Ẹkwọrọ ikọ ke ediwak usem ke Germany idahaemi ẹkan akpa ke ntak isenowo ye mbon itọkekọn̄ emi ẹdude do. Ibat otu ye mbon emi mîyọhọke kan̄a otu ama esịm 229 ke ufan̄ ọfiọn̄ usụkkiet kpọt. N̄kpọ nte mme asuanetop 800 emi ẹbaharede ẹdọn̄ ke otu 30 ke ẹkpep usem 13.

Nditọete ẹsika itie emi mbon itọkekọn̄ ẹdude ẹkekwọrọ ikọ. N̄wed emi ẹkenọde mme owo ke nsio nsio itie 200 emi ẹsidọn̄de n̄wed ke n̄kpọ ẹda ẹkwọrọ ikọ ama esịm n̄kpọ nte 640,000.

 Otu Emi Ẹsede Ẹban̄a Utom Mme Ntiense Jehovah ẹma ẹnyịme ẹda May, June, ye July 2016 ẹka san̄asan̄a ukwọrọikọ. N̄kpọ nte owo 700 emi ẹsisemde Arabic ẹma ẹto idụt itiaba ẹka itie duop ke Austria ye Germany ẹkekwọrọ ikọ ẹnọ ata ediwak mbon Arab.

Mme asuanetop 50 ke esop Faber’s Road, emi ẹsemde Kriol ke Belize, ẹsiwak ndisasan̄a ke ukot n̄ka ukwọrọikọ. Ata ediwak nditọete do inyeneke okụk, edi mmọ ẹsitat ubọk etieti. Isua ifan̄ ko, mmọ ẹma ẹtọn̄ọ ndisitan̄ kọins emi mmọ ẹkụtde ke mbenusụn̄ nte mmọ ẹsụk ẹkwọrọde ikọ ke ufọk ke ufọk. Ke utịt isua, mmọ ẹsitie ẹyet, ẹsat, ẹnyụn̄ ẹbat kpukpru kọins emi mmọ ẹketan̄de.

Kpa ye oro ediwak kọins oro ẹsidide n̄kpri okụk, se mmọ ẹsitan̄de kpukpru isua ẹsisịm dollar 225 (ebe ₦70,000). Mmọ ẹsibahade okụk oro ke itie iba, ẹda ubak kiet ẹse ẹban̄a Ufọkmbono Obio Ubọn̄ mmọ, ẹnyụn̄ ẹnọ enye eken ẹda ẹnam utom Abasi ke ofụri ererimbot.

Ini ibuot itieutom Mme Ntiense Jehovah ẹkenọde Brọda Anthony Griffin aka Burundi, ikọt Jehovah do ẹma ẹnyene ata san̄asan̄a mboho ke March 5, 2016. Ẹma ẹnam akamba ufọkutom radio kiet ẹbre kpukpru se ẹkekwọrọde ke mboho oro man Mme Ntiense ke ofụri idụt oro ẹkeme ndikop. Ẹdọhọ ke n̄kpọ nte owo miliọn inan̄ ẹkekop edinam oro.

Se ẹkebrede ke radio oro ama anam ediwak owo ẹkop ikọ Abasi, mme owo ẹma ẹnyụn̄ ẹtịn̄ nti n̄kpọ ẹban̄a edinam  oro. Ete kiet ke itie radio oro, emi eketienede anam ẹkop edinam oro, ọkọdọhọ ete, “Mbọk ẹka iso ẹnam utọ edinam emi.” Owo en̄wen emi anamde utom do ama ewet ete, ‘Ẹka iso ẹnam utọ edinam emi, sia emi ayanyan̄a ediwak owo.’ Ediwak mme awat a-taksi ye mme awat a-bọs ẹma ẹbre se ẹkekwọrọde ke moto mmọ.

Usen kiet mbemiso Editi eke 2016, nditọete ke ekpri otu kiet ke esịt esịt Nepal ẹma ẹkop ke mbon ikwọ ẹyom ndidi ndibre ikwọ ke ufọkn̄wed emi akadade adiana ufọk emi mmọ ẹkebọde man ẹnịm Editi, kpa ke usen Editi oro. N̄kpọ emi ama afịna mmọ etieti.

Utọ n̄kpọ oro esitie uyom uyom. Nte nditọete ẹkesụk ẹnamde itie Editi asana, owo emi akanamde ndutịm ikwọ oro ama ọdọhọ mmọ ete: “Mbufo idikopke n̄kpọ ndomokiet, ikwọ nnyịn kpọt ke ẹdikop.”

