1, 2. Momo ese edia gaukara be edena bamona idia laloa?

VAIA taunimanima be idia karaia gaukarana amo sibona edia kara idia hahedinaraia. Momo idia laloa, bema ta be mai ena moni gaukara namona o dagi, unai ese ia hahedinaraia iena kara be namo bona gau namodia ia abia. Tano ma haida ai, ta be ma ta ia tura henia matamaia neganai, do ia henia henanadai ginigunana be, “Oi be dahaka gaukara oi karaia?”

² Baibel be nega haida ta ia herevalaia neganai, unai tauna ese ia karaia gaukarana ia gwauraia danu. Hegeregere, “takisi gogoa tauna Mataio”; “Simona be boromakau kopina gaukaralaia tauna”; bona “momo ese idia lalokau henia doketa tauna Luka.” (Mat. 10:3; Kara 10:6; Kol. 4:14) Kongrigeisen lalonai ita abia asainmen o hahenamo ese ta ia karaia gaukarana ia hahedinaraia diba danu. Hegeregere, King Davida, peroveta tauna Elia, bona aposetolo Paulo. Unai tatau be Dirava ese idia dekenai ia henia gaukarana idia laloa bada. Ita danu ese iseda hesiai gaukara ena hahenamo ita laloa bada be namo.

3. Dahaka dainai buruka taudia ese matamata taudia idia treinia be namo? (Laulau ginigunana herevalaia.)

³ Ita momo be ita karaia gaukarana ita moalelaia bona ita ura unai gaukara do ita karaia noho ela bona hanaihanai. To madi, Adamu ena nega amo, ita itaia uru ta ia ore ia lao neganai, ura ma ta ese ena gabu ia abia. (Had. 1:⁠4) Unai ia vara dainai, hari Keristani taudia momokanidia be hekwakwanai haida idia davaria. Hegeregere, Iehova ena taunimanima edia gaukara be ia bada ia lao bona gau momo idia idau. Gaukara matamata ita karaia neganai, unai gaukara karaia dala matamatana ita dibaia​—⁠nega momo teknoloji dekenai unai ia vara. To buruka taudia haida be unai dala matamatadia idia manadalaia be auka. (Luka 5:39) Ena be unai ia vara, to ita diba matamata taudia edia goada ese buruka taudia edia goada ia hereaia. (Aon. 20:29) Unai dainai buruka taudia ese mai lalokau ida matamata taudia dekenai treinini idia henia be namo, unai amo maduna badadia idia huaia diba.​—⁠Salamo 71:18 duahia.

4. Dahaka dainai reana do ia auka ma ta ese ena gaukara be ma ta dekenai ia henia hanai? (Maua ladana “Haida be Edia Maduna Idia Haria Lasi Ena Badina” itaia.)

⁴ Maduna idia huaia taudia dekenai reana do ia auka edia gaukara haida be matamata taudia dekenai idia henia totona. Haida be idia ura lasi idia moalelaia gaukarana idia rakatania. Bona ma haida idia laloa idia karaia gaukarana be matamata taudia ese do idia karaia namonamo lasi. Reana ma haida idia gwau idia be nega lasi ma ta idia treinia totona. Ma danu, matamata taudia be maduna ma haida idia abia lasi neganai, namo lasi idia hesiku haraga.

5. Inai stadi ese edena henanadai rua do ia haerelaia?

⁵ Gaukara haria karana dekenai mani inai gau rua ita herevalaia. Gau ginigunana, buruka taudia ese edena dala ai matamata taudia do idia durua maduna ma haida idia huaia totona, bona dahaka dainai unai be mai anina bada? (2 Tim. 2:⁠2) Gau iharuana, tadikaka matamata be lo tadikaka idia durua bona idia amo diba idia abia neganai, dahaka dainai laloa maoromaoro be namo? King Davida ese iena natuna ia durua mai anina bada gaukarana ia karaia totona. Mani unai ita herevalaia.

