“Ta be badina ta dainai ma ta dekenai ia maumau, . . . mai kudouna ibounai ida do umui gwauatao heheni.”​—KOLOSE 3:13.

Ita ibounai be kerere ita karaia. Ita ese haida ita hahisia eiava idia ese ita idia hahisia. To, namona be ita gwauatao heheni, bona ita ura ma haida ese ita idia gwauatao. Ita idia hahisia taudia edia dika ita gwauatao neganai, idia ita badu henia noho ena hemami do ia ore. Ita ese ta ena ‘dika davana ita haloua lasi’ bona iena manoka gaudia eiava ena kerere do ita herevalaia loulou lasi. (Roma 12:17) To bema ta ena kara ese ita ia hahisia bada bona unai ita laloaboio lasi be edena bamona? Vadaeni, namona be mai hemataurai ida unai tauna sibona ida unai ita herevalaia. Iseda tahua gauna be maino ita karaia, to namo lasi daika be maoro eiava kerere ita herevalaia.​—Roma 12:18.

“Mai manau ida do umui laloa ma haida ese umui idia hereaia.”​—FILIPI 2:3.

Bema manau bona hemataurai karana ita hahedinaraia, taunimanima do idia ura ita idia bamoa. Idia diba idia do ita kara namo henia bona edia namo do ita laloa, danu ita ura lasi edia hemami do ita hadikaia. To bema ita laloa ma haida ita hereaia, eiava ita ura haida ese iseda lalohadai do idia badinaia, do ita lalotamona lasi bona badu do ia vara. Taunimanima  ese ita do idia dadaraia bona eda turadia be momo lasi.

“Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”​—KARA 10:34, 35.

Iseda Havaraia Tauna ese taunimanima ibounai ia kara namo henidia, herevana edia bese, gado, noho dalana bona kopina kala be idauidau. “Ia ese tau tamona amo bese ibounai taudia ia karaia.” (Kara 17:26) Anina be, taunimanima ibounai be ruma bese tamona amo idia mai. Bema ita ese taunimanima ibounai ita matauraia bona kara namo henia neganai, idia do ita hamoalea, ita danu do ita moale bona iseda Havaraia Tauna do ia moale danu.

“Inai bamona kara be dabua bamona do umui atoa, . . . manau.”​—KOLOSE 3:12.

Ita manau neganai, haida be ita dekenai do idia gari lasi. Iseda kerere hamaoromaoroa totona, ita idia hereva henia neganai, idia diba mai manau ida edia hereva do ita kamonai. Bona ta be ita ia badu henia neganai, mai manau ida haere karana ese iena badu karana do ia koua. Aonega Herevadia 15:1 ia gwau: “Mai manau ida ia haere tauna ese badu ia koua, to lalona hahisia hereva ese badu ia havaraia.”

“Henia kara ena moale be bada, to abia kara ena moale be maragi.”​—KARA 20:35.

Hari momo be idia mataganigani bona sibona edia namo idia laloa. To harihari bada taudia ese moale korikorina idia davaria. (Luka 6:38) Harihari bada taudia be idia moale, badina taunimanima idia lalokau henia bada, to kohu lasi. Unai lalokau karana dainai, idia ese ma ta ena harihari bada karana idia laloa bada bona ia idia tanikiu henia danu. (Kolose 3:15) Sibona oi nanadaia: ‘Daidia lau bamoa be namo, tanikiu bona harihari bada karana idia hahedinaraia lasi taudia, eiava harihari bada bona tanikiu karana idia hahedinaraia taudia?’ Dahaka ita dibaia? Ita ura haida ese ita do idia kara henia hegeregerena idia do ita kara henia danu.​—Mataio 7:12.