“Xwe ɖé lɛ́ ɖíe ɔ, adohu adohu ce syɛ́n sɔmɔ̌ b’ɛ cí nú mì ɖɔ zo cí wɛ un nɔ ɖe gbe bǐ gbe ɖɔhun. Hwe énɛ́ lɛ́ nu ɔ, nyiɖée huhu jí wɛ un lin tamɛ dó. Un ba ná kú dandan ǎ. Un ba kpowun ɖɔ wǔvɛ́ e mɔ wɛ un ɖe é ní nɔ te.”—Jonathan, xwe 17.

 Ðo dobanúnǔ ɖé mɛ ɔ, è kan nǔ nú byɔ́ wěmaxɔmɛ linsinmɛ tɔn sín wěmaxɔmɛví 14000 mɔ̌, bɔ ɖibla nyí 1 ɖo 5 jí ɖɔ ɖɔ émí ko lin tamɛ dó émíɖée huhu jí dó nǔjɔnǔ mɛ ɖo sun 12 e wa yi lɛ́ é mɛ. a Ényí a mɔ ɖɔ é kún sɔ́ byɔ́ ɖɔ émí ní nɔ gbɛ ó ɔ, étɛ́ a ka sixú wa?

•   Yi agbɔ̌n jí. Kán ɖ’é jí ɖɔ émí kún ná nɔ kplakpla jí dó wa nǔ ó. É ná bo cí ɖɔ tagba towe lɛ́ ɖo gǎn hú we wɛ ɔ, wlɛnwín lɛ́ ɖe bo sixú d’alɔ we bɔ a nɔ kplɔ́n lěe a ná ɖí xwi xá yě gbɔn é.

 A sixú lin ɖɔ ɖěwagbɛn kún sɔ́ ɖe nú tagba émítɔn lɛ́ ó. Amɔ̌, nǔ e è lín lɛ́ é bǐ wɛ nɔ nyí nǔgbó hwebǐnu ǎ. Ali e nu a ná ɖí xwi xá tagba towe ɖe lɛ́ é tíin; nú è d’alɔ we dó nǔjɔnǔ mɛ kpó xomɛnyínyɔ́ kpó ɔ, ali e nu a ná ɖí xwi xá tagba ɔ ɖe é sixú sɛkpɔ́ we hú lěe a lin gbɔn é.

•  Nǔgbódodó Biblu tɔn: “È fyɔ́n mǐ ɖo ali bǐ nu, amɔ̌, mǐ ján bónú tɛnsisɛ gló ǎ; mǐ dán ɖěwagbɛn, amɔ̌, fí gbɔn tɔ́n hán ǎ.”—2 Kɔlɛ́ntinu lɛ́ 4:8.

   Wěɖexámɛ: Ényí hwiɖée huhu sín linlin lɛ́ syɛ́n tawun alǒ kpo ɖo fínɛ́ hǔn, yi ba alɔdó e tíin nú we é. A sixú ylɔ́ azɔ̌xwé e nɔ kpé nukún dó kpo gbo nyi ali jí nú mɛɖée huhu wú é alǒ dotóo e nɔ yá wǔ wá sɔ́ mɛ lɛ́ é. È ko kplɔ́n lěe è ná d’alɔ mɛ gbɔn é mɛ e nɔ w’azɔ̌ ɖo fí énɛ́ lɛ́ é, bɔ yě ka ba nǔgbó nǔgbó bo ná d’alɔ we.

•   Ðɔ xó xá mɛɖé. Mɛ e nǔ towe nɔ ɖu ayi mɛ ná lɛ́ é ɖe bo jló ná d’alɔ. Xɔ́ntɔn towe lɛ́ kpó xwédo towe sín hǎgbɛ́ lɛ́ kpó ɖo mɛ énɛ́ lɛ́ mɛ; a ma ka ɖɔ nǔ e mɛ dín gbɔn wɛ a ɖe lɛ́ é nú yě ǎ ɔ, yě ná tuun ǎ.

 Mɛɖé lɛ́ ɖó hudó cíci tɔn cóbá mɔ nǔ ganjí. Ali ɖokpó ɔ nu ɔ, xɔ́ntɔn ɖé sixú d’alɔ we bɔ a ná lin tamɛ dó tagba towe lɛ́ jí ganjí.

•  Nǔgbódodó Biblu tɔn: “Xɔ́ntɔn jɔ xɔ́ntɔn . . . ɔ, . . . è hɛn ɔ, è ná ɖeji dó [wǔ tɔn] adǎngbomɛ hwenu.”—Nǔnywɛ́xó 17:17, nwt.

