Saan a napabutngan dagiti kakabsat, ket intultuloyda latta ti naggigimong. Nangaramid dagiti panglakayen kadagiti urnos tapno maprotektaran dagiti kakabsat. Kinuna ni Brother André Carbonneau, a maysa nga abogado a taga-Canada a nangidepensa kadagiti kakabsat kadagidi a tawtawen: “Masansan nga adda brother a nakapuesto iti asideg ti paggigimongan nga adda tugotna a selpon. No adda dagiti sumungsungad a posible a mangraut, dagus a pakdaaranna dagiti panglakayen.”

No maraut dagiti kakabsat, dua a pannakabagi ti sanga nga opisina ti bumisita tapno paregtaenda ida. Kuna ni André, “Nakaskasdaaw ta kaaduanna a naragsak ken nakaisem dagiti kakabsat a masangpetan dagiti pannakabagi ti sangay iti paggigimongan.”

Determinado met nga agtultuloy nga agserbi dagiti saan a direkta a naapektaran iti panangraut, a pakairamanan dagiti agad-adal iti Biblia. Malagip ni André ti imbaga ti maysa a babai a dandani idin agbalin a di bautisado  nga agibumbunannag. Kinuna ti babai, “Idi nabuyak iti TV dagiti panangraut, nakitak ti nagdumaan dagiti pudno a Kristiano ken dagiti ulbod a Kristiano, ket kayatko ti agbalin a pudno a Kristiano.”

Kadagidi a narigat a tawtawen, impakita dagiti kakabsat a natured ken nabileg ti pammatida babaen iti panagtalinaedda a naregta iti trabaho a panangasaba. Kasta met laeng a pammati ti impakita dagiti kakabsat a nangidepensa kadagiti kapammatianda iti korte.

 Masansan a padpadaksen ti media dagiti Saksi, nga ibagbagada a pagsisinaenda dagiti pamilia, dida agpapaagas, ken busbusorenda ti gobierno. Dagiti abogado a nangidepensa kadakuada inrisgoda ti reputasion ken trabahoda.

Ni John Burns ket maysa nga abogado a naggapu iti sangay ti Canada a timmulong idi kadagiti kakabsat idiay Georgia. Kinunana: “Situtulok a timmulong dagiti kakabsat nga abogado idiay Georgia. Uray no mabalin a maapektaran ti trabahoda, saanda a mabuteng a mapan  iti korte ken mangibaga a maysada a Saksi ni Jehova.” Timmulong dagita a natured a Saksi iti “panangidepensa ken legal a panangipasdek iti naimbag a damag.”—Fil. 1:7.

Kabayatanna, nagtultuloy latta a mararaut dagiti Saksi. Isu nga idi Enero 8, 2001, nangrugi a nagpapirma dagiti kakabsat iti petision a mangkidkiddaw iti proteksion manipud iti panangraut ken iti pannakaidarum dagidiay nangraut kadagiti natalna nga umili.

Inlawlawag ni Brother Burns ti panggep ti petision: “Kayatmi nga ipakita a saan a pabor ti kaaduan a Georgian iti pannakaidadanes dagiti Saksi ni Jehova, ken ti adda iti likudan dagita a panangidadanes ket maysa a bassit a grupo ti extremist iti relihion.”

 Iti dua laeng a lawas, 133,375 a tattao iti intero a Georgia—a kaaduan ket Orthodox—ti nagpirma iti petision. Uray no naipasa ti petision ken Presidente Shevardnadze, saan latta a nagsardeng ti panangidadanes dagiti extremist iti relihion kadagiti Saksi.

Ngem nagtultuloy a binendisionan ni Jehova dagiti adipenna. Bayat nga idaddadanes dagiti extremist iti relihion ti ili ti Dios, aw-awisen ni Jehova a Dios ti adu a napudno a tattao a rummuar iti ulbod a relihion.

Adu a tawen a debotado a miembro ti Georgian Orthodox Church ni Babilina Kharatishvili. Idi agtawen iti nasurok a 30, nagbibiahe kadagiti ili ken purok tapno isurona ti maipapan iti panagbiag dagiti santo.

Ngem kayat ni Babilina a maammuan ti ad-adu pay maipapan iti Dios isu nga immatender kadagiti klase iti maysa a seminario ti Georgian Orthodox. Naminsan, impakita ti agisursuro iti seminario ti libro a Pannakaammo a Mangiturong iti Biag nga Agnanayon ken imbagana kadagiti agdengdengngeg a dumawatda iti kopia kadagiti Saksi ni Jehova. Kinunana, “Adu ti masursuroyo maipapan iti Biblia iti daytoy a libro.”

Nakigtot ni Babilina. Likliklikanna idi dagiti Saksi, ket ita, irekrekomenda ti agisursuro iti seminario ti libroda! Pinanunotna, ‘No maammuak ti maipapan iti Dios kadagiti Saksi ni Jehova, ania pay ti ar-aramidek ditoy?’ Dagus a nakisarita kadagiti Saksi iti siudad ti Poti ket nakipagadal iti Biblia.

Bayat nga umad-adu ti masursuro ni Babilina iti Biblia, nangaramid kadagiti dakkel a panagbalbaliw iti biagna.  Imbagana: “Idi nakitak a mismo nga ibagbaga ti Biblia a saan nga umiso ti agdayaw kadagiti imahen, insardengko ti amin a kita ti idolatria. Kombinsidoak a dayta ti umiso nga aramidek.” Idi dandanin agtawen iti 80, kayatnan ti agbalin a Saksi ni Jehova.