Ẹma ẹtọn̄ọ ikwọ uwemeyo oro, enye ama onyụn̄ ọsọn̄ uyo etieti. Kpa ye oro nditọete ẹkebọde spika emi okponde akan enye emi mmọ ẹkeyomde ndibọ akpa, mmọ ikokopke n̄kpọ ndomokiet. Nditọete ikọdiọn̄ọke se ẹkpenamde aba, ntre mmọ ẹma ẹbọn̄ akam ẹdọhọ Jehovah an̄wam mmimọ. Emi itetịn̄ mi, ediwak owo ẹdisịm itie Editi; edi ke ayakde minit 30 mbemiso ẹtọn̄ọde, uyom oro ama etre inikiet inikiet. Mmịn ama anam ndusụk owo ke itie oro ẹtọn̄ọ en̄wan, ndien bodisi ẹma ẹdi ẹditre edinam oro. Nditọete ẹma ẹnịm Editi ke ifụre ye ke emem.

Giuseppe emi edide asiakusụn̄ ofụri ini ke Italy esitie ke ufọk anam utom ọnọ kọmpeni emi ẹsinamde n̄kpọ  ẹban̄a Intanet. Ke May isua oko, enye ama etiene owo 70 ke itieutom mmọ odụk mbono emi ẹkenemede mbufa n̄kpọ emi ẹdinamde utom mmọ ọfọn. Ata akwaowo itieutom oro ọkọtọn̄ọ ke ndidọhọ ke enyene ndusụk ikpehe Intanet emi ẹkemede ndin̄wam mmimọ inam utom mmimọ enen̄ede ọfọn. Enye ama owụt mmọ ikpehe Intanet kiet. Idem ama akpa Giuseppe ndikụt ke ete oro okokụbọde jw.org. Ete oro ama ọdọhọ ete: “Idụhe ikpehe Intanet emi eyede ntem!” Enye ama ọtọn̄ọ nditịn̄ mban̄a nte ẹbonde n̄kpọ ke jw.org, nte ememde utom ndisọp n̄kụt se owo oyomde, ye ndiye ndise emi ẹdude do.

Giuseppe ama ọdọhọ ete: “Idem ama akpa mbon itieutom nnyịn ndikụt ibat usem emi ẹdọn̄de n̄kpọ ke  jw.org. Ke utịt mbono oro, eseutom nnyịn ama ọdọhọ kpukpru owo ye ata akwaowo itieutom nnyịn ete: ‘Giuseppe edi Ntiense Jehovah.’ Akwaowo oro ama ọdọhọ mi ete: ‘Ufọkabasi mbufo ẹdot itoro. Idụhe kọmpeni m̀mê n̄ka ekededi emi mîkpamaha nte ikpehe Intanet mbufo etiede. Mmọdiọn̄ọ ke idịghe ekpri utom ndise mban̄a ikpehe Intanet emi, ndidọn̄ mbufa n̄kpọ ke ubọk ke ubọk, ndinyụn̄ nnam emem owo utom ndikụt se enye oyomde.’ Bụt ama anam mi nte mmọ ẹketorode mi ntre ke n̄kpọ emi mbon en̄wen ẹkenamde. Edi esịt ama enem mi sia oro ama anam mbon emi mîkọdiọn̄ọke n̄kpọ ndomokiet iban̄a Mme Ntiense Jehovah ẹdiọn̄ọ. Idahaemi mmesineme ikọ Abasi ye ndusụk mbon itieutom nnyịn, mma nnyụn̄ ntọn̄ọ ukpepn̄kpọ Bible ye owo ita ke otu mmọ.” Kọmpeni mme Giuseppe ke ẹka iso “ndikpep” nte jw.org etiede, Giuseppe ke onyụn̄ aka iso ndikpep mbon itieutom mmọ Bible.

Enyene akparawa kiet ke Argentina emi ekerede Jorge. Ke ntọn̄ọ ntọn̄ọ 2010, eyen klas mmọ ama ọkwọrọ ikọ ọnọ enye. Ekem ẹma ẹtọn̄ọ ndida n̄wed Nso ke Bible Enen̄ede Ekpep? n̄kpep enye Bible. Enye ekesibre bọl ini oro. Enye ama ọdiọn̄ọ ndibre bọl tutu ọwọrọetop n̄ka bọl kiet ẹdọhọ enye edibre ọnọ mmimọ. Ke April 2014, n̄ka bọl kiet ke Germany ẹma ẹdọhọ enye edibre ọnọ mmimọ. Enye ama enyịme sia ama ọdọn̄ enye ndidi ata ebre bọl. Usen ifan̄ mbemiso Jorge oyomde ndidaha Europe, owo emi esikpepde mmọ bọl ama ọdọhọ enye ete: “N̄kọ afo edi Ntiense Jehovah? Kûka, editatak fi. Ini n̄kedide akparawa, n̄kedi Ntiense Jehovah. N̄ka bọl kiet ke Asia  ẹma ẹdọhọ ndibre bọl nnọ mmimọ. Mmọ ẹma ẹn̄wọn̄ọ ndinọ emi enyọn̄ ye isọn̄; n̄kpọ oro ama anam ibuot okpon mi. Ami ye ubon mi ima ika, edi ikọnyọn̄ idi ye idiọkesịt sia ikedịghe se ikekerede.” Jorge ọdọhọ ete: “Ikọ esie oro ama anam nnen̄ede n̄kere n̄kpọ, ntre mma mbiere ke ndikaha Europe aba. Ke 2015, mma ndi asuanetop nnyụn̄ nna baptism kpa isua oro.”

