TANYA ARI BALA NEMBIAK

Nama Kebuah Aku Ngemediska Diri?

TEBAH

Nama reti ngemediska diri?

Mayuh chara dikena orang ngemediska diri. Chunto iya, ngemetuka diri, mangkaka diri, malu diri, tauka nyayat diri. Nyayat diri reti iya ngena utai ti tajam kena ngemediska diri. Orang ke baka tu, deka terus ngemediska diri ketegal enda tetagangka asai ati diri. Artikel tu deka berandauka pengawa nyayat diri, tang prinsip tu ulih dikena dalam semua pekara ke bekaul enggau ngemediska diri.

Uji penemu nuan: Betul tauka Salah.

Semina indu udu ngemediska diri.
Pengawa nyayat diri enda sejalai enggau Bup Kudus ba Adat Lewi 19:28 ke madah, “Anang ngurik tubuh kita.”

Saut ti betul:

Salah. Endang amat, pengawa nyayat diri tu suah agi nyadi ba orang indu. Tang bisi mega orang lelaki nyayat diri tauka ngemediska diri enggau mayuh chara.
Salah. Adat Lewi 19:28 nya madah pasal pengawa orang kapir tauka orang ke nadai pengarap kelia suba. Ukai pasal pengawa ngemediska diri ke deka dikerandauka kitai ba artikel tu. Tang, Bup Kudus mega nunjukka Penempa kitai ke bepengerindu enggai meda kitai ngemediska diri.—1 Korint 6:12; 2 Korint 7:1; 1 John 4:8.

Nama kebuah orang ngereja tu?

Uji penemu nuan: Ni bagi penerang ke betul?

Orang ngemediska diri laban . . .

laban sida deka rari ari asai ati ke benung ditapi sida.
laban sida deka munuh diri.

Saut ti betul: A. Mayuh orang ke ngemediska diri nadai ati deka munuh diri. Tang, sida semina deka muai asai ati ti kelalu tusah.

Peratika nama dipadah sekeda bala nembiak, kebuah sida ngemediska diri.

Celia: “Aku berasai nyamai agi.”

Tamara: “Tu aja jalai pansut ari penusah aku. Aku ka agi pedis tubuh ari ke pedis ati.”

Carrie : “Aku begedika asai ati ti tusah. Maya aku ngemediska diri, aku ulih muai penusah ati, lalu semina ngasaika telih ba tubuh aku.”

Jerrine : “Tiap kali aku ngemediska diri, aku ngasaika penanggul aku baka ke lenyau. Aku enda pedulika utai nyadi ke ngelingi aku. Aku rindu baka nya.”

Baka ni nuan ngetuka pengawa tu?

Besampi ngagai Jehovah nya siti chara ti manah kena ngetuka pengawa tu. Bup Kudus madah, “Serahka semua pengirau kita ngagai Iya, laban Iya ngibun kita.”—1 Peter 5:7.

Buah runding: Keterubah, bantaika sampi ti pandak. Nuan ulih madah ngagai Jehovah, “Aku begunaka tulung.” Nyau kelama, nuan ulih ngasaika diri majak nyamai mansutka asai ati ngagai ‘Apai ti pun semua pengasih, Petara ti pun semua pengelantang.’—2 Korint 1:3, 4.

Kelimpah ari ngasuh kitai berasai baik agi, sampi mega chara kitai berandau enggau Apai kitai ti di serega. Iya udah besemaya: “Aku deka ngasuh kita kering lalu nulung kita. Aku deka nyaga kita lalu ngelepaska kita.”—Isaiah 41:10.

Mayuh orang berasai nyamai agi lebuh sida madahka apai indai, tauka orang ke ulih dipechayaka sida pasal utai nyadi ba sida. Peratika nama ku tiga iku nembiak.

Interbiu

Diana, 21
Kathy, 15
Lorena, 17

Berapa umur nuan maya nuan berengkah ngemediska diri?

Lorena: Aku berengkah maya umur aku 14 taun.

Diana: Aku, maya aku 18 taun. Tang ukai selalu. Kekadang aku ngemediska diri pengelama seminggu tauka dua minggu, lalu kekadang aku nadai ngemediska diri pengelama sebulan.

Kathy: Aku berengkah maya 14 taun. Kekadang aku tusah nagang diri.

Nama kebuah nuan deka ngemediska diri?

Kathy: Aku begedika diri empu. Aku ngasaika nadai orang deka bekaban enggau aku.

Diana: Keterubah iya aku tusah ati. Tang udah nya, asai ati nya betukar nyadi asa, lalu ngujungka aku lemi semengat. Nyau kelama, asai ati tu majak berat ba aku, baka seiku raksasa dalam tubuh aku. Nya kebuah aku nyayat diri kena aku ngelepaska diri.

Lorena: Aku selalu berasai balat tusah ati, ringat, tauka asa ngagai diri empu. Aku ngasaika diri nadai guna. Nya kebuah aku ngemediska diri, ngambi ulih muai semua asai ati ke enda manah ti ditapi aku.

Kati nuan berasai nyamai pengudah ngemediska diri?

Diana: Au. Aku berasai nyamai agi, nya baka ke muai ma ti berat.

Kathy: Bisi orang berasai nyamai pengudah nyabak, baka nya mega aku, berasai nyamai pengudah ngemediska diri.

Lorena: Ngemediska diri nya sempama nebuk lubang ti mit, ba gelembung ke penuh enggau asai ati ke enda manah. Gelembung nya enda pechah, tang angin ke dalam nya belubah-lubah mansutka asai ati ti enda manah.

