Orang ke bagas deka bebendar gawa ngambika ulih melanja diri sereta nulung orang bukai, taja pan kereja sida enda entu tebilang.

Enda ngira kitai rindu tauka enda, pengidup kitai endang mayuh tanggungjawap. Mayuh orang ba dunya kemayaharitu enda rindu bendar gawa. Nya alai, enti nuan bagas, ulah tu deka meri nuan penguntung.—Pengajar 3:13.

“Aku belajar, enti nuan bebendar gawa nuan deka berasai puas sereta gaga ati. Asai ati ti puas tu ngasuh aku rindu gawa. Etika kereja ti manah deka nulung nuan ngembuan nama ti manah.”—Reyon.

PRINSIP BUP KUDUS: “Enti nuan gawa, nuan deka bulih pengidup.”—Jaku Dalam 14:23.

Kemansangka runding ti positif ngagai kereja ngena chara ba baruh:

Gaga ati ngagai kereja ti digaga enggau manah. Enda ngira nuan ngereja pengawa ba rumah, ba sekula, tauka endur kereja sekular, kereja meh nya enggau pengabis ati. Lebuh nuan mujur ngereja sesiti pengawa enggau manah, giga meh jalai kena ngemansangka pengawa nya tauka ngereja nya enggau jampat agi. Lebuh nuan nyau majak pandai, nuan deka rindu agi ke pengawa nuan.

PRINSIP BUP KUDUS: “Kati nuan bisi meda orang ke landik gawa? Iya deka bekereja ke raja; iya enda bekereja ke orang ke sengapa-dia.”—Jaku Dalam 22:29.

Anang semina berundingka diri empu aja. Ninting kali nuan bejalaika tanggungjawap diri empu enggau manah, nuan benung nulung orang bukai. Chunto iya, enti nuan bagas ngereja pengawa ba rumah, nuan deka ngelempungka pengawa diri sebilik ke bukai.

PRINSIP BUP KUDUS: “Beberekat agi orang ke meri, ari orang ke nerima.”—Surat Kereja Rasul 20:35.

Sanggup ngereja mayuh agi pengawa. Kereja meh mayuh agi ari ke dipinta. Enggau tu, nuan ulih nguasa pengidup diri. Nama kebuah? Enti nuan ngereja mayuh agi, tu ketegal nuan empu deka, ukai ketegal nuan dipejal.—Matthew 5:41.

PRINSIP BUP KUDUS: “Utai ti dikereja nuan, semina dikereja nuan nitihka ati nuan empu, ukai ari pejal.”—Pilimon 14.

Pengumbas iya. Orang ke bagas deka rindu gawa, tang ukai reti sida gila kereja. Sida mega deka ngiga awak alai belelak.

PRINSIP BUP KUDUS: “Manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut.”—Pengajar 4:6.