6. King Davida be dahaka ia ura karaia, bona Iehova be dahaka ia gwau?

⁶ Lagani momo lalonai Davida be idau tauna ta bamona ia noho. Gabeai ia be king ai ia lao bona ruma namona ta dekenai ia noho. To ia lalohisihisi badina Iehova dekenai “ruma” ta o dubu helaga idia hahelagaia lasi, bona ia ura ta ia haginia. Unai dainai peroveta tauna Natana dekenai ia gwau: “Lau be sida ruma lalonai lau noho, to Dirava ena Taravatu Maua be Palai Dubu sibona lalonai ia noho.” Natana ia haere: “Oi lao, oiemu ura do oi karaia, badina Lohiabada be oi danu ia noho.” To Iehova ia ura iena dubu helaga be Solomona ese do ia haginia. Unai dainai Natana ia hamaoroa Davida dekenai do ia gwau: “Oi ese lauegu noho ruma do oi haginia lasi.” Ena be Iehova be lalokau dalanai Davida ia hamaoroa ia do ia hanamoa noho, to ia gwau Davida ena natuna Solomona ese dubu helaga do ia haginia. Unai neganai, Davida be dahaka ia karaia?​—⁠1 Siv. 17:​1-4, 11, 12; 29:⁠1.

7. Iehova ena hereva dekenai Davida be dahaka ia karaia?

⁷ Davida ese Solomona ia durua, ena be ia diba ia ese dubu helaga haginia gaukarana totona hanamoa do ia abia lasi. Bona momokani, unai dubu helaga idia gwauraia Solomona ena dubu helaga, to Davida ena lasi. Reana Davida ia lalohisihisi badina ia ura karaia gauna do ia hagugurua lasi, to ia ese unai haginia gaukarana ia durua. Mai ura bada ida gaukara taudia ia hegaegaelaia, bona auri, auri laboralabora, siliva, golo, bona sida audia ia haboua. Bena Solomona ia hagoadaia, ia gwau: “Egu natuna e, Lohiabada ese oi dekenai do ia noho, bona Lohiabada, oiemu Dirava ena Dubu Helaga do oi haginia haorea, ia ese ia gwauhamata do oi karaia hegeregerena.”​—⁠1 Siv. 22:​11, 14-16.

8. Dahaka dainai reana Davida ia laloa Solomona be ia hegeregere lasi, to dahaka ia karaia?

⁸ Sivarai Ginigunana 22:5 duahia. Reana Davida ia laloa Solomona be ia hegeregere lasi unai mai anina bada gaukarana ia naria totona. Unai dubu helaga idia haginia neganai, namona be ia be “mai hairaina,” bona unai nega ai Solomona be “eregabe tauna sibona, bona gaukara dekenai ia do manada lasi.” To, Davida ia diba Iehova ena heduru amo Solomona ese ia abia gaukarana do ia karaia namonamo. Unai dainai Davida ese Solomona do ia durua daladia ia laloa bona kohu momo ia haboua.

9. Tadikaka burukadia be edia maduna idia henia hanai neganai, dahaka hemami idia abia? Haheitalai gwauraia.

⁹ Namo lasi tadikaka burukadia idia lalohisihisi, bema idia huaia maduna be tadikaka matamatadia dekenai idia henia hanai. Oibe, gaukara ia heau namonamo noho totona, tadikaka matamatadia idia treinia be namo, unai amo maduna idauidau idia huaia diba. Namona be idia buruka elda taudia idia moale bema idia karaia gaukarana be idia treinia tadikaka matamatadia ese idia karaia matamaia. Mani inai haheitalai ita laloa, tama ta be ia ura iena natuna dekenai motuka taria dalana ia hadibaia. Iena natuna be ia maragi dainai, tamana ese motuka ia taria dalana ia itaia sibona. Natuna be ia bada sisina neganai, tamana ese ia karaia gaudia be natuna ia hadibaia. Bena, mero ena mauri lagani be 18 bamona neganai, ia ese motuka ia taria matamaia diba, to iena tamana ese do hadibaia noho. Nega ta ta ai tamana ese motuka ia taria, to nega momo natuna ese ia taria, bema tamana ia buruka momokani, vadaeni natuna sibona ese motuka ia taria. Aonega tamana be do ia moale iena natuna ese motuka ia taria totona bona ena natuna do ia biagua lasi. Unai hegeregerena, tadikaka burukadia idia moale, bema idia treinia tadikaka matamatadia be tiokratik maduna idauidau idia huaia matamaia.