   Wěɖexámɛ: Bo ná dó bɛ́ xóɖɔɖókpɔ́ ɔ, a sixú ɖɔ: “Un ɖó linlin masɔgbe gěgé azǎnví élɔ́ lɛ́ mɛ. Un sixú ɖɔ xó xá we d’é wú a?” Alǒ a sixú ɖɔ: “Un ɖo tagba ɖé lɛ́ ɖí xwi xá wɛ, b’ɛ cí ɖɔ nyiɖésúnɔ kún sixú ɖe yě ɖɛ ó. A ba ná d’alɔ mì a?”

•   Yi mɔ dotóo. Lanmɛ ná nɔ ganjí sín tagba e ɖí xwi xá wɛ mɛɖé ɖe lɛ́ é, ɖi adohu adohu alǒ linkpɔ́nzɔn, sixú zɔ́n bɔ é sɔ́ ná ba ná nɔ gbɛ ǎ. Wɛn ɖagbe ɔ wɛ é nyí ɖɔ è hɛn ɔ, è ná gbɔ azɔn mɔ̌hun lɛ́.

 Lěe lɛ̌nkpɔ́n sixú zɔ́n bɔ nǔɖuɖu ná gɔn mɛɖé jló gbɔn é ɔ, mɔ̌ ɖokpó ɔ wɛ linkpɔ́nzɔn sixú zɔ́n bɔ jlǒ e mɛɖé ɖó bo ná nɔ gbɛ é ná blí bú. É ɖo mɔ̌ có, azɔn we lɛ́ bǐ wɛ è hɛn ɔ, è ná gbɔ.

•  Nǔgbódodó Biblu tɔn: “Mɛ e sín lanmɛ ɖo ganjí lɛ́ é ɖó hudó dotóo tɔn ǎ, amɔ̌, mɛ e ɖo azɔn jɛ wɛ lɛ́ é ɖó hudó tɔn.”—Matíe 9:12.

   Wěɖexámɛ: Nɔ d’amlɔ ganjí, bo nɔ lɛ́ ba lanmɛ kpɔ́n ganjí, lobo nɔ lɛ́ ɖu nǔɖuɖu hunsin ɖagbe tɔn lɛ́. Lěe a ɖe gbɔn ɖo agbaza mɛ é sixú wa nǔ dó linlin e a nɔ ɖó dó gbɛ wú é wú.

•   Xo ɖɛ. Biblu ɖɔ Gbɛɖótɔ́ mǐtɔn “kló hú ayi mǐtɔn bo tuun nǔ bǐ.” (1 Jaan 3:20) Étɛ́wú a ma ka ná xo ɖɛ sɛ́dó è égbé ǎ? Zǎn nyǐkɔ tɔn Jexóva ɔ, bo ɖɔ lěe nǔ cí nú we nǔgbó nǔgbó é n’i.

 Tagba ɖé lɛ́ syɛ́n tawun bɔ hwiɖokpónɔ sixú ɖe yě ɖɛ ǎ. Gbɛɖótɔ́ towe Jexóva ɖo gbesisɔmɛ bá d’alɔ.

•  Nǔgbódodó Biblu tɔn: “Mi ní nɔ byɔ́ nǔ Mawu . . . ; énɛ́ ɔ, fífá Mawu tɔn e zɛ nukúnnúmɔjɛnǔmɛ bǐ wú é ná nya xɛ ɖo ayi mitɔn kpó linlin mitɔn kpó jí.”—Filípunu lɛ́ 4:6, 7.

   Wěɖexámɛ: Gɔ́ nú xó ɖiɖɔ nú Jexóva dó tagba towe lɛ́ wú ɔ, è hwe bǐ hǔn, tɛ́n kpɔ́n bo lin tamɛ dó nǔ ɖagbe e wú a sixú dó kú n’i dó égbé é ɖokpó wú. (Kolósinu lɛ́ 3:15) Nǔsumɛnukúnmɛ ɖiɖe xlɛ́ sixú zɔ́n bɔ a ná ɖó linlin ɖagbe hú gǎn dó gbɛ wú.

 Ényí a mɔ ɖɔ é kún sɔ́ byɔ́ ɖɔ émí ní nɔ gbɛ ó hǔn, ba alɔdó. Nǔ e Jonathan e xó mǐ ɖɔ ɖo bǐbɛ́mɛ é wa é nɛ́. É ɖɔ: “É byɔ́ ɖɔ ma ɖɔ xó gěgé xá mɛjitɔ́ ce lɛ́ bo lɛ́ ba alɔdó dotóoxwé tɔn ɖé lɛ́. Amɔ̌, é ɖo te kpɔ́n wɛ tawun din. É nɔ wá su hweɖélɛ́nu bɔ wǔ nɔ kú mì có, un sɔ́ nɔ ɖó linlin mɛɖée huhu tɔn ǎ.”