“Aku udah biasa enggau sekeda kaban aku. Tusah ba aku enti deka bekaban enggau orang bukai.”—Alan.

 “Aku bisi beberapa iku kaban ti rapat, lalu aku rinduka raban tu. Enda ibuh meh begulai enggau mayuh orang, tauka bejaku enggau orang ke enda dikelala.”—Sara.

 Kati nuan setuju enggau Alan sereta Sara? Kati nuan semina begulai enggau beberapa iku aja kaban, lalu enda ibuh ngiga kaban ke baru?

 Enti au, bacha meh artikel tu.

•  Penanggul ke ditapi

•  Utai ke ulih digaga nuan

•  Nama ku nembiak serambau nuan

 Enda salah deka begulai enggau kaban ti rapat. Sida ulih ngasuh nuan lantang, lalu sida mega nerima pengurang nuan.

 “Aku gaga enti orang bukai sayau sereta nerima sapa aku. Laban nuan nya nembiak, nuan tentu deka diterima orang.”—Karen, 19.

 Nemu nuan? Jesus begulai enggau 12 iku rasul iya. Tang ba entara semua rasul iya, semina Peter, James sereta John kaban rapat Jesus.—Mark 9:2; Luke 8:51.

 Tang, enti nuan semina begulai enggau sekeda orang, lalu enggai begulai enggau orang bukai, tu ulih ngenataika sekeda penanggul. Chunto iya:

•   Nuan engka lenyau peluang bulih kaban rapat ti bukai.

   “Enti nuan semina bekaban enggau orang ke sama ulah enggau nuan, nuan enda ulih ngasaika peneleba ti baru sereta betemu enggau orang ke spesial.”—Evan, 21.

•   Orang engka ngumbai nuan sumbung.

   “Lebuh nuan semina begulai enggau kaban nuan aja, orang bukai engka ngumbai nuan enda rindu bejaku enggau sida.”—Sara, 17.

•   Nuan engka bisi sangkut paut enggau pengawa ngachau.

   “Nuan empu engka enda ngachau orang bukai, tang lebuh kaban nuan ngereja nya, nya baka ke OK, indah ngerinduka ati.”—James, 17.

•   Nuan engka napi penanggul, kelebih agi enti nuan sanggup ngereja sebarang utai ketegal deka diterima bala kaban nuan.

   “Seiku aja kaban ke jai, ulih ngasuh semua kaban ke bukai pan tepalit.”—Martina, 17.

•   Kemeratka ulah ti patut ditanka nuan.

   Tanya diri empu: “Nama ulah ke deka dikemansangka aku? Kati kaban ke begulai enggau aku, ulih nulung aku ngemansangka ulah nya? Kati aku sanggup ngereja sebarang utai ketegal deka diterima sida?”

   Prinsip Bup Kudus: “Orang ke jai ngerusak moral ti menyana.”—1 Korint 15:33.

   “Enti kaban ke dalam raban nuan nadai ngembuan ulah ti manah, nuan engka deka nunda sida ngereja ulah ti enda manah.”—Ellen, 14.

•   Tentuka ni bagi utai ke beguna agi ba nuan.

   Tanya diri empu: “Kati aku kelalu rapat enggau bala kaban aku, nyentukka aku sanggup ngereja sebarang utai ngambi diterima sida? Nama deka digaga aku, enti bala kaban aku ngereja utai ti salah?”

   Prinsip Bup Kudus: “Aku nganu sereta disiplin semua orang ke dikerinduka Aku.”—Pemandang 3:19.

   “Enti seiku ari kaban nuan ngereja utai ti salah, nuan engka belalaika penyalah nya laban nuan enggai dikumbai ‘buai batu’.”—Melanie, 22.

•   Begulai meh enggau mayuh agi orang.

   Tanya diri empu: “Nama pemanah iya enti aku bekaban enggau orang bukai kelimpah ari kaban rapat aku?”

   Prinsip Bup Kudus: “Anang semina berundingka diri empu aja, tang berunding mega ke orang bukai.”—Pilipi 2:4.

   “Orang ke enda tentu dikelala mayuh, engka bisi penanggul ba rumah. Tang enti nuan lebih ngelala sapa sida ti bendar, nuan ulih nemu pasal pemanah sida.”—Brian, 19.

 Batang ajar: Enda salah deka ngembuan seraban kaban ti mimit. Taja pia, nuan mega deka bulih penguntung enti nuan begulai enggau orang bukai kelimpah ari bala kaban nuan. Bup Kudus madah, “Orang ke nulung orang bukai, deka bulih tulung ari orang.”—Jaku Dalam 11:25.