HAMILI ang maayo nga mga abyan, kag wala lang matabuan ang matuod nga pag-abyanay. Kon may problema sa pag-abyanay, paano ini masolbar? Madamo kita sang matun-an sa mga ginsambit sa Biblia nga may matuod nga mga abyan pero sang ulihi may posibilidad nga madula ang ila pag-abyanay.

Si David, nga manugbantay sang karnero kag hari, may maayo nga mga abyan. Ang isa sa ila amo si Jonatan. (1 Sam. 18:1) Pero may iban pa nga abyan si David, pareho ni manalagna Natan. Wala ginsambit sa Biblia kon san-o sila nag-abyanay. Pero isa ka bes, may gintu-ad sia kay Natan pareho sang pagtu-ad sang isa sa iya abyan. Gusto ni David nga magpatindog sang balay ni Jehova. Ginpabaloran sang hari ang opinyon ni Natan kay abyan niya sia kag yara sa iya ang espiritu ni Jehova.—2 Sam. 7:2, 3.

Pero may natabo nga makaguba kuntani sang ila pag-abyanay. Nakighilawas si Hari David kay Bat-seba, kag sang ulihi, ginpapatay niya ang bana ni Bat-seba nga si Urias. (2 Sam. 11:2-21) Pila ka tuig nga nangin matutom si David kay Jehova kag ginapadapat niya ang hustisya. Pero nakahimo  sia sining mabug-at nga sala! Ngaa nakasala ining maayo nga hari? Wala bala niya nahibaluan kon daw ano kalain ang iya ginhimo? Naghunahuna bala sia nga puede niya taguon ang iya sala sa Dios?

Ano ang himuon ni Natan? Pabay-an na lang bala niya nga iban ang magpatalupangod sini sa hari? May mga nakahibalo kon paano ginpapatay ni David si Urias. Gani ngaa mapasilabot si Natan kag irisgo niya ang ila madugay na nga pag-abyanay? Mahimo pa gani nga patyon sia kon himuon niya ini. Kay ginpapatay gani ni David si Urias bisan inosente sia.

Pero humalambal sang Dios si Natan. Nahibaluan sang manalagna nga kon maghipos sia, maapektuhan ang ila pag-abyanay ni David kag ang iya konsiensia. Nakasala ang iya abyan nga si David kag wala nahamuot si Jehova. Dapat buligan gid ang hari para mapabalik ang iya kaangtanan kay Jehova. Huo, kinahanglan gid ni David ang matuod nga abyan. Kag si Natan isa sini. Ginhambalan niya ang manugbantay sadto nga nagagamit sing ilustrasyon nga makapahulag sa iya. Ginsugid ni Natan ang mensahe sang Dios pero sa paagi nga marealisar ni David kon daw ano ka daku ang iya sala kag mapahulag sia nga maghinulsol.—2 Sam. 12:1-14.

Ano ang imo himuon kon may abyan ka nga nakahimo sing mabug-at nga sala? Basi mangatarungan ka nga kon suknaan mo sia, maguba ang inyo pag-abyanay. Ukon mahimo batyagon mo nga daw nagluib ka sa iya kon isugid mo ang iya sala sa mga gulang, nga makabulig kuntani sa iya sa espirituwal. Ano ang himuon mo?

Si Gianni, nga nasambit na, nagsiling: “Natalupangdan ko nga may nagbag-o sa amon pag-abyanay. Nagapangalag-ag na si Maurizio sa akon. Gani gintinguhaan ko nga istoryahon sia parte sa sini bisan pa nga nabudlayan gid ako. Nagpalibog ako: ‘Ano abi ang isiling ko sa iya kay nakahibalo naman sia? Basi maakig gid sia!’ Pero sang ginpanumdom ko ang tanan namon nga gintun-an, nangisog ako nga istoryahon sia. Ginhimo man ini sadto ni Maurizio sang nagakinahanglan ako sing bulig. Indi ko luyag nga maguba ang amon pag-abyanay, pero gusto ko nga buligan sia kay nagaulikid ako sa iya.”

Si Maurizio nagsiling: “Sinsero si Gianni kag husto sia. Nahibaluan ko nga indi niya sala ukon ni Jehova ang akon malain nga nadangatan. Gani ginbaton ko ang disiplina, kag sang ulihi nakapanumbalik ako sa espirituwal.”

May iban pa nga suod nga abyan si David nga nag-unong sa iya sa mabudlay nga mga kahimtangan. Ang isa sini amo si Husai, nga ginsambit sa Biblia nga “abyan ni David.” (2 Sam. 16:16; 1 Cron. 27:33) Mahimo nga isa sia ka opisyal sang palasyo kag suod nga abyan sang hari, kag kon kaisa sia ang ginasugo sang hari nga himuon ang kompidensial nga mga mando.

Sang gin-agaw ni Absalom nga anak ni David ang ginharian, madamo nga Israelinhon ang nagsuporta sa iya, pero wala mag-upod si Husai. Nag-upod sia kay David sa pagpalagyo. Nasakitan gid si David kay ginluiban sia sang iya anak kag sang iban pa nga ginasaligan gid niya. Pero gin-unungan sia ni Husai, nga handa magrisgo sang iya kabuhi para tapnaon ang pagrebelde. Wala lang ini ginhimo ni Husai bangod responsibilidad niya bilang opisyal sang palasyo kundi isa man sia ka matuod nga abyan.—2 Sam. 15:13-17, 32-37; 16:15–17:16.

