“Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona mase be taunimanima ibounai dekenai ia hanaia lao.”​—ROMA 5:12.

Dirava ese iseda tama sina ginigunadia, Adamu bona Heva ia havaraia, idia dekenai lalohadai bona tauanina goevana ia henia. Danu, tanobada ai gabu hairaina, ladana Eden umana ia henia idia noho totona. Dirava ese ia hamaorodia, uma gabu ena au huahua ibounai idia ania diba, to au tamona ena huahua do idia ania lasi. To, Adamu bona Heva ese unai au ena huahua haida idia ania, bona unai be kara dikana. (Genese 2:15-17; 3:1-19) Unai gwau-edeede karana murinai, Dirava ese unai uma amo idia ia lulua, bona edia mauri ia auka ia lao. Daudau lasi edia natudia totona mauri ia auka danu. Idia ibounai idia buruka bena idia mase. (Genese 3:23; 5:5) Ita gorere, ita buruka bona ita mase, badina ita be Adamu bona Heva edia natudia.

“Tanobada ibounai be Dika Tauna ena siahu lalonai ia noho.”​—1 IOANE 5:19.

Unai “Dika Tauna” idia gwauraia Satani. Ia be ita itaia diba lasi lauma tauna, ia ese Dirava ia gwau-edeede henia. (Ioane 8:44; Apokalupo 12:9) Gabeai, aneru ma haida danu ese unai bamona idia karaia bona Satani idia badinaia. Bona edia ladana be demoni. Inai lauma dikadia ese edia siahu idia gaukaralaia taunimanima  idia koia, bona Havaraia Tauna amo idia hakaua siri. Aneru dikadia ese taunimanima idia koia kara dika karaia totona. (Salamo 106:35-38; 1 Timoteo 4:1) Satani bona ena demoni idia ura taunimanima edia mauri dekenai hisihisi do idia havaraia.

“Tau ta ese ia hadoa gauna, unai gauna sibona do ia abia.”​—GALATIA 6:7.

Dala idauidau ai hisihisi ita abia, badina ita be goevadae lasi, danu Satani ese tanobada ia biagua. To nega haida taunimanima ese sibona dekenai hisihisi idia havaraia. Edena dala ai? Bema kara dika ta eiava abia hidi kererena idia karaia, nega momo sibona dekenai dika do idia havaraia. To danu, taunimanima be gau namodia idia karaia neganai, namo idia havaraia. Hegeregere, headava tauna eiava tama ta be ia kara momokani, ia gaukara goada, bona ena famili ia lalokau henia dainai anina namona do idia abia bona ena famili idia moale. To headava tauna be laki gadara ia karaia, ia inuinu momo, eiava ia lahedo dainai, ia bona ena famili be do idia ogogami. Unai dainai aonega karana be ita ese Havaraia Tauna do ita kamonai henia. Ia ura gau namodia ita abia, bona eda ‘maino do ia bada.’​—Salamo 119:165.

“Dina gabedia ai . . . , taunimanima be sibona do idia laloa bada, moni do idia ura henia bada, . . . tama sina do idia kamonai henia lasi, . . . sibona do idia biagua lasi, do idia dagedage, kara namodia do idia ura henia lasi.”​—2 TIMOTEO 3:1-5.

Hari inai negai, taunimanima momo edia kara be unai peroveta herevadia hegeregerena. Edia kara ese ia hamomokania ita be inai tanobada ena “dina gabedia ai” ita noho. Baibel ena peroveta herevadia ese idia hahedinaraia ita noho negana ai, tuari, hitolo, tano mareremarere bona gorere do idia vara. (Mataio 24:3, 7, 8; Luka 21:10, 11) Unai gaudia ese hisihisi momo bona mase idia havaraia.