okop inemesịt! Edi Jesus ama anam enye ọfiọk se isinọde owo inemesịt. (Luke 11:27, 28) Jesus ama owụt ke iban ndinam n̄kpọ Abasi enen̄ede edi akpan n̄kpọ, idịghe uman nditọ nte mbon eyo oro ẹkekerede.—John 8:32.

Ufọn oro ukpepn̄kpọ Jesus enyenede mfịn: Mbiowo emi ẹsikpepde n̄kpọ ke esop Mme Ntiense Jehovah ẹsitiene ẹbụp iban mbụme ke mbono esop mmọ. Mmọ ẹsikpono iban emi ikọ ye edinam mmọ ẹwụtde ke mmọ ẹdi “mme ọnọ nti ukpep.” (Titus 2:3)  Mbiowo emi n̄ko ẹdiọn̄ọ ke iban emi ẹsitiene ẹkwọrọ eti mbụk Obio Ubọn̄ Abasi.—Psalm 68:11; se ekebe emi,  “Ndi Apostle Paul Ọkọdọhọ Iban Ẹkûsioro Uyo?” ke page 9.

◼ Jesus ama ekere aban̄a iban. Nditọ irenowo ke ẹkema ẹkan ke eyo Bible. N̄wed ibet mme Jew ọsọn̄ọ emi ete: “Ọfọfọn ọnọ owo emi enyenede irenowo irenowo; onyụn̄ ọdọdiọk ọnọ owo emi enyenede iban iban.” Ndusụk mme ete ẹkekere ke nditọiban ẹdi ntakurua—ke mmimọ idiyom ebe inọ mmọ kpa ye oro mmọ mîdikemeke ndise mmimọ enyịn ke ini usọn̄.

Edi Jesus ama anam n̄kpọ ndiwụt ke irenowo ifọnke ikan iban. Enye ama anam ekpri eyenan̄wan Jairus eset kpa nte enye akanamde ekpri eyeneren ebeakpa ke Nain eset. (Mark 5:35, 41, 42; Luke 7:11-15) Ke enye ama akanam idem ọsọn̄ n̄wan emi ekenyenede “spirit mmemidem ke isua efịteta,” Jesus okokot enye “eyen Abraham.” Udusọpke ukụt n̄wed mme Jew okotde n̄wan ntem. (Luke 13:10-16) Jesus ndiketịn̄ ikọ ukpono ukpono ntem ye n̄wan emi okowụt ke Jesus akada enye nte owo onyụn̄ okụt ke enye enen̄ede enyene mbuọtidem ke Abasi.—Luke 19:9; Galatia 3:7.

Ufọn oro ukpepn̄kpọ Jesus enyenede mfịn: N̄ke kiet ọdọhọ ke ndibọk eyenan̄wan onyụn̄ etie nte ndiduọk mmọn̄ ke in̄wan̄ owo. Nti ete emi ẹbakde Abasi isikereke n̄kpọ ntre, edi ẹsinen̄ede ẹse nditọiban mmọ enyịn kpa nte ẹsede nditọ irenowo. Mmọ ẹsidọn̄ kpukpru nditọ mmọ n̄wed—edide iban m̀mê irenowo—ẹnyụn̄ ẹtịm ẹse mmọ enyịn ke ini udọn̄ọ.

◼ Jesus ama enyene mbuọtidem ke iban. Ke esop mme Jew, ẹkesida ikọ iban nte ikọ emi ifịn ẹtịn̄de. Josephus emi ekesiwetde mbụkeset ke eyo mme apostle ọkọdọhọ ete: “Iban ikpetiehe ntiense ke esop sia owo mîkemeke ndibuọt idem ke se mmọ ẹtịn̄de.”

Edi Jesus ama ayak iban ẹketịn̄ ẹnọ mme apostle imọ ke imeset. (Matthew 28:1, 8-10) Mme apostle emi ikenịmke ikọ iban emi okposụkedi emi mmọ ẹkefiọkde ke nti iban emi ẹma ẹtiene ẹkụt ini emi ẹkewotde ẹnyụn̄ ẹbụkde Jesus. (Matthew 27:55, 56, 61; Luke 24:10, 11) Jesus ndikayak iban ẹbem iso ẹkụt enye ke enye ama ekeset okowụt ke enye ọbuọt idem ke iban onyụn̄ owụt ke iban ẹkeme nditiene irenowo ntie ntiense mban̄a imọ.—Utom 1:8, 14.

 Ufọn oro ukpepn̄kpọ Jesus enyenede mfịn: Mbiowo esop mme Ntiense Jehovah ẹsitiene ẹkop ekikere iban. Mme ebe emi ẹbakde Abasi ẹsikpono iban mmọ ke nditịm n̄kpan̄ utọn̄ ke ini mmọ ẹtịn̄de ikọ.—1 Peter 3:7; Genesis 21:12.

