Etẹwẹ Biblu Dọ Gando Nunamẹ Go?
Gblọndo Biblu tọn
Biblu na tulimẹ nado nọ nanúmẹ sọn ojlo mẹ wá po mẹwhinwhàn dagbe de po. E dohia dọ nunamẹ mọnkọtọn nọ hẹn ale wá, e ma yin na mẹhe mọ nunina lọ yí kẹdẹ gba, ṣigba na mẹhe nanúmẹ lọsu. (Howhinwhẹn lẹ 11:25; Luku 6:38) Jesu dọmọ: “Ayajẹ sù to nunamẹ mẹ hú to mimọyi mẹ.”—Owalọ lẹ 20:35.
Whetẹnu wẹ nunamẹ nọ hẹn homẹhun Jiwheyẹwhe?
Nunamẹ nọ hẹn homẹhun Jiwheyẹwhe to whenue e yin bibasi sọn ojlo mẹ. Biblu dọ dọ: “Mì gbọ mẹdopodopo ni basi kẹdẹdile e ko magbe etọn to ahun etọn mẹ do, e ma yin po awuwhiwhle po kavi po huhlọn yí do hẹnmẹ po gba, na Jiwheyẹwhe nọ yiwanna nunamẹtọ homẹhunnọ.”—2 Kọlintinu lẹ 9:7.
Nunamẹ sọn ahun mẹ wá yin apadewhe “sinsẹ̀n-bibasi” wunmẹ he Jiwheyẹwhe nọ kẹalọyi tọn. (Jakọbu 1:27) Mẹhe nọ gbọn alọtútlú dali gọalọna mẹdevo lẹ to azọ́nwa alọ to alọmẹ hẹ Jiwheyẹwhe, podọ Jiwheyẹwhe nọ pọ́n alọtútlú mọnkọtọn hlan taidi ahọ́ de he emi dù do mẹlọ. (Howhinwhẹn lẹ 19:17) Biblu plọnmẹ dọ Jiwheyẹwhe lọsu wẹ na suahọ nunamẹtọ lọ.—Luku 14:12-14.
Whetẹnu wẹ nunamẹ ma nọ hẹn homẹhun Jiwheyẹwhe?
Whenue nunina lọ yin bibasi po mẹwhinwhàn agọ̀ po. Apajlẹ delẹ die:
Nado hẹn awuji mẹlẹ.—Matiu 6:2.
Nado mọ nude yí lẹkọ.—Luku 14:12-14.
Nado tẹnpọn nado họ̀ whlẹngán.—Salmu lẹ 49:6, 7.
Eyin nunamẹ mítọn nọgodona aṣa kavi nuyiwa he Jiwheyẹwhe jẹagọdo lẹ. Di apajlẹ, e ma sọgbe nado na akuẹ mẹde, na e nido hòakọ, zan amasin adínọ kavi nùahànmú. (1 Kọlintinu lẹ 6:9, 10; 2 Kọlintinu lẹ 7:1) Mọdopolọ, e ma sọgbe nado nanú mẹde he gán penukundo ede go to akuẹzinzan-liho ṣigba bo gbẹ́ nado wàmọ.—2 Tẹsalonikanu lẹ 3:10.
Eyin e na glọnalinamẹ nado hẹn azọngban he Jiwheyẹwhe zedo alọmẹ namẹ di. Biblu plọnmẹ dọ tatọ́ whẹndo tọn lẹ dona penukundo nuhudo whédo yetọn tọn go. (1 Timoti 5:8) E ma na sọgbe dọ tatọ́ whẹndo tọn de ni nọ nanú mẹdevo lẹ sọmọ bo dovọ́na hagbẹ whẹndo tọn etọn lẹ. Mọdopolọ, Jesu gblewhẹdo mẹdelẹ he nọ gbẹ́ ma nado penukundo mẹjitọ mẹhomẹ yetọn lẹ go gbọn didọ dali dọ nutindo emitọn lẹpo yin “nunina de he ko yin kinklandowiwe hlan Jiwheyẹwhe.”—Malku 7:9-13.
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN
Duvivi Ale He Nunamẹ Nọ Hẹnwa lẹ Tọn
Nunamẹ nọ wà dagbe na nunamẹtọ lọ po mẹdevo lẹ po. E nọ hẹn nuwadopọ po họntọnjiji po yọnbasi. Nawẹ a sọgan yin nunamẹtọ homẹhunnọ de gbọn?
FỌ́N!
Nuhe Nọ Hẹn Ayajẹ Wá—Pekọ po Alọtútlú Po
Mẹsusu nọ dọ dọ nutindo lẹ po adọkun po wẹ nọ hẹn ayajẹ po kọdetọn dagbe po wá. Amọ́, be akuẹ po nutindo lẹ po nọ hẹn ayajẹ dẹn-to-aimẹ wá nugbonugbo ya? Etẹwẹ numimọ lẹ dohia?
KANBIỌ HE MẸSUSU NỌ KANSE LẸ
Fie Wẹ Kunnudetọ Jehovah Tọn lẹ Nọ Mọ Akuẹ te Nado Wà Azọ́n Yetọn Lẹ?
Pọ́n lehe azọ́n yẹwhehodidọ lẹdo aihọn pé tọn mítọn fọ́n bo to nukọnyi do mahopọnna dọ akuẹ kavi mado-ao ma nọ yin ṣinṣinyan.
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.