Tomam Yehowa Sɛɛradoma, tiregeri dɔla la Kristakɔma pu’usegɔ wuu Yezu n yuun pa’alɛ se’em ti a tuntuneba la me yuun dɔla la. Zaseŋɔ wa poan, to wan sɔsɛ to sakɛ bo yelese’a la gi’a gi’a.

1.   Naayinɛ. Tomam pu’useri la yelemɛŋɛrɛ Gaŋɛ Za’a Naayinɛ ayina ma’a n de Naaŋɔdaana ti a yu’urɛ dɛna Yehowa la. (Yooma 83:18; Liligere 4:​11) Eŋa n de Abraham, Moses la Yezu Naayinɛ la.​—Yɛhega 3:6; 32:11; Yon 20:17.

2.   Bible. Baabule. To sakɛ ti Baabule la dela Naayinɛ yelesum ti a doose a vo’osum la poan dekɛ bo asaala. (Yon 17:17; 2 Timoti 3:​16) To sakɛ bo sɛla woo la, ze’ele la Baabule la gɔnɔ 66 la za’a waabi n de “Old Testament” la “New Testament” la poan. Gɔnmi’ila Jason D. BeDuhn yuun basɛ ti yele wa niɛ peelum mɛ, la eŋa n yuun gulesɛ ti Yehowa Sɛɛradoma “n sakɛ bo sɛla la ze’ele la Baabule la poan ge daɣɛ bamam n ti’iseri se’em.” a

    La nɔɔ boi bim ti to sakɛ bo Baabule la za’a mɛ ge la san dɛna ti to tee to bɔkeri yɛla ase’a se’em, to ni eŋɛ la bala. To baŋɛ ti, ba dekɛ la maɣesa gulesɛ Baabule la zɛ’ɛsi ase’a ge ti la vuurɛ daɣɛ sɛla n kɔ’ɔn gulesɛ gã la.​—Liligere 1:1.

3.   Yezu. To tari la Yezu Krista pa’alegɔ la a makesonɛ la tuna tuuma ge me na’asa en la eŋa n de to Fãara la Naayinɛ Dayɔa la. (Matu 20:28; Tooma 5:​31) Bala la, to dela Kristakɔma. (Tooma 11:26) Ge la bala za’a, to zamesɛ Baabule la poan ti Yezu daɣɛ Gaŋɛ Za’a Naayinɛ la ge ti Tirinitaasuŋa me daɣɛ Baabule pa’alegɔ.​—Yon 14:28.

4.   Naayinɛ Na’am la. Bu dela saazuo gɔmɛt ge daɣɛ sɛla n yeen bɔna Kristakɔma suuren. Gɔmɛt kana n wan sa’am gɔmɛt woo ge basɛ ti Naayinɛ puti’irɛ tum teŋgɔŋɔ wa zuo. (Daniel 2:​44; Matu 6:​9, 10) La kan yue, wana wa za’a wan sirum tum se’ere n sɔi la, Baabule yetɔɣebiŋa pa’alɛ ti to boi la “ba’ahegɔ dabeha la” poan.​—2 Timoti 3:​1-5; Matu 24:​3-​14.

    Yezu n de Naayinɛ Na’am la n boi saazuo la Naba. A pɔsɛ bisega la 1914.​—Liligere 11:15.

5.   Fãarɛ. Yezu lua bunɔ la n sɔi ti to wan ta’an nyɛ fãarɛ be’em la kum poan. (Matu 20:28; Tooma 4:​12) Nɛra san wan ta’an nyɛ nyuurɔ Yezu kum la poan, la nari ti a tara sakerɛ, eŋɛ teere a vom poan ge muse ko’om. (Matu 28:19, 20; Yon 3:​16; Tooma 3:​19, 20) Nɛra itigɔ n pa’alɛ ti a sirum tari sakerɛ. (Yames 2:​24, 26) La bala za’a, to kan ta’an faaɛ tomea ge la dela “Yenɛ zo’ohogɔ” la.​—Galatia 2:​16, 21.

