1. Ngaa may mga tawo nga dapat padunggan, kag ano ang binagbinagon naton?

ANG pagpadungog sa isa amo ang pagtratar sa iya sing espesyal kag pagtahod sa iya. Basi may nahimo sia nga takus sini nga pagpadungog ukon may pinasahi sia nga posisyon. Gani ang pamangkot amo, Sin-o ang dapat naton padunggan, kag ngaa?

2, 3. (a) Ngaa takus gid padunggan si Jehova? (Tan-awa ang piktyur sa umpisa sini nga artikulo.) (b) Sa Bugna 5:13, sin-o ang Kordero, kag ngaa takus sia padunggan?

² Ang Bugna 5:13 nagasiling nga ang “Isa nga nagapungko sa trono kag [ang] Kordero” nagakadapat nga padunggan. Ang kapitulo 4 sini man nga libro sang Biblia may ginahatag nga isa ka rason kon ngaa dapat padunggan si Jehova. Ang gamhanan nga mga tinuga sa langit nagadayaw kay Jehova, “ang Isa nga nagakabuhi tubtob sa wala sing katubtuban.” Sila nagasiling: “Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.”—Bug. 4:9-11.

 ³ Ang Kordero amo si Jesucristo, “ang Kordero sang Dios nga nagakuha sang sala sang kalibutan.” (Juan 1:29) Ginasugiran kita sang Biblia nga labaw sia sa naghari nga mga tawo. Ini nagpaathag: “Sia ang Hari sang mga nagagahom subong mga hari kag Ginuo sang mga nagagahom subong mga ginuo, ang isa nga amo lamang ang indi mamalatyon, nga nagapuyo sa kapawa nga indi mapalapitan, nga wala sing tawo nga nakakita ukon makakita.” (1 Tim. 6:14-16) May iban pa bala nga hari nga handa mapatay para gawaron ang aton mga sala? Mahimo magaugyon ka sa ginaamba sang linibo ka gamhanan nga mga anghel: “Ang Kordero nga ginpatay takus sa pagbaton sing gahom kag manggad kag kaalam kag kusog kag dungog kag himaya kag pagpakamaayo.”—Bug. 5:12.

4. Ngaa dapat gid padunggan si Jehova kag ang Cristo?

⁴ Dapat gid padunggan si Jehova kag ang Cristo kay diri nabase ang aton wala katapusan nga kabuhi. Amo sini ang ginsiling ni Jesus sa Juan 5:22, 23: “Wala gid sing ginahukman ang Amay, kundi gintugyan niya sa Anak ang tanan nga paghukom, agod mapadunggan sang tanan ang Anak subong sang pagpadungog nila sa Amay. Ang wala nagapadungog sa Anak wala nagapadungog sa Amay nga nagpadala sa iya.”—Basaha ang Salmo 2:11, 12.

5. Ngaa dapat naton padunggan kag tahuron ang tanan nga tawo?

⁵ Ang mga tawo gintuga “suno sa larawan sang Dios.” (Gen. 1:27) Gani mapakita sang kalabanan ang pila ka kinaiya sang Dios pareho sang gugma, kaayo, kag kaluoy. Bangod may konsiensia, mahimo nila mahibaluan kon ano ang husto ukon indi, kon ano ang pagpangdaya ukon katampad, kon ano ang nagakaigo ukon indi. (Roma 2:14, 15) Madamo ang nanamian sa mga butang nga matinlo kag matahom. Gusto sang kalabanan nga malinong ang ila palibot. Gani narealisar man ukon wala sang mga tawo, may ikasarang sila sa pag-ilog kay Jehova. Amo kon ngaa dapat man sila padunggan kag tahuron.—Sal. 8:5.

6, 7. Kon parte sa pagpadungog sa mga tawo, paano nangin tuhay ang mga Saksi ni Jehova sa iban?

⁶ Bisan pa nga dapat naton padunggan ang mga tawo, kinahanglan mangin rasonable kita sa pagpakita sini. Bangod indi himpit, madamo ang naimpluwensiahan gid sang panimuot sa kalibutan ni Satanas. Amo kon ngaa ang iban nagaidolo sang pila ka tawo sa baylo nga padunggan lang sila kag tahuron sing nagakaigo. Ginapakadios nila ang mga lider sang relihion kag pulitika, ang mga bantog sa sports, kag ang mga artista. Gani ginailog sila sang mga bata kag tigulang, posible ang ila paghulaghulag, pamayo, ukon paggawi.

