Ebanghelio ni Mateo 14:1-36
14 Iti dayta a tiempo, nadamag ni Herodes nga agturay iti distrito* ti Galilea ti maipapan ken Jesus,+
2 ket kinunana kadagiti adipenna: “Isu daytoy ni Juan a Mammautisar. Napagungaren isu a makaaramid kadagiti milagro.”+
3 Impaaresto ken impaibalud idi ni Herodes* ni Juan gapu ken Herodias nga asawa ni Felipe a kabsatna.+
4 Ta namin-adu nga imbaga kenkuana ni Juan: “Saan a rumbeng nga asawaem dayta a babai.”+
5 Nupay kayatna a papatayen, nagbuteng kadagiti tattao ta imbilangda ni Juan kas propeta.+
6 Ngem bayat ti panagkasangay+ ni Herodes, nagsala ti balasang ni Herodias ket naay-ayo unay ni Herodes+
7 isu nga inkarina nga itedna ti aniaman a kiddawen ti balasang.
8 Imbilin ni Herodias iti balasangna a kastoy ti ibagana: “Itedmo kaniak ti ulo ni Juan a Mammautisar a naikabil iti bandehado.”+
9 Naladingitan ti ari, ngem gapu ta nagkari iti sanguanan dagiti kaduana a mangmangan,* imbilinna a maaramid dayta.
10 Gapuna, pinapugotanna ni Juan iti pagbaludan.
11 Naikabil ti ulona iti bandehado sa naited iti balasang, ket intedna met ken nanangna.
12 Idi agangay, immay dagiti adalan ni Juan ket innalada ti bangkayna ken intabonda sa impadamagda dayta ken Jesus.
13 Idi naammuan daytoy ni Jesus, naglugan iti bangka ket napan iti naiputputong a lugar tapno agmaymaysa. Ngem idi nadamag dayta dagiti tattao iti siudad, nagnagnada a simmurot kenkuana.+
14 Idi dimsaag, nakitana ti nakaad-adu a tattao. Naasian kadakuada+ ket pinaimbagna dagiti masakit.+
15 Ngem idi mumalemen, immasideg dagiti adalanna ket kinunada kenkuana: “Awan ti matatao ditoy ken mumalmalemen. Ibagam kadagiti tattao a mapanda gumatang iti kanenda kadagiti purok.”+
16 Ngem kinuna ni Jesus: “Saan a kasapulan a pumanawda. Pakanenyo ida.”
17 Insungbatda: “Lima laeng a tinapay ken dua nga ikan ti adda kadakami.”
18 Kinunana: “Itedyo kaniak.”
19 Binilinna dagiti tattao nga agdalupisakda iti karuotan. Innalana ti lima a tinapay ken dua nga ikan ket timmangad iti langit sa dimmawat iti pamendision.+ Kalpasanna, pinispisina dagiti tinapay, intedna kadagiti adalanna, sa inwarasda dagita kadagiti tattao.
20 Nanganda amin ket nabsogda. Idi inurnongda dagiti natedda, napno ti 12 a basket.+
21 Dagidiay nangan ket agarup 5,000 a lallaki, malaksid pay kadagiti babbai ken ubbing.+
22 Kalpasanna, dagus a pinagluganna dagiti adalanna iti bangka tapno umun-unada a bumallasiw, ngem pinagawidna dagiti tattao.+
23 Idi nagawiden dagiti tattao, simmang-at nga is-isuna iti bantay tapno agkararag.+ Idi rumabiin, adda sadiay nga agmaymaysa.
24 Nakaadayon ti bangka iti ginasut a metro* ken iyallo-allon dagiti dalluyon ta sumuba kadakuada ti angin.
25 Iti maikapat a panagbantay iti rabii,* nagna ni Jesus iti rabaw ti baybay a napan iti ayanda.
26 Idi nakitada a magmagna iti rabaw ti baybay, nagdanag dagiti adalan ket kinunada: “Agtagtagaineptayo kadi?” Ket nagikkisda gapu iti butengda.
27 Ngem dagus a kinuna ni Jesus: “Patibkerenyo ti pakinakemyo! Siak daytoy; dikay agbuteng.”+
28 Simmungbat ni Pedro: “Apo, no sika dayta, papagnaennak iti rabaw ti danum a mapan dita ayanmo.”
29 Kinunana: “Umayka!” Dimsaag ni Pedro iti bangka ket nagna iti danum nga agturong ken Jesus.
30 Ngem nagbuteng gapu iti napigsa nga angin, ket nangrugi a lumned sa impukkawna: “Arayatennak, Apo!”
31 Dagus nga inyawat ni Jesus ti imana ket iniggamanna ni Pedro sa kinunana: “Bassit ti pammatim, apay a nagduaduaka?”+
32 Idi nakalugandan iti bangka, nagsardeng ti angin.
33 Nagruknoy kenkuana dagiti adalanna nga adda iti bangka ket kinunada: “Pudno a sika ti Anak ti Dios.”
34 Bimmallasiwda ket simmangladda idiay Genesaret.+
35 Dagiti tattao iti dayta a lugar nailasinda ni Jesus isu nga impadamagda dayta kadagiti lugar iti aglawlawda, ket impanda kenkuana ti amin a masakit.
36 Impakpakaasida kenkuana nga uray masagidda la koma ti gayadan ti makinruar a badona,+ ket immimbag ti amin a nangsagid iti dayta.
Footnotes
^ Lit., “a tetrarka.”
^ Wenno “nga agsadsadag iti lamisaan.”
^ Lit., “adu nga estadia.” Ti 1 estadia ket 185 m.
^ Kayatna a sawen, agarup 3:00 ti parbangon agingga iti agarup 6:00 ti bigat.