Ke September 2015, ẹma ẹnịm Akamba Mbono “Kpebe Jesus!” ke Kampala ke Uganda. Esịt ama enem mbon oro ẹkedụkde mbono oro etieti ke ini Brọda Mark Sanderson, owo Otu Emi Ẹsede Ẹban̄a Utom Mme Ntiense Jehovah, okosiode Edisana N̄wed Abasi​—⁠Edikabade Eke Obufa Ererimbot ke usem Luganda.

Eyen ukpepn̄kpọ Bible kiet ọkọdọhọ ete: “Esịt ama enem mi tutu ini n̄kọbọde ediye Bible emi! Ini oro ke pope okoyom ndidi. Mbon ufọkabasi ẹma ẹnyam n̄kwa akam ‘emi ẹdiọn̄de’ man ẹnyene okụk ẹda ẹben̄e idem. Ẹkenyam n̄kwa oro dollar 30 (n̄kpọ nte ₦10,000). Ediwak owo emi ẹkeyomde n̄kwa oro man ẹbọ edidiọn̄ oro ikenyeneke okụk idep. Edi okịm mma mbọ ata edidiọn̄ ke mfọn. Jehovah ọkọnọ kpukpru mbon oro ẹkedide mbono Bible; owo ikedepke-dep, ẹkenọ okụk ke imaesịt. Kpukpru usen, mma n̄kot Ikọ Jehovah ke usem emana mi, emi esinam nnen̄ede ndiọn̄ọ Jehovah, mmesinyụn̄ n̄kụt nte enye ọdiọn̄de mi. Mmọkọm Jehovah etieti nte enye ọnọde mi Bible.”

Ikpọ owo ufọkabasi ke Congo (Kinshasa) emi ẹkeyomde se ẹtịn̄de ẹbiat www.mt711.com, ẹma ẹkpep mbon  ufọkabasi mmọ ke Mme Ntiense Jehovah ẹsimịn̄ n̄wed mmọ ke an̄wa ifọt. Man ẹnam mme owo ẹnịm se mmọ ẹtịn̄de, mmọ ẹma ẹdọhọ ke “www” ada aban̄a 666 emi ẹtịn̄de ẹban̄a ke n̄wed Ediyarade. (Edi. 13:18) Emi ama anam ndusụk owo emi ẹkesikpepde Bible ẹtre ndikpep.

Ebe ye n̄wan kiet emi ẹdide mme asiakusụn̄ ẹma ẹbọn̄ akam ẹban̄a n̄kpọ emi ẹnyụn̄ ẹkot kpukpru mbon emi mmọ ẹsikpepde Bible ẹte ẹsan̄a ye ebe ye iban mmọ ẹdi ufọk. Owo ita ke otu oro ẹma ẹsan̄a ye ebe ye n̄wan mmọ ẹka. Ke mmọ ẹma ẹkedia n̄kpọ ẹma, nditọete oro ẹma ẹwụt mmọ vidio Ẹtịm Mme Ntiense Jehovah man Ẹkwọrọ Eti Mbụk. Se isenowo oro ẹkekụtde ama anam mmọ ẹdiọn̄ọ ke se ẹketịn̄de ẹban̄a n̄wed nnyịn edi nsu. Urua oro eketienede, ete kiet emi eketienede n̄wan esie edi ama eyịre mme asiakusụn̄ oro ete ẹbọ dollar 100 (n̄kpọ nte ₦32,000) ẹnọ ẹsịn ẹnam utom Abasi, kpa ye oro enye mîkọtọn̄ọke ndikpep Bible kan̄a.

Kpa ye oro nditọete ke esịt esịt Papua New Guinea mînyeneke Intanet ke edem mmọ, mmọ ẹnen̄ede ẹyom ndikpep mbufa ikwọ Obio Ubọn̄. Ntre nditọete ke esop Mundip ẹsidọn̄ eyenete kiet aka obio emi ekperede mmọ. Isidịghe ekpri isan̄​—⁠esidi hour iba ke ukot, hour iba ke bọs. Eyenete oro ama esịm do, enye esidụk Intanet, okụbọde obufa ikwọ onyụn̄ ewet ikọ ikwọ oro esịn ke n̄wed esie, ekem afiak ọnyọn̄ edi ediwet ke obukpọk ke Ufọkmbono Obio Ubọn̄ ọnọ nditọete eken. Kpukpru nditọete ẹsiwet mbufa ikwọ emi ẹdikwọde ke mbono esop. Esinem mmọ tutu nditiene nditọete mmọ ke ofụri ererimbot n̄kwọ mbufa ikwọ ntoro Jehovah.