⁷ Wala ginailog sang matuod nga mga Cristiano ining indi husto nga pagpadungog sa mga tawo. Ang dapat lang naton ilugon nga tawo nga nagkabuhi amo ang Cristo. (1 Ped. 2:21) Wala mahamuot ang Dios kon indi husto ang aton pagpadungog sa mga tawo. Dapat naton ini dumdumon: “Ang tanan nakasala kag wala makalab-ot sa himaya sang Dios.” (Roma 3:23) Gani wala sing tawo nga dapat padunggan pareho sang Dios.

8, 9. (a) Ano ang pagtamod sang mga Saksi ni Jehova sa mga opisyales sang gobierno? (b) Asta diin nga puede naton masakdag ining mga opisyales?

⁸ May mga tawo nga dapat naton padunggan bangod sang ila awtoridad. Ang mga opisyales sang gobierno amo ang nagapatuman sang kasuguan kag kahim-ong kag nagaatipan sa mga pumuluyo. Madamo nga  kaayuhan ang ila nahimo. Gani ginlaygayan ni apostol Pablo ang mga Cristiano nga tamdon ining mga opisyales sang gobierno bilang “mas mataas nga mga awtoridad” kag dapat sila magpasakop. Sia nagsiling: “Ihatag sa tanan ang para sa ila. Ang buhis, sa iya nga nagapabayad sing buhis; . . . ang dungog, sa iya nga luyag padunggan.”—Roma 13:1, 7.

⁹ Bilang mga Saksi ni Jehova, handa kita sa pagpadungog sining mga opisyales, ilabi na kon ginapaabot ini kag mahimo nga kinabatasan sa aton duog. Nagakooperar kita sa ila. Pero ang aton pagpadungog kag pagsuporta sa ila may limite suno sa Kasulatan. Indi naton ini mahimo kon ginalapas na naton ang Dios ukon ang aton pagkaneutral bilang Cristiano.—Basaha ang 1 Pedro 2:13-17.

10. Ano ang matun-an naton sa mga alagad ni Jehova sang una parte sa ila pagpadungog sa mga gobierno kag sa mga opisyales sini?

¹⁰ May matun-an kita sa mga alagad ni Jehova sang una parte sa ila pagpadungog sa mga gobierno kag sa mga opisyales sini. Sang nagmando ang Emperyo sang Roma nga magparehistro ang mga sakop sini, nagtuman sanday Jose kag Maria. Naglakbay sila pakadto sa Betlehem bisan pa nga manugbata na si Maria sang iya panganay. (Luc. 2:1-5) Sang ulihi, sang ginsumbong si Pablo, matinahuron nga ginpangapinan niya ang iya kaugalingon kag ginpakita niya ang husto nga pagtahod kay Hari Herodes Agripa kag kay Festo, ang gobernador sang Judea, isa ka probinsia sang Roma.—Binu. 25:1-12; 26:1-3.

11, 12. (a) Ngaa ang pagpadungog naton sa mga opisyales sang gobierno indi pareho sa mga lider sang relihion? (b) Ano ang maayo nga epekto kay ginpadunggan sang isa ka Saksi sa Austria ang isa ka pulitiko?

¹¹ Pero ang mga Saksi ni Jehova wala nagahatag sing pinasahi nga pagpadungog sa mga lider sang relihion bisan pa nga ginapaabot nila ini. Ang butig nga relihion nagapakalain sa Dios kag nagapatiko sang mga panudlo sang iya Pulong. Gani ginatahod naton ang mga lider sang relihion pareho sa iban nga tawo, pero indi sila dapat padunggan sing pinasahi. Madumduman naton nga ginpakamalaut ni Jesus sadto ang mga lider sang relihion kag gintawag sila nga mga salimpapaw kag mga bulag nga manugtuytoy. (Mat. 23:23, 24) Pero kon parte sa mga opisyales sang gobierno, ginatahod kag ginapadunggan naton sila sing nagakaigo, kag mahimo nga buligan nila kita.

