Identiti nuan ukai semina nyengkaum nama enggau gamal nuan, tang tu mega nyengkaum maruah, utai ke dipechayaka nuan, sereta sapa nuan ti bendar. Identiti nuan nya, semua ulah ari dalam enggau luar ti nyadika sapa nuan ke bendar.

Enti identiti nuan tegap, nuan enda senang ninga jaku orang. Pia mega, nuan enda ulih dikuasa nembiak ke serambau nuan.

“Mayuh orang baka patung ba kedai baju. Sida ngena utai ke ditentuka orang bukai.”—Adrian.

“Aku belajar bepegai ba utai ti betul taja pan tusah. Kaban ti bendar deka bebasaka pemutus aku lalu ngasuh aku berasai nyamai.”—Courtney.

PRINSIP BUP KUDUS: ‘Anang nitihka chara dunya, tang awakka Petara ngubah chara kita berunding.’—Rome 12:2.

Fikirka: Diatu, aku orang ke baka ni? Dudi hari, aku deka nyadi orang ke baka ni? Uji pansik pengering, pengelemi, enggau pemutus nuan, lebuh nyaut semua tanya tu:

Pengering: Nama pemandai enggau pengelandik aku? Nama ulah ti manah pasal aku? (Chunto iya: Kati aku nitihka jam ke disemaya? Ulih aku nagang diri? Kati aku bagas? Kati aku gerah jari?) Nama pengawa ke manah ti kala digaga aku?

TIP: Kati nuan tusah tetemuka utai ti positif pasal nuan empu? Tanya meh apai indai tauka kaban ti ulih dipechayaka nuan? Nama pengering aku? Nama kebuah?

PRINSIP BUP KUDUS: “Genap iku orang patut meresa pengawa diri, lalu enggau nya, iya deka gaga ati ketegal utai ti udah digaga iya, ukai ketegal iya mandingka diri enggau orang bukai.”—Galatia 6:4, NWT.

Pengelemi: Nama ulah ke patut dikemansangka aku? Ni maya aku senang diuji? Ba pekara ni aku patut nagang diri?

PRINSIP BUP KUDUS: “Enti kitai madahka diri nadai dosa, kitai nipu diri empu, lalu pemendar nadai dalam kitai.”—1 John 1:8.

Pemutus: Nama standard moral aku? Nama kebuah aku patut nitihka nya? Kati aku pechaya Petara bisi? Nama bukti ke ngasuh aku andal Petara bisi? Ba aku, nama ulah ke enda lurus, lalu nama kebuah? Kati aku pechaya pasal jemah ila?

PRINSIP BUP KUDUS: “Pemintar runding enggau pemereti ati nuan deka nyaga nuan.”—Jaku Dalam 2:11.