6.   Saazuo. Yehowa Naayinɛ, Yezu Krista la malesi la boi la saazuo sa. b (Yooma 103:19-​21; Tooma 7:​55) Nɛreba fii wa n de 144,000 ti ba wan isige ba keŋɛ saazuo ti ba ta naɛ la Yezu di Na’am.​—Daniel 7:27; 2 Timoti 2:​12; Liligere 5:​9, 10; 14:​1, 3..

7.   Teŋgɔŋɔ la. Yehowa yuun naam teŋgɔŋɔ wa bo la asaala ti la dɛna a yire yɛ’ɛsa. (Yooma 104:5; 115:16; Pa’ala 1:4) Naayinɛ wan kã bo sɛba n nani en la ti ba tari imma’asum la daarewoo nyɔvore paradiisi poan teŋgɔŋɔ wa zuo.​—Yooma 37:11, 34.

8.   Be’em la namesegɔ. Wana wa yuun pɔsɛ la se’em ma’a ti Naayinɛ maleka ayima eŋɛ kpenkpasi la. (Yon 8:​44) Maleka wa ti ba yi’ira en “Sitaana” la “Kolkpabɛ’a” la, n yuun pã’asɛ yia buraa la a pɔɣa la ti ba naɛ la en. Bala basɛ ti namesegɔ la wuŋerɛ n paɛ ba yaasi. (Pin’ileŋɔ 3:1-6; Arom 5:​12) Naayinɛ bo la yɔ’ɔ ti be’em la namesegɔ bɔna la wan eŋɛ se’em ti a maalɛ Sitaana n ta’asɛ yelese’a la ge A kan basɛ ti la ana bala wuusa.

9.   Kum. Sɛba n ki la ka bɔi zɛ’an zɛ’an. (Yooma 146:4; Pa’ala 9:​5, 10) Ba ka boi teŋmɔlega poan namesa.

    Naayinɛ wan isige nɛreba zo’e zo’e kum poan. (Tooma 24:15) Nɛresɛba n isige la san zaɣesɛ Naayinɛ pa’alegɔ, ba wan nyɛ sa’aŋɔ ge kan le isige kum poan.​—Liligere 20:14, 15.

10.   Deodoma. To sakɛ bo la Naayinɛ n pa’alɛ pɔɣedire yele se’em ti buraa ayina la pɔka ayina n nari ti ba naɛ taaba bɔna san daɣena yalumtuuma ma’a n wan ta’an basɛ ti ba basɛ taaba. (Matu 19:​4-9) To tari suure lua ti yɛm sebo n boi Baabule la poan la n soŋeri deodoma ti ba tara pupeelum.​—Epesus 5:22–​6:1.

11.   To pu’usegɔ. To ka na’aseri punpudɔɔ la bii sɛla wɔ̃sum. (Tɛɛnhegɔ 4:​15-​19; 1 Yon 5:​21) Yelese’a n de ninmɔ’ɔrɛ to pu’usegɔ poan dela yele ana:

    •   Zusera Naayinɛ.​—Filipi 4:6.

    •   Kaala ge zamesa Baabule la.​—Yooma 1:​1-3.

    •   Ti’isa taɣesa to zamesɛ sɛla Baabule la poan.​—Yooma 77:12.

    •   Laɣena la taaba zusa, zamesa baabule, yuuna, tɔɣera to sakerɛ yele ge me kpɛmesa taaba giila.​—Kolose 3:16; Hebru 10:23-​25.

    •   Mɔɔla “sɔ’ɔlom yelesoma” la.​—Matu 24:14.

    •   Soŋera sɛba n eeri soŋerɛ.​—Yames 2:​14-​17.

    •   Mɛta ge maala Na’am Pu’usegɔ Deto la zɛse’esi ti to tara tuna to teŋgole wa za’a waabi Baabule pa’alegɔ tuuma.​—Yooma 127:1.