Item Bible Esinam Iban Ẹkop Inemesịt

Irenowo emi ẹkpebede Christ ẹsikpono iban ẹnyụn̄ ẹnọ mmọ ifụre nte Abasi okoyomde. (Genesis 1:27, 28) Utu ke nditiene n̄kere ke irenowo ẹfọn ẹkan iban, mme ebe emi ẹbakde Abasi ẹsidu uwem ye iban nte Bible etemede, ndien emi esinam iban mmọ ẹkop inemesịt.—Ephesus 5:28, 29.

Ke ini Yelena ọkọtọn̄ọde ndikpep Bible, ebe esie ama esifiomo enye etieti. Ebe esie okokpon ke ebiet emi mme owo ẹsidude uwem afai afai, emi irenowo ẹsiyịpde n̄wan ekededi emi mmọ ẹmade ẹkedọ. Yelena ọdọhọ ete: “Se n̄kadade nsọn̄ esịt edi se n̄kekpepde ke Bible. Mma mfiọk ke odu owo emi enen̄erede ama mi, ekere aban̄a mi, onyụn̄ ada mi ke n̄kpọ. Mma mfiọk n̄ko ke edieke ebe mi ekpepde Bible, ke enye idisifiomoke aba mi.” Se ikonyụn̄ itịbede edi oro ke ini ebe esie ekenyịmede ndikpep Bible onyụn̄ ana baptism nte kiet ke otu Mme Ntiense Jehovah. Yelena ọdọhọ ete: “Ebe mi ama enen̄ede afara ke idem. Nnyịn mbiba ima itọn̄ọ ndinen̄ede mfen kiet eken.” Kop se enye afiakde etịn̄ mi: “Item Bible enen̄ede anam n̄kụt ke mmenyene ufọn, onyụn̄ anam n̄kop inem ndọ nnyịn.”—Colossae 3:13, 18, 19.

Se Yelena obụkde emi esinyụn̄ etịbe ọnọ mbon en̄wen. Ata ediwak iban emi ẹbakde Abasi ẹkop inem ndọ mmọ sia mmọ ye mme ebe mmọ ẹnam se Bible etemede. Nditọete mmọ ẹsikpono mmọ, ẹdọn̄ mmọ esịt, ẹnyụn̄ ẹnọ mmọ ifụre.—John 13:34, 35.

Irenowo ye iban emi ẹbakde Abasi ẹfiọk ke okposụkedi emi mmimọ idide mme anamidiọk, ke ndisan̄a n̄kpere Jehovah Abasi anam mmimọ ifiọk ke iyọbọhọ ufụn idiọkn̄kpọ inyụn̄ ‘inyene ubọn̄ ubọn̄ ifụre nditọ Abasi.’ Nso utịbe utịbe idotenyịn ke Abasi ọnọ irenowo ye iban ntem!—Rome 8:20, 21.

[Ekebe ke page 9]

 Ndi Apostle Paul Ọkọdọhọ Iban Ẹkûsioro Uyo?

Apostle Paul ekewet ete: “Yak iban ẹdu ke ndopuyo ke esop.” (1 Corinth 14:34) Nso ke ikọ Paul ọkọwọrọ? Ndi ikọ esie ọkọwọrọ ke iban idiọn̄ọke n̄kpọ? Ihih. Ke akpanikọ, enye ama akam etịn̄ aban̄a nti n̄kpọ emi iban ẹkemede ndikpep mme owo. (2 Timothy 1:5; Titus 2:3-5) Idịghe iban kpọt ke Paul ọkọnọ item ke leta oro enye ekewetde ọnọ ẹsọk mbon Corinth. Enye ama asiak mbon oro ẹnyenede ukeme editịn̄ ikọ ke usem ye prọfesi ẹte ‘ẹdop uyo’ ke ini owo en̄wen ke esop etịn̄de ikọ. * (1 Corinth 14:26-30, 33) Etie nte ndusụk iban ẹma ẹsikop nduaidem ẹban̄a se mmọ ẹkpepde ẹnyụn̄ ẹbụp mbụme ẹtịmede ọkwọrọikọ. Paul ikoyomke utọ ndutịme oro aka iso, ntre enye ama ọdọhọ mmọ ‘ẹsibụp mme ebe mmọ n̄kpọ ke ufọk.’—1 Corinth 14:35.

[Footnote]

[Ndise ke page 10]

Jesus ama ọdọhọ Mary Magdalene eketịn̄ ọnọ mme apostle imọ ke imọ imeset

[Ndise ke page 11]

Mbon oro ẹdude uwem nte Bible etemede ẹsikpono ẹnyụn̄ ẹda iban ke n̄kpọ