Kati nuan takut madahka orang pasal asai ati nuan?

Lorena: Au. Aku takut dikumbai nyelai lalu aku enggai orang nemu pasal pengidup aku.

Diana: Orang selalu ngumbai aku kering. Aku deka sida terus ngembuan runding nya. Enti aku minta tulung, aku ngasaika diri nadai guna.

Kathy: Aku takut dikumbai orang gila. Nya ngasuh aku balat agi tusah ati. Kelimpah ari nya, aku ngasaika diri patut napi pemedis tu.

Nama nulung nuan ngetu ngemediska diri?

Lorena: Aku madahka indai. Aku mega nerima chara berubat kena nagang asai ati aku ke enda manah. Ukai tekala nya aku terus ulih napi tu. Tang belajarka Bup Kudus kediri empu mayuh nulung aku. Aku mega kisuk ba pengawa nginjil. Aku engka patut belaban enggau asai ati ke ngumbai diri enda beguna. Tang, maya asai ati nya datai, aku bebendar nagang nya ari nguasa aku.

Kathy: Seiku menyadi indu ke 10 taun tuai agi ari aku, beratika aku bisi penanggul. Aku pan madahka asai ati aku ngagai iya. Enda nyangka, iya pan kala ngasaika utai ti sama. Nya kebuah, aku nyamai agi madah ngagai iya. Kelimpah ari nya, lutur mega nulung aku enggau apai indai aku nemu agi pasal utai ke diasaika aku.

Diana: Bisi siti malam, aku ba rumah sepasang laki bini ke dipechayaka aku. Laki iya ulih beratika bisi utai ti nyelai ba aku. Enggau nelap, iya meransang aku madahka penanggul diri. Bini iya merap lalu murus aku baka ke digaga indai aku maya aku agi mit. Aku pan berengkah nyabak, lalu iya pan sama. Enda senang madahka sida pasal pengawa aku ke ngemediska diri. Tang, aku amat gaga pengudah aku madah ngagai sida.

Baka ni Bup Kudus nulung nuan?

Diana: Bup Kudus ngasuh aku sedar, aku enda ulih mutarka penanggul tu enti nadai tulung ari Jehovah.—Jaku Dalam 3:5, 6.

Kathy: Aku berasai nyamai agi pengudah macha Bup Kudus. Kelebih agi maya aku nemu semua utai ke dalam Bup Kudus datai ari Petara!—2 Timoti 3:16.

Lorena: Lebuh aku tetemuka ayat Bup Kudus ke negu ati aku, aku nulis nya ba bup nota ngambika aku ulih beratika nya baru maya bukai.—1 Timoti 4:15.

Nama ayat Bup Kudus ke negu ati nuan?

Diana: Jaku Dalam 18:1 madah, “Orang ke enda nemu begulai enggau orang bukai, semina berundingka diri empu aja. Sida enda besetuju enggau semua utai ti dikumbai orang bukai ngena.” Kekadang, aku ngasaika diri tusah begulai enggau orang bukai. Tang ayat tu nulung aku sedar, enti aku ngenyauhka diri nya ulih ngemediska aku.

Kathy: Aku rinduka Matthew 10:29 enggau 31. Pasal burung pipit. Jesus madahka nadai seiku ari burung pipit ke labuh enda ditemu Petara Jehovah. Iya mega madah, “Anang takut. Kita berega agi ari burung pipit!” Nyentukka diatu, ayat tu agi nyadika pengingat ngagai aku, aku amat berega ba Jehovah.

Lorena: Aku rinduka Isaiah 41:9, 10. Jehovah bejaku ngagai nembiak Iya, ‘Aku enda nulak kita, tang udah milih kita. Anang takut, Aku bisi enggau kita! Aku deka ngasuh kita kering lalu nulung kita.’ Maya aku berunding pasal utai ti kering, aku ngambarka siti dinding ke enda ulih diruntuhka. Ayat tu ngeringka aku, laban aku nemu Jehovah rinduka aku, lalu Iya seruran semak aku.

Tanya ke patut diperundingka

Maya nuan udah sedia minta tulung, sapa deka digiga nuan?
Nama deka disebut nuan dalam sampi ngagai Petara Jehovah?
Nama dua iti chara ke ulih dikena nuan ngurangka asai ati ti enda manah sereta pengirau nuan, lalu enda ibuh ngemediska diri?

Ayat Bup Kudus ke nyadika nota

Buah runding: Lebuh nuan tetemuka ayat Bup Kudus ke ngasuh nuan andal pasal pengerindu Jehovah, tauka ayat ke nulung nuan ngembuan runding ti betul pasal diri empu sereta pengelemi diri empu, tulis nya dalam bup nota. Tuliska mega kebuah ayat nya amat begun aba nuan. Kena ngepun, peratika ayat Bup Kudus ke kala nulung Diana, Kathy, enggau Lorena.

Rome 8:38, 39

“Ayat tu ngasuh aku sedar, Jehovah amat rinduka aku. Indah maya aku tusah.”—Diana.
Masmur 73:23

“Ayat tu ngasuh aku nemu, aku enda kala kediri. Jehovah seruran semak aku.”—Kathy.
1 Peter 5:10

“Asai ati ti enda manah, enda ulih lenyau enggau jampat. Kitai engka tusah ati dalam sesiti timpuh. Tang, Jehovah tentu ngeringka kitai napi sebarang utai.”—Lorena.