Ena ulutaga qo

•  Na cava na veibuku?

•  Vakacava o sa rawa ni veibuku?

  Eso era nanuma me ka ni vaqitoqito na veibuku. Ia ena ulutaga qo e vakaibalebaletaka ni qori na gauna rau na veimaliwai tiko kina o cauravou kei goneyalewa me rau vakadeitaka rau na veiwatini se sega. Kena ibalebale, na inaki ni veibuku mo vakawati, e sega ni gauna mo taleitaka tu ga na vakaitokani kei na dua na tagane ke o yalewa, se yalewa ke o tagane.

 Ni toso tiko nomu veibuku o na qai vakadeitaka mo vakawati se sega. Mo tu vakarau tale ga ni ciqoma na kena itinitini.

 Bibi me nanumi: Ke o nanuma ni o sa rawa ni veibuku, kena ibalebale o sa vakadeitaka ni ganiti iko mo vakawati.

  Na veibuku e rawa ni tini ena vakawati. Mo vakasamataka tiko gona eso na itovo ena rawa ni yaga se vakaleqa na nomu veibuku. Qo eso na kena ivakaraitaki:

•   Veimaliwai e vale. Ni o nuiqawaqawa, e vakacava nomu ivakarau ni veimaliwai vei rau nomu itubutubu se vei ratou na tacimu? Na ka o cakava vei ratou nomu vuvale ena laurai tale ga ena nomu veimaliwai kei watimu.

   iVakavuvuli vakaivolatabu: “Me kau tani vei kemuni na yaloca, na cudrucudru, na yalokatakata, na karakara, na vosavakacaca kei na ka ca kece va ya.”—Efeso 4:31.

   Mo taroga: ‘Vakacava ratou raica noqu vuvale niu dokai ratou? Ni o vakaraitaka na nomu nanuma, vakacava o dau vakaraitaka ena yalomalua se o dau yalototolo ni o tauca na vosa kaukaua?’

•   Vakuai iko. Ni o sa vakawati e bibi mo kauaitaka na ka e vinakata o watimu, se mo vakuai iko ena ka e vinakata.

   iVakavuvuli vakaivolatabu: “Me kua ni dua e qara na ka e yaga ga vua, me qara tale ga na ka e yaga vei ira tale eso.”—1 Korinica 10:24.

   Mo taroga: ‘Au dau vinakata me rogoci ga noqu nanuma? E kilai niu dau yalorawarawa? Au vakaraitaka vakacava niu kauaitaka e liu na ka era vinakata eso qai muri o yau?’

•   Yalomalumalumu. Na isa ni vakawati vinaka ena vakaraitaka nona cala qai kere veivosoti.

   iVakavuvuli vakaivolatabu: “Eda dau tarabe kece.”—Jemesa 3:2.

   Mo taroga: ‘Au dau vakaraitaka noqu cala, seu dau vunitaka? Au dau cudrucudru ke ra vakadodonutaki au eso?’

•   iLavo. E dau vakavu veiba vakalevu vei ira na veiwatini na ilavo. Ia ena sega ni yaco qori ke o vakayagataka vakavuku.

   iVakavuvuli vakaivolatabu: “O cei vei kemuni e via tara e dua na valececere ena sega ni dabe mada me cakacakataka na kena isau, me raica se sa veirauti me vakaotia kina se sega?”—Luke 14:28.

   Mo taroga: ‘Vakacava au dau maroroi ilavo, seu dau dinau vakalevu? Au vakaraitaka tiko vakacava niu rawa ni maroroi ilavo?’

•   Bula vakayalo. Ke o iVakadinadina i Jiova, e dodonu me tiko nomu ituvatuva dei ni vuli iVolatabu kei na tiko ena soqoni.

   iVakavuvuli vakaivolatabu: “Era marau o ira na kauaitaka nodra bula vakayalo.”—Maciu 5:3.

   Mo taroga: ‘Au dau saga meu vaqaqacotaka tiko ga na noqu vakabauta? Vakacava e bibi ena noqu bula noqu ituvatuva vakayalo, seu dau vakalaiva eso na ka me vakaleqa na noqu cakava qori?’

 Bibi me nanumi: O koya me watimu ena vinakata e dua na isa ni vakawati vinaka. Ke o sasaga vakaukaua mo cakava qori ena rawarawa sara ni o kunea e dua na kemu isa e tautauvata na nomudrau rai.