¹² Si Leopold Engleitner isa ka mapisan nga Saksi sa Austria nga gindakop sang mga Nazi kag ginpasakay sa tren pakadto sa kampo konsentrasyon sa Buchenwald. Nangin kaupod niya sa tren ang priso nga si Dr. Heinrich Gleissner, isa ka pulitiko nga taga-Austria, kag kontra sang mga Nazi. Samtang nagapanakayon sa tren, matinahuron nga ginpaathag ni Utod Engleitner ang iya mga pagpati kay Gleissner, nga namati sing maayo. Pagkatapos sang Bug-os Kalibutan nga Inaway II, pila ka beses nga ginbuligan ni Gleissner ang mga Saksi sa Austria. Mahimo may nahibaluan ka pa nga mga eksperiensia parte sa maayo nga epekto kon ang mga Saksi magtahod kag magpadungog sing nagakaigo sa mga opisyales sang gobierno base sa ginasiling sang Biblia nga dapat himuon sang mga Cristiano.

13. Sin-o ilabi na ang dapat naton tahuron kag padunggan, kag ngaa?

¹³ Dapat naton padunggan kag tahuron ang aton mga kauturan. Ilabi na nga dapat naton ini himuon sa mga gulang nga nagapanguna. (Basaha ang 1 Timoteo 5:17.) Ginapadunggan naton sila bisan ano man ang ila nasyonalidad, edukasyon, ukon  kahimtangan sa pangabuhi. Ginpatuhuyan sila sang Biblia nga “mga dulot nga mga lalaki,” kag importante sila sa kahimusan sang Dios sa pag-atipan sang iya katawhan. (Efe. 4:8) Lakip sa sini ang mga gulang sa kongregasyon, mga manugtatap sang sirkito, mga miembro sang Komite sang Sanga, kag mga miembro sang Nagadumala nga Hubon. Ginapadunggan sang mga kauturan sang unang siglo ining mga gintangdo sa pagpanguna, kag dapat amo man sini ang aton himuon. Wala naton ginaidolo ang kilala nga mga representante sang Cristianong kongregasyon ukon ginapakig-angutan naton sila nga daw mga anghel sila. Pero ginatahod kag ginapadunggan naton ining mga kauturan bangod sang ila kapisan kag pagkamapainubuson.—Basaha ang 2 Corinto 1:24; Bugna 19:10.

14, 15. Ano ang kinatuhayan sang matuod nga Cristianong mga manugbantay sa mga nagapangangkon lang?

¹⁴ Ini nga mga gulang pareho sa mapainubuson nga mga manugbantay sa espirituwal. Indi nila gusto nga trataron sila nga daw mga artista. Tuhay sila sa mga lider sang relihion subong kag sadtong unang siglo nga ginsilingan ni Jesus: “Luyag nila magpungko sa nahauna nga mga pulungkuan nga para sa dungganon nga mga bisita sa mga sinalusalo kag sa nahauna nga mga pulungkuan sa mga sinagoga kag luyag nila nga tamyawon sila sang mga tawo sa mga tiendahan.”—Mat. 23:6, 7.

¹⁵ Ang matuod nga Cristianong mga manugbantay mapainubuson nga nagatuman sa ginasiling ni Jesus: “Indi kamo magpatawag nga Rabbi, kay isa lang ang inyo Manunudlo, kag kamo tanan mag-ulutod. Indi man kamo magtawag nga amay bisan kay sin-o sa duta, kay isa lang ang inyo Amay nga yara sa langit. Indi man kamo magpatawag nga mga lider, kay isa lang ang inyo Lider kag sia amo ang Cristo. Apang ang labaw sa inyo mangin alagad ninyo. Ang nagapakataas sang iya kaugalingon paubson, kag ang nagapaubos sang iya kaugalingon pakataason.” (Mat. 23:8-12) Amo ini ang rason kon ngaa ang mga gulang sa kongregasyon ginahigugma, ginatahod, kag ginapadunggan sang ila masigka-Saksi sa bilog nga kalibutan.