10. Mose ese ena dagi bona siahu be edena bamona ia laloa?

¹⁰ Idia buruka vadaeni tadikaka be mama karana amo sibona idia gimaia be namo. Mose mani ita laloa. Israela taudia huanai haida be peroveta taudia bamona idia kara neganai, ia be dahaka ia karaia? (Numera 11:​24-29 duahia.) Mose ena durua tauna, Iosua, be ia ura idia ia koua. Ia laloa idia ese Mose ena dagi bona siahu idia matauraia lasi. To Mose ia haere: “Lau dainai oi mama, a? Lohiabada ena orea taudia ibounai do idia peroveta, bona Lohiabada ese iena Lauma be ibounai edia latanai bema ia atoa be namo, ani?” Mose ia laloparara Iehova ena heduru dainai unai ia vara. Bona ia ura lasi ia sibona ese hanamoa ia abia, to ia ura Dirava amo ia abia harihari gaudia be Iehova ena hesiai taudia ibounai ese idia abia danu. Bema kongrigeisen lalonai ma haida ese hahenamo idia abia, Mose hegeregerena do ita moale, a?

11. Tadikaka ta be ena maduna ia henia hanai karana be edena bamona ia herevalaia?

¹¹ Hari inai negai, tadikaka momo be lagani momo lalonai idia gaukara goadagoada bona ma haida idia treinia maduna ma haida idia huaia totona. Hegeregere, tadikaka Peter be lagani 74 lalonai ful-taim hesiai gaukara ia karaia, lagani ibounai 35 be Europe ena brens ofesi dekenai ia gaukara. Unai neganai, ia be Haroro Naria Dipatmen ia naria, bona vanegai sibona ena asainmen ia idau. Hari, Peter ida lagani haida ia gaukara tadikaka matamatana, Paul, be unai dipatmen ia naria. Peter idia nanadaia ena asainmen ia idau dainai ia be dahaka ia laloa, bona ia gwau, “Lau moale badina tadikaka haida be treinini idia abia, unai amo maduna ma haida idia huaia diba, bona idia ta ta be idia abia maduna idia huaia namonamo.”

12. Rehoboama ena sivarai amo dahaka ita dibaia?

¹² Solomona ia mase murinai, iena natuna Rehoboama be king ai ia lao. Rehoboama ese iena maduna ia huaia namonamo totona, heduru be tatau badadia amo ia noia guna. To ia ese edia sisiba ia kamonai henia lasi! Bona ia ida idia tubu hebou tatau matamata edia sisiba ia abia dae, idia be hari iena sisiba henia taudia. Unai ese dika bada herea ia havaraia. (2 Siv. 10:​6-11, 19) Unai amo dahaka ita dibaia? Aonega karana be buruka taudia edia heduru ita noia bona idia henia sisiba ita laloa namonamo. Namo lasi matamata taudia idia laloa idia be dala gunadia idia badinaia dainai, buruka taudia edia sisiba idia dadaraia haraga.

13. Tadikakana matamata be edena dala ai tadikaka burukadia ida idia gaukara hebou diba?

¹³ Tadikaka burukadia haida be tadikaka matamatadia henunai idia gaukara. Ena be matamata taudia be unai bamona maduna idia huaia, to abia hidi ta idia do karaia lasi neganai, namona be buruka taudia edia sisiba idia tahua, bona edia aonega herevadia amo namo idia davaria diba. Paul, matamanai ita herevalaia tadikaka, be Peter ena gabu ia abia bona Betele dipatmen ta ia naria, ia gwau, “Nega lau atoa Peter ena sisiba lau tahua totona, bona dipatmen taudia lau hagoadaia unai do idia karaia danu.”

14. Timoteo bona aposetolo Paulo edia gaukara hebou karana amo dahaka ita dibaia?

¹⁴ Tau matamata, Timoteo, be lagani momo lalonai aposetolo Paulo ida ia gaukara hebou. (Filipi 2:​20-22 duahia.) Paulo ese Korinto taudia ia tore henia, ia gwau: “Umui dekenai Timoteo lau siaia inai, Lohiabada ena gaukara lalonai ia be egu lalokau natuna mai abidadama. Keriso Iesu lau hesiai henia lalonai, lau badinaia daladia be ia ese umui dekenai do ia hadibaia, lau ese gabu ibounai dekenai kongrigeisen ibounai lau hadibaia hegeregerena.” (1 Kor. 4:17) Paulo ena hereva amo ia hahedinaraia, ia bona Timoteo be idia gaukara hebou namonamo. Oibe, Paulo ese nega ia atoa ‘Keriso Iesu ia hesiai henia lalonai, ia badinaia daladia’ be Timoteo dekenai do ia hadibaia. Timoteo be Paulo amo gau momo ia dibaia bona Paulo be ia dekenai ia moale, ma danu Paulo ia diba Timoteo ese Korinto kongrigeisen do ia hagoadaia. Hari inai negai, elda taudia ese Paulo ena haheitalai do idia tohotohoa bona tadikaka ma haida do idia treinia, unai amo idia ese kongrigeisen idia hakaua diba!