    •   Yeledi’ima soŋerɛ tuuma.​—Tooma 11:27-​30.

12.   To tigere la. To tigese tomea la tansuga poan ge tara keendoma tigesego n biseri tansuga la. Ge, keendoma la daɣɛ nɛŋadoma ge me ka tɔ’ɔsa yɔɔrɛ. (Matu 10:8; 23:8) To ka to’oseri ligeri bii ita kɔlɛksin to zamesegɔ poan. (2 Korint 9:7) Nɛreba n yese ba suuren bɔ’ɔra bo’olum soŋera to tuuma la.

     Tigere Zuo Bisegadoma la dela Kristakɔma fii wa n kumesɛ bɔna to tigere zuo la poan ge pa’ala Yehowa Sɛɛradoma teŋgole wa za’a waabi na’am tuuma la n wan kena se’em.​—Matu 24:45.

13.   To tari la nɔyinɛ. Teŋgole wa za’a waabi poan, to sakerɛ dela buyina. (1 Korint 1:​10) To tiregeri mɛ ti, to kan basɛ ti nɛreba nɛ’ɛsegɔ welege to. (Tooma 10:34, 35; Yames 2:4) Ge to nɔyinɛ la bo to yɔ’ɔ mɛ ti to ta’an kɔ’ɛ to puti’irɛ tum tuunɛ. Sɛɛradaana woo ni kɔ’ɛ a puti’irɛ ti la makɛ la a putɛkeeŋa la ti a dekɛ Baabule kumesɛ ka la.​—Arom 14:​1-4; Hebru 5:​14.

14.   To sareŋɔ. To kɔ’ɔn mɔɔra mɛ ti to tara suure poan nɔŋerɛ to sɛla woo poan. (Yon 13:34, 35) To ka iti yelese’a n wan daam Naayinɛ suure, n de wuu to tara gilema bɔ’ɔra ziim ge me kan tɔ’ɔsa ziim. (Tooma 15:28, 29; Galatia 5:​19-​21) To dela suma’asumdoma ge me ka dekɛ tomea kɛ̃’ɛsɛ zaberɛ poan. (Matu 5:9; Isaiah 2:4) To tari la gilema bɔ’ɔra gɔmɛt zɛsɛka woo ti to bɔna ge me nana teŋa la wara la san kan giisɛ Naayinɛ nɔya.​—Matu 22:21; Tooma 5:​29..

15.   Tomam la nɛreba teŋasuka bɔŋa. Yezu yuun yeti: “Nɔŋɛ ho tadaana wo hom n nɔŋɛ ho mɛŋa se’em la.” A yuun le yele Kristakɔma ti ba da dekɛ bamea “bo teŋa wa zuo” yɛla. (Matu 22:39; Yon 17:16) Bala la, to kɔ’ɔn tiregera mɛ ti “to eta nɛra woo soŋa,” ge me kɔ’ɔn sɛ ze’ele ti to kan dekɛ tomea kɛ̃’ɛsɛ nalɛɣerɛ yɛla poan ge me kan dekɛ tomea naɛ la pu’usegɔ ase’a. (Galatia 6:10; 2 Korint 6:​14) Ge to ka tɔɣeri giisera sɛba n loe ti ba eŋɛ sɛla yele aŋa poan la.​—Arom 14:12.

 Ho san tara sokere ase’a pa’asɛ ti ho bɔta ti ho baŋɛ Yehowa Sɛɛradoma n sakɛ bo sɛla, ho wan ta’an kaalɛ to yɛla zo’e zo’e to intanɛt tuuma zɛ’an la bii ho yi to ɔfisi ayima bii ho keŋɛ zamesegɔ to Na’am Pu’usegɔ Deo n pɔ̃ri hɔ bii ho tɔɣɛ bo Sɛɛradaana n boi ho gingilega la poan.