Makapaladingit ta idi 2001, nagsakit ni Babilina ket natay sakbay a mabautisaran. Ngem idi agangay, nabautisaran ti apokona a ni Izabela ket matalek ita nga agserserbi ken Jehova.

Agtawen ni Eliso Dzidzishvili iti 28 idi nagdesision nga agmadre. Gapu ta awan ti kombento nga asideg iti lugarda a Tkibuli, immakar idiay Tbilisi idi 2001. Bayat nga ur-urayenna a maawat iti kombento, nagtrabaho pay laeng kas part-time a titser. Nairana a maysa kadagiti sursuruanna ket anak a babai ti kabsat nga agnagan iti Nunu.

Inyestoria ni Eliso: “Masansan a pagsarsaritaanmi ti  maipapan iti Biblia. Nauyongak a mangidepensa iti Orthodox a relihion, idinto ta naanus ni Nunu a mangipakita kadagiti teksto. Maysa nga aldaw, imbagana a kayatna nga ibasa ti broshur nga Ania ti Kalikaguman ti Dios Kadatayo? Idi basbasaenmi dagiti parapo ken dagiti teksto iti Biblia, naammuak a ti panagdayaw kadagiti imahen ket direkta a panagsukir iti bilin ti Dios.”

Idi agangay, napan ni Eliso iti simbaan ket nagsaludsod iti padi. Nalawag kadagiti sungbat ti padi a saan a naibatay iti Biblia dagiti isursuro ti simbaan. (Mar. 7:7, 8) Gapu ta kombinsidon ni Eliso a nasarakannan ti kinapudno, dagus a nakipagadal iti Biblia kadagiti Saksi ni Jehova ket di nagbayag, nabautisaran.

Idi 2001, umad-adu ti bilang dagiti kongregasion nga agkasapulan iti nasayaat a lugar a pagdaydayawan. Natantia nga agarup 70 a Kingdom Hall ti kasapulan a  maipatakder. Gapuna, nairugi ti programa a panagibangon iti Kingdom Hall iti pagilian uray adda dagiti bumusbusor.—Esd. 3:3.

Di nagbayag, rinugian ti maysa a grupo dagiti managibangon a baliwan ti disenio ti maysa a patakder a dati nga us-usaren ti dadduma a kongregasion idiay Tbilisi. Naisaruno a dagus ti dua a proyekto—idiay Tbilisi ken idiay Chiatura nga adda iti makinlaud a Georgia.

Inyestoria ni Brother Tamazi Khutsishvili, a timmulong iti proyekto idiay Chiatura: “Kinse ti bilangmi nga agtrabtrabaho iti inaldaw. Di nagbayag, naammuan dagiti umili nga agibangbangonkami iti baro a Kingdom Hall. No dadduma, madamdamagmi a kayat dagiti bumusbusor a dadaelen ti Kingdom Hall.”

Malpas ngata ti proyekto uray adda dagiti bumusbusor? Kinuna ni Tamazi: “Intuloymi ti trabaho ket nalpas ti Kingdom Hall iti tallo a bulan. Uray adda dagiti pamutbuteng, awan ti bumusbusor nga immay.” *

Idi Oktubre 2003, nairugi a maibangon ti maysa a Kingdom Hall iti siudad ti Samtredia. Binutbuteng manen dagiti extremist iti relihion dagiti kakabsat. Kinapudnona, kaibangbangon pay laeng dagiti pader ken nabasa pay ti semento idi immay dagiti bumusbusor ket dinadaelda ti patakder.

Ngem idi Nobiembre 2003, nabang-aran dagiti kakabsat. Adda napasamak a panagbalbaliw iti gobierno ti Georgia ket gapu iti dayta, nawaywayan dagiti relihion. Kas resultana, naaresto ti dadduma a miembro ti grupo ti extremist nga Orthodox a nangraut kadagiti Saksi ni Jehova.

Di nagbayag kalpasan a nagpatingga ti panangidadanes, adu a naespirituan a bendision ti naawat ti ili ni Jehova idiay Georgia. Iti 2004 a kombension distrito, nairuar ti Baro a Lubong a Patarus ti Kristiano a Griego a Kasuratan iti lengguahe a Georgian.

Kalpasanna, iti “Asidegen ti Pannakaisalakan!” a Kombension Distrito idi 2006, adda pay nakallalagip a napasamak. Naragsakan dagiti immatender idi naammuanda nga agpalawag ni Geoffrey Jackson a miembro ti Bagi a Manarawidwid. Nasorpresada idi inruar ni Brother Jackson  ti kompleto a Baro a Lubong a Patarus ti Nasantuan a Kasuratan iti Georgian!

Nagarubos ti lua dagiti immatender gapu iti ragsak. Kinuna ti maysa a sister: “Diak mailadawan ti ragsakko idi naawatmi ti kompleto a Biblia. . . . Talaga a naisangsangayan dayta nga okasion.” Nasurok a 17,000 ti immatender iti dayta a naespirituan a padaya. Nakapatpateg dayta nga okasion iti pakasaritaan ti ili ni Jehova idiay Georgia.