Makalilipay mahibaluan nga nahiusa subong ang mga kauturan bisan ano man ang ila papel ukon asaynment sa kongregasyon. Daw ginasiling nila paagi sa ila mga ginahimo nga, “Wala ako napilitan sa pagpakig-abyan sa imo. Ginhimo ko ini kay importante ka sa akon.”

 Amo sini ang naeksperiensiahan sang isa ka utod nga si Federico. Ginbuligan sia sang iya suod nga abyan nga si Antonio sang may problema sia. Sia nagsiling: “Sang nagsaylo sa amon kongregasyon si Antonio, nag-abyanay kami dayon. Mga ministeryal nga alagad kami, kag nagabuligay kami. Wala magdugay, gintangdo sia nga gulang. Magluwas nga mag-abyan kami, napalig-on ako sang iya maayo nga halimbawa.” Pero nakasala si Federico. Nangayo sia dayon sing bulig sa espirituwal, pero nataktak sia sa pagkapayunir kag ministeryal nga alagad. Ano ang reaksion ni Antonio?

Si Federico nagsiling: “Mabatyagan ko nga nasakitan man si Antonio. Gintinguhaan gid niya nga buligan ako sa emosyon. Ginbuligan gid niya ako sa espirituwal kag wala niya ako ginpabay-an. Ginpalig-on niya ako nga pabakuron ko liwat ang akon espirituwalidad kag indi mag-untat.” Si Antonio nagpaathag: “Pirme ako nagaupod kay Federico. Gusto ko nga indi na sia magpangalag-ag sa akon, kag isugid niya bisan ang iya kasakit nga nabatyagan.” Sang ulihi, nagbakod liwat sa espirituwal si Federico, kag natangdo sia liwat nga payunir kag ministeryal nga alagad. Si Antonio naghinakop: “Bisan tuhay na ang amon kongregasyon, suod gihapon kami.”

Ano ang batyagon mo kon ginpabay-an ka sang imo suod nga abyan sang kinahanglan mo gid ang iya bulig? Masakit gid ini. Mapatawad mo pa bala sia? Indi bala maapektuhan ang inyo pagkasuod sadto?

Binagbinaga ang natabo kay Jesus sang katapusan nga mga inadlaw sa iya kabuhi. Pirme niya kaupod ang iya matutom nga mga apostoles, kag suod gid sila. Gintawag gani sila ni Jesus nga iya mga abyan. (Juan 15:15) Pero ano ang natabo sang gindakop sia? Nalagyo ang mga apostoles. Nagsiling si Pedro nga indi gid niya pagbiyaan ang iya Agalon, pero sina mismo nga gab-i, ginpanghiwala niya si Jesus!—Mat. 26:31-33, 56, 69-75.

 Nahibaluan ni Jesus nga sia na lang ang magaatubang sang iya katapusan nga pagtilaw. May rason sia nga maglain ang iya buot. Pero pagligad sang pila ka adlaw sa tapos sia nabanhaw, maathag sa iya pagpakig-istorya sa iya mga disipulo nga wala maglain ang iya buot, naakig, ukon nasubuan. Wala na gin-ungkat ni Jesus ang mga kakulangan sang iya mga disipulo, lakip ang ila ginhimo sang gab-i nga gindakop sia.

Sa baylo, ginpalig-on ni Jesus si Pedro kag ang iban nga apostoles. Ginpakita niya nga nagasalig sia sa ila paagi sa paghatag sa ila sing mga instruksion parte sa pinakaimportante nga hilikuton sang pagtudlo sa kasaysayan sang tawo. Abyan gihapon ang pagkabig ni Jesus sa iya mga apostoles. Indi gid nila malipatan ang pagpalangga niya sa ila. Himuon nila ang ila bug-os nga masarangan nga tumanon ang ila Agalon. Nagmadinalag-on sila sa pagtuman sang hilikuton nga ginhatag niya sa iya mga sumulunod.—Binu. 1:8; Col. 1:23.

Madumduman pa sang isa ka utod nga si Elvira sang naglainay sila sang buot sang iya suod nga abyan nga si Giuliana. “Sang ginsuknaan niya ako nga naglain ang iya buot sa akon ginhimo,” hinumdom ni Elvira, “naglalain ako. May rason gid sia nga mangakig. Pero nagdayaw ako sa iya kay nagakabalaka gid sia sa akon kag sa posible nga resulta sang akon ginhimo. Nalipay ako nga wala niya ginpadaku ang ginhimo ko sa iya, kundi kon ano ang mangin epekto sini sa akon. Nagapasalamat gid ako kay Jehova nga may abyan ako nga nagauna sang akon kaayuhan.”

Gani, ano ang nagakaigo nga reaksion sang maayo nga abyan kon mabutang sa katalagman ang pag-abyanay? Dapat handa sia nga hambalan ini sing prangka pero sa malulo nga paagi. Mangin pareho sia kanday Natan kag Husai, nga nagpabilin nga matutom bisan may mga problema, kag pareho ni Jesus, handa sia nga magpatawad. Amo ka bala sini nga sahi sang abyan?