16. Ngaa dapat manikasog gid kita nga tun-an kag sundon ang ginasiling sang Biblia kon paano padunggan ang iban?

¹⁶ Indi gid man mahapos ang pagtuon kon paano tahuron ang iban. Amo man sini ang naeksperiensiahan sang mga Cristiano sadto. (Binu. 10:22-26; 3 Juan 9, 10) Pero mapuslanon gid kon sundon naton ang  ginasiling sang Biblia kon paano naton padunggan ang iban. Madamo nga mga benepisyo ang matigayon naton kon matun-an naton nga mangin rasonable sa pagpadungog sa iban.

17. Ano ang pila ka benepisyo sa pagpadungog sa mga may awtoridad?

¹⁷ Kon tahuron naton kag padunggan ang mga may awtoridad, mahimo nga buligan nila kita nga indi masablagan ang aton pagbantala. Mahimo nga mangin maayo pa ang ila pagtamod sa aton hilikuton. Pila ka tuig ang nagligad, nagtambong si Birgit, isa ka payunir sa Germany, sa gradwasyon sang iya bata nga babayi. Ginsilingan sia sang mga maestra nga nanamian sila sa pagtudlo sa mga kabataan sang mga Saksi sa sulod sang mga tinuig. Daku ang nabulig sang mga Saksi nga kabataan sa ila eskwelahan. Si Birgit nagpaathag sa ila, “Gintudluan ang amon kabataan nga sundon ang mga talaksan sang Dios parte sa paggawi, kag lakip sa sini amo ang pagtahod kag pagpadungog sa mga manunudlo.” Ang isa ka maestra nagsiling: “Kon ang tanan nga kabataan pareho sa inyo mga kabataan, mangin mahapos ang pagtudlo.” Pila ka semana sang ulihi, nagtambong ang isa ka maestra sa isa ka kombension sa Leipzig.

18, 19. Ngaa dapat kita maghalong kon nagapadungog sa mga gulang?

¹⁸ Ang himpit kag maalam nga mga prinsipio sa Pulong sang Dios makabulig sa aton nga padunggan sing nagakaigo ang mga gulang sa kongregasyon. (Basaha ang Hebreo 13:7, 17.) Dapat naton sila pasalamatan sa ila kapisan kag tinguhaan naton nga sundon ang ila mga panuytoy. Malipay sila sa paghimo sang ila mga katungdanan kon himuon naton ini. Pero indi nagakaigo nga ilugon naton ang pamayo, pagpanudlo, ukon pagpakighambal sang “kilala” nga gulang. Kon himuon naton ini, basi masal-an kita nga nagaidolo sa tawo. Dapat naton dumdumon nga sia indi man himpit. Ang modelo nga dapat naton sundon kag ilugon amo ang Cristo.

¹⁹ Ginabuligan naton ang mga gulang kon padunggan naton sila kag tahuron sing nagakaigo, indi nga pakig-angutan sila nga daw mga artista. Makabulig ini sa ila nga indi madaug sang bugal kag malikawan nila ang paghunahuna nga mas maayo sila sa iban ukon maghunahuna sila nga husto pirme ang ila ginahimo.

20. Paano makabulig sa aton ang pagpadungog sa iban?

²⁰ Ang pagpadungog sa iban makabulig sa aton nga malikawan nga mangin maiyaiyahon. Makabulig ini nga indi kita magpabugal kon ginapadunggan sang iban. Nagabulig man ini sa aton nga mahiusa sa organisasyon ni Jehova, nga wala nagapadungog sing sobra ukon sing indi nagakaigo sa mga tumuluo ukon indi tumuluo. Dugang pa, makabulig ini sa aton nga indi masandad kon ang pila nga aton ginapadunggan magpalain sang aton buot.

21. Ano ang pinakaimportante nga benepisyo sa paghatag sing nagakaigo nga pagpadungog sa iban?

²¹ Ang pinakaimportante nga benepisyo sa paghatag sing nagakaigo nga pagpadungog sa iban amo nga ginapahamut-an naton ang Dios. Ginahimo naton ang iya luyag kag nangin matutom kita sa iya. Makabulig ini sa pagsabat kay bisan sin-o nga gusto magyaguta sa iya. (Hulu. 27:11) Madamo nga tawo sa kalibutan nga sayop ang ila paghangop sa pagpadungog sa iban. Nalipay gid kita nga nahibaluan naton ang luyag ni Jehova kon paano magpadungog.