15. Gau momo idia idau dainai, Paulo ese Roma Keristani taudia dekenai ia henia sisiba ese edena bamona ita ia durua diba?

¹⁵ Hari inai negai, gau namodia momo idia vara noho. Iehova ena tanobada oreana be dala idauidau ai ia tubu daekau noho, unai dainai gau momo idia idau. Oibe, gau momo idia idau dainai, namona be ita manau, bona Iehova ena ura ita karaia, to ita sibona iseda ura lasi. Bema unai ita karaia, ita huanai lalotamona do ia noho. Paulo be Roma Keristani taudia dekenai ia gwau: “Umui huanai idia noho taudia ta ta lau hamaoroa, namo lasi sibona do ia laloa bada, to ena laloa dalana amo do ia hahedinaraia ia laloa maoromaoro, bona Dirava ese ta ta dekenai ia henia abidadama hegeregerena, unai do ia karaia. Ita diba, tauanina tamona be mai ena kahana momo, bona kahana ta ta be mai edia gaukara idauidau. Unai bamona danu, ena be ita be momo, to Keriso ida ita hakapua dainai ita be tauanina tamona, bona ita be tauanina ena kahana idauidau to ita gaukara hebou.”​—⁠Roma 12:​3-5.

16. Iehova ena orea lalonai lalotamona ia noho totona, tadikaka burukadia bona matamatadia, bona edia adavadia be dahaka idia karaia be namo?

¹⁶ Herevana iseda noho dalana be edena bamona, to namona be ita ibounai ita gaukara goada Iehova ena Basileia hereadaena ena gaukara ita hagugurua totona. Umui buruka taudia e, namona be matamata taudia umui durua umui karaia gaukarana idia karaia totona. Bona umui tadikaka matamatadia e, umui dekenai idia henia gaukaradia umui abia dae, umui manau, bona tadikaka burukadia be mai hemataurai ida umui kara henia. Bona umui hahine e, Akwila ena adavana, Prisikila, ena kara umui tohotohoa, edia noho dalana ia idau neganai, ia be Akwila ia bamoa bona durua.​—⁠Kara 18:⁠2.

17. Iesu ia diba momokani ena hahediba taudia be dahaka do idia karaia, bona dahaka totona idia ia treinia?

¹⁷ Namona be Iesu ena haheitalai umui tohotohoa, bona ma haida umui treinia maduna ma haida idia abia totona. Iesu ia diba ena hesiai gaukara tanobada ai be do ia doko bona ma haida ese unai gaukara do idia karaia. Ena be iena hahediba taudia be idia goevadae lasi, to idia ia abidadama henia, bona ia hamaorodia do idia karaia gaukaradia ese ia karaia gaukaradia do idia hereaia. (Ioa. 14:12) Idia ia treinia namonamo, bona idia ese sivarai namona be tanobada hegegemadai idia harorolaia.​—⁠Kol. 1:⁠23.

18. Vaira negai dahaka hahenamo do ita abia, bona hari dahaka do ita karaia?

¹⁸ Iesu ese ena mauri ia bouboulaia murinai, ia toreisi lou bona guba dekenai ia daekau, unuseniai gaukara ma haida ia abia, bona ena siahu ese “gavamani, dagi bada taudia, siahu taudia, lohia taudia” ia hereaia. (Efe. 1:​19-21) Bema ita abidadama noho ela bona ita mase bona gabeai Aramagedono ia mai, ita diba ita be tanobada matamatana dekenai do ita toreisi lou, bona unuseniai gaukara namodia momo do ita karaia. To hari, ita ibounai be inai mai anina bada gaukarana ita karaia be namo​—⁠sivarai namona ita harorolaia bona taunimanima be hahediba taudia ai ita halaoa. Namona be ita ibounai, matamata o buruka taudia be “Lohiabada ena gaukara idauidau lalonai do [ita] bisi.”​—⁠1 Kor